ရွှေဘို ၊ ၃၁-၁၀-၂၀၁၆
ရွှေဘိုမြို့နယ် ကျောက်မြောင်း မြို့နယ်ခွဲ နွယ်ငြိမ်း၊ ရွှေတိုက်၊ရေဇွန် ကျေးရွာတို့တွင် စဥ့်အိုးအမျိုးမျိုး ထုတ်လုပ်ရောင်းချ နေသော်လည်း ရှေးဟောင်းပုံစံ အလှအိုး များကို ပိုမိုစိတ်ဝင်စားမှု ရှိပြီး ဟိုတယ်များက မှာယူမှု များပြား လာကြောင်း အိုးရောင်းသူ တစ်ဦးက ပြောပြသည်။
အဆိုပါ ရှေးဟောင်း ပုံစံအိုးများကို ရန်ကုန်မြို့၊ ပုဂံ-ညောင်ဦး တို့မှ ဟိုတယ်များက အဓိကထား မှာယူကြပြီး ယခု နောက်ပိုင်းတွင် တောင်ကြီး၊ မန္တလေး၊ နေပြည်တော်၊ မြစ်ကြီးနား မြို့တို့ကပါ တင်ပို့နေရကြောင်း သိရသည်။
''ကျွန်တော်က အိုးကို ကိုယ်တိုင်ထုတ်တာ မဟုတ်ပါဘူး။ အိုးလုပ်တဲ့ ပညာရှင်ခေါ်ပြီး စိတ်ကြိုက်ပုံစံ လုပ်တာပါ။ မိရိုးဖလာ လုပ်ငန်းမို့ အခက်အခဲ မရှိပေမယ့် ကိုယ်က တီထွင်ပြီး လုပ်တယ်။ ရောင်းရမယ်၊ မရောင်းရဘူး ဆိုတာ မသိဘဲ ဒီပစ္စည်းတွေ ပြုလုပ်ခဲ့ ပါတယ်။ ကိုယ့်ဒေသက ပစ္စည်းတွေ အသွင်တစ်မျိုး ပြောင်းစေချင်တာလဲ ပါပါတယ် " ဟု အိုးရောင်းသူ တစ်ဦးက ပြောပြသည်။
ရှေးဟောင်းအိုး ပုံစံကို ၂ဝဝ၆ ခုနှစ်နောက်ပိုင်း စတင်ထုတ်လုပ် ရောင်းချသော်လည်း ဈေးကွက် မရှိခဲ့ကြောင်း၊ ၂ဝဝ၈ ခုနှစ်မှ စတင်၍ ဈေးကွက်အတွင်း နေရာရလာကာ ယခုအချိန်တွင် ခေတ်စားလာ ကြောင်း သိရသည်။
ရှေးဟောင်းအိုး တစ်လုံး ပြုလုပ်ရာတွင် အဆင့်ခုနစ်ဆင့်ခန့် ပြုလုပ်ရပြီး ပထမဆုံး မြေများကို ရေဖျော်ပြီး အိုးပုံစံပြုလုပ်ကာ ဒီဇိုင်းရေး ရကြောင်း၊ ဒီဇိုင်း ရေးဆွဲထားသည့် အိုးများကို နေပူလှန်းပြီး ဖန့်သွားသည့် အခါ ကော်ဖတ်စား ရကြောင်း၊ ထို့နောက် အိုးများကို မီးဖုတ်သန့်ရှင်းရေး ပြုလုပ်ကာ ဆေးရောင်ခြယ် ရကြောင်းနှင့် အိုးတစ်လုံး ပြီးသည်ထိ လေးရက်ခန့် ကြာကြောင်း သိရသည်။
အဆိုပါ အိုးလုပ်ငန်းတွင် စဥ့်ထည်ပစ္စည်း မျိုးစုံကို တစ်နှစ်ပတ်လုံး ထုတ်လုပ်ရာ နွေရာသီတွင် ရောင်းအားကောင်းပြီး ဆောင်းဥတုတွင် လုပ်ငန်း နှေးကွေးကာ မိုးတွင်းကာလတွင် ထုတ်လုပ်မှု မရှိသလောက် နည်းပါးကြောင်း သိရသည်။
စင်(ကောလင်း)
ရတနာပုံနေ့စဉ်သတင်းစာ ၊ စာ(၂၄)
No comments:
Post a Comment