Pages

Monday, April 10, 2017

မြန်မာ့ရိုးရာယဉ်ကျေးမှု အတာရေသဘင်ပွဲ


မြန်မာ့ရိုးရာယဉ်ကျေးမှု အတာရေသဘင်ပွဲ

မြန်မာနိုင်ငံတွင် မြန်မာ့ရိုးရာယဉ်ကျေးမှု အတာရေသဘင် ပွဲတော်ကို ရှေးအစဉ်အလာ ကပင် နှစ်စဉ်မပျက် ခရစ်နှစ်၏ ဧပြီလနှင့် မြန်မာနှစ်၏ တန်ခူးလတို့တွင် ကျင်းပဆင်နွှဲ ကြသည်။ ဘာသာရေးနှင့် တိုက်ရိုက်ဆက်နွှယ်ခြင်း မရှိသော ပွဲတော်ဟုလည်း ဆိုရမည်ဖြစ်သည်။ မြန်မာသက္ကရာဇ်၏ နှစ်ဟောင်းအဆုံးတွင် ကျင်းပရသော ပွဲတော်ဖြစ် သကဲ့သို့ နှစ်သစ်ကိုကြိုဆိုသော ပွဲတော်လည်း ဖြစ်သည်။ ယနေ့ချိန်ခါ ကာလသည် ယခုနှစ် ၁၃၇၈ ခုနှစ် ကုန်ဆုံး၍ ၁၃၇၉ ခုနှစ်ကို ကြိုဆိုသော နှစ်သစ်ကူး အခါသမယ ပွဲတော်လည်း ဖြစ်သည်။

မြန်မာ့ရိုးရာ ယဉ်ကျေးမှု အတာရေသဘင် ပွဲတော်သည် အခြေခံမဲ့စွာဖြင့် ဖြစ်ပေါ်လာသော ပွဲတော်မဟုတ်ဘဲ နက္ခတ်ဗေဒပညာရှင် များနှင့် ပြက္ခဒိန် အကြံပေးအဖွဲ့တို့က တွက်ချက်ကာလပေါင်း များစွာ ကြိုတင်၍ နိုင်ငံတော်အစိုးရ ပြန်တမ်းဖြင့် သင်္ကြန်အကြိုနေ့၊ သင်္ကြန်အကျနေ့၊ သင်္ကြန်အကြတ်နေ့၊ သင်္ကြန်အတက်နေ့၊ နှစ်ဆန်းတစ်ရက်နေ့ စသည်ဖြင့် ကြေညာ ပေးထားခြင်း ဖြစ်သည်။ သင်္ကြန်အကြတ် နှစ်ရက်ဖြစ်သည့် နှစ်လည်း ရှိသည်။

ရေသဘင်ပွဲတော်ကြီး ၏ အနှစ်သာရသည် အမှန်အားဖြင့် နှစ်ဟောင်းမှ မကောင်းမှု အညစ်အကြေး တို့ကို ဆေးကြောခြင်း၊ ဆွေမျိုးမိတ်သင်္ဂဟ အပေါင်းတို့အား ရေကဲ့သို့အေးမြ စေကြောင်း ဆန္ဒဖြင့် အတာရေပက်ဖျန်း ပေးခြင်း၊ မြန်မာနှစ်သစ်ကို ကြိုဆိုခြင်းတို့ ပါဝင်သည်။ မြန်မာ့ရိုးရာ ယဉ်ကျေးမှု အတာရေသဘင် ပွဲတော်ကြီးကို ခရစ်သက္ကရာဇ်၏ ဧပြီလတွင် ကျင်းပသည် ဆိုသော်လည်း ပွဲတော်အတွက် အစောပိုင်း ကတည်းက ကြိုတင် ပြင်ဆင်မှုများ ပြုလုပ်ကြရသည်။

ပြင်ဆင်မှုဟု ဆိုရာတွင် စီးပွားရေး လုပ်ငန်းရှင်များ၊ အစိုးရဌာနများ၊ လူမှုရေး အသင်းအဖွဲ့များ စသည်တို့က ရေကစားမဏ္ဍပ်များ တည်ဆောက်ခြင်း၊ အလှပြယာဉ်များ ပြင်ဆင်ခြင်းတို့ကို ဆောင်ရွက်ကြသည်။ မန္တလေးမြို့တွင် ကျုံးပတ်လည်၌ ရေကစားမဏ္ဍပ် များကို အဓိကထား တည်ဆောက် ကြပြီး ရန်ကုန်မြို့တွင် ကမ္ဘာအေး ဘုရားလမ်းနှင့် ကန်တော်ကြီး ပတ်လမ်းတို့တွင် တည်ဆောက်ကြလေ့ ရှိသည်။ အခြားမြို့နယ် များတွင်လည်း မိသားစုမဏ္ဍပ်ငယ် တို့ဖြင့် ဆင်နွှဲကြသည်။

ထို့နောက် မဏ္ဍပ်များပေါ်တွင် ရေပိုက်များ၊ အချို့မဏ္ဍပ်များ ပေါ်တွင် ရေစည်ပိုင်းများ ထားပြီး လှပျိုဖြူလေးများက တူညီဝတ်စုံများကို ဝတ်ကာ သီချင်းသီဆိုခြင်း၊ သင်္ကြန်အက များဖြင့် ရေကစား ကြသည်။ ရေသဘင်ပွဲဆင်နွှဲ လိုကြသော လူငယ်များကလည်း စုဖွဲ့၍ ကားငှားကာ ရေပက်ခံထွက် ကြသည်။ ထိုကဲ့သို့သော အပြုအမူများကို မြန်မာ့ရိုးရာ ယဉ်ကျေးမှုနှင့် အညီ ဆင်နွှဲကြပါက ပျော်ရွှင်ဖွယ် ကောင်းသော နှစ်သစ်ကူးပွဲတော်၊ အတာရေသဘင် ပွဲတော်ဟု ခေါ်ဆိုရမည် ဖြစ်သည်။

သို့ဖြစ်ရာ မြန်မာနိုင်ငံတွင် လအလိုက် ဘာသာရေးနှင့် ပတ်သက်သော၊ ဘာသာရေးနှင့် မပတ်သက်သော ပွဲတော်များကို နေရာအနှံ့အပြား၌ ကျင်းပလေ့ရှိကြသည်။ မြန်မာနှစ်သစ်ကူး ပွဲတော်သည် လူမျိုးဘာသာ မခွဲခြားဘဲ ပါဝင်ဆင်နွှဲကြသော ပွဲတော် ဖြစ်သောကြောင့် ကမ္ဘာ့အလယ်တွင် မြန်မာဟု ဂုဏ်ယူဝင့်ကြွား နိုင်စေရန် နှစ်သစ်ကူး အတာသင်္ကြန် ပွဲတော်တွင် သရုပ်ပျက် ဝတ်စားဆင်ယင်မှု၊ မူးယစ်ရမ်းကားမှု၊ ခိုက်ရန်ဖြစ်ပွားမှု၊ အမျိုးသမီးများ၏ ဂုဏ်သိက္ခာ ထိခိုက်မှုတို့ကို ဖယ်ရှား၍ မြန်မာ့ယဉ်ကျေးမှုကို ထိန်းသိမ်းကာ ဆင်နွှဲကြ စေလိုကြောင်း အသိပေး ရေးသား လိုက်ရပေသည်။

ရတနာပုံနေ့စဉ်သတင်းစာ ၊ စာ(၂)

No comments:

Post a Comment

Related Posts Plugin for WordPress, Blogger...