မန္တလေး ၊ ၂၄-၂-၂၀၁၅
မန္တလေးမြို့ ကမ္ဘာ့မှတ်တမ်း အမွေအနှစ် စာရင်းဝင် ရွှေကျောင်းတော်ကြီး ၏ ကြံ့ခိုင်မှု အတွက် ကျောင်းတော်ကြီး ပေါ်သို့ တက်ရောက် လေ့လာသူများ ကို အရေအတွက် အကန့်အသတ်ဖြင့် သာ ခွင့်ပြုပါက ကျောင်းတော်ကြီး ခံနိုင်ဝန်ထိခိုက်မှု သက်သာစေကြောင်း အဆိုပါ ကျောင်းပြုပြင် ထိန်းသိမ်းရေး ပညာရှင် Jeffy Allen က ၄င်း၏ လေ့လာတွေ့ရှိချက် များအရ ပြောပြသည်။
မန္တလေးမြို့၌ ရှေးဟောင်း ယဉ်ကျေးမှု အမွေအနှစ်များ အများအပြား ရှိရာနေရာများသို့ ပြည်တွင်း၊ ပြည်ပမှ လာရောက်လည်ပတ် လေ့လာသူ များဖြင့် နေ့စဉ် စည်ကားလျက် ရှိသည်။ ထိုကဲ့သို့ ပြည်တွင်း၊ ပြည်ပမှ လေ့လာသူများ အနေဖြင့် ရွှေကျောင်းတော်ကြီး သို့ နေ့စဉ် ဝင်ရောက်သူ ဦးရေမှာ ၅ဝဝ ခန့်ရှိပြီး နိုင်ငံခြားသား ဦးရေ ၃ဝဝ ခန့်နှင့် ပြည်တွင်းမှ လာရောက်သူ ဦးရေ ၂ဝဝ ခန့် ရှိကြောင်း ရွှေကျောင်း သုတေသနဌာန မှ မှတ်တမ်းများ အရ သိရသည်။
ထိုသို့ ရွှေကျောင်းကြီး အတွင်း နေ့စဉ် လူဦးရေ ၅ဝဝ ခန့် ဝင်ထွက်လျက်ရှိရာ အများစုမှာ ညနေ ၃ နာရီခွဲနှင့် ၅ နာရီကြားတွင် တစ်ချိန်တည်း၊ တစ်ပြိုင်တည်း လာရောက်ကြပြီး ကျောင်းတော်ကြီး ပေါ်သို့ အစုလိုက် အပြုံလိုက် တက်ရောက်လျက် ရှိကြောင်း၊ ကျောင်းတော်ကြီး ပေါ်သို့ တစ်ပြိုင်နက်တည်း လူ အများအပြား တက်ရောက်မှုသည် ကျောင်းတော်ကြီး ၏ ကြံ့ခိုင်မှုနှင့် ခံနိုင်ဝန် ထိခိုက် ကျဆင်းကြောင်း၊ ၄င်းအပြင် ရုပ်လက္ခဏာ သွင်ပြင် များလည်း များစွာ ထိခိုက်လျက် ရှိကြောင်း ၄င်းက ဆက်လက် ပြောပြသည်။
''ကျွန်တော် တွေ့ရတဲ့ လေ့လာချက်တွေ အရ ကျောင်းတော်ကြီးရဲ့ ကြံ့ခိုင်မှု ထိခိုက်တာဟာ လူတွေ အများကြီး တစ်ချိန်တည်း၊ တစ်ပြိုင်တည်း ကျောင်းကြီးပေါ်ကို တက်ရောက်မှုလဲ အဓိက ပါဝင်တယ်။ ဒါ့ကြောင့် ကျောင်းတော်ကြီး ပေါ် တက်ရောက်မှုကို ကန့်သတ် ပေးနိုင်ရင်တော့ ပိုကောင်းပါတယ်။ အထူးသဖြင့် စည်းကမ်းမရှိ ပြေးလွှား ပြုံတိုးနေတာ၊ ဟိုနေရာကိုင်၊ ဒီနေရာမှီ လုပ်ကြတော့ ရုပ်လက္ခဏာလဲ ပျက်စီးတယ်။ လူများတော့ ပိုဆိုးတာပေါ့ ... '' ဟု ၄င်းက ထပ်မံပြော ပြသည်။
ရွှေကျောင်းတော်ကြီး ကို နေ့စဉ်နံနက် ၇ နာရီခွဲမှ ညနေ ၅ နာရီထိ ဝင်၊ ထွက်ချိန် သတ်မှတ် ထားကြောင်း၊ ယခုအခါ ကျောင်းတော်ကြီးကို ပြုပြင်ထိန်းသိမ်းရေး လုပ်ငန်းများ ဆောင်ရွက်ရန် အတွက် WMF ရှေးဟောင်း သုတေသနဌာန နှင့် ပူးပေါင်း ဆောင်ရွက်လျက် ရှိကြောင်း အဆိုပါကျောင်းမှ တာဝန်ရှိသူ တစ်ဦးက ပြောပြသည်။ (၁၈ဝ)
#Yadanarpondaily
#ရတနာပုံနေ့စဉ်
No comments:
Post a Comment