.jpg)
ကုန်းဘောင်ခေတ် ပုဂံမင်းလက်ထက်က ရှေးဟောင်း ဆီမီးခုံတံတား
မြင်းခြံ ၊ ၂၄-၂-၂၀၁၅
မြင်းခြံမြို့နယ် မြောက်ဘက် ၂၆ မိုင်ခန့်အကွာ ဧရာဝတီ မြစ်ကမ်းပါး အနီးတွင် ရှေးဟောင်းရွာကြီး တစ်ရွာဖြစ်သည့် ဆီမီးခုံကျေးရွာ တည်ရှိသည်။ ဆီမီးခုံ ကျေးရွာသည် တိုက်နယ်ကျေးရွာ တစ်ရွာဖြစ်သည့် အပြင် အိမ်ခြေ တစ်ထောင်ကျော် ရှိပြီး ရွာ၏ အလယ်ပိုင်းတွင် ဧရာဝတီ မြစ်ရေ တက်ချိန်၌ မြစ်ရေဝင်ရောက် စီးဆင်းသည့် ချောင်းငယ် တစ်ခုရှိသည်။ ထိုချောင်းငယ် ပေါ်တွင် ကန့်လန့်ဖြတ်၍ တည်ဆောက် ထားသည့် ရှေးဟောင်း သစ်သား တံတား ရှိသည်။
အဆိုပါ ရှေးဟောင်း သစ်သားတံတား ကို ကုန်းဘောင်ခေတ် ပုဂံမင်း လက်ထက်တွင် လှေလောင်း ပဲ့နင်းကြီး ဦးအံ့ကြီး က တည်ဆောက်ခဲ့ပြီး ကျေးရွာအမည် ကို အစွဲပြု၍ ဆီမီးခုံတံတား ဟု အမည်တွင်သည်။ ဆီမီးခုံ တံတားသည် ကျွန်းသစ်သား တိုင်လုံးပေါင်း ၁၈၆ တိုင်ဖြင့် တည်ဆောက်ထားပြီး တံတားတွင် ဇရပ် နှစ်ဆောင် ကိုလည်း ထည့်သွင်း ဆောက်လုပ်ထားသည်။
ဆီမီးခုံတံတား၏ ထူးခြားချက်မှာ တံတားသစ်သား တိုင်လုံးများ အားလုံး၏ တိုင်ထိပ်တွင် ထီးအမိုးကဲ့သို့ ကျောက်ခွက်များကို အုပ်မိုးထားခြင်း ဖြစ်သည်။ သစ်သားတိုင်လုံးများ ထိပ်ကို အုပ်မိုးထားခြင်းမှာ မိုးရေများ ဝင်ရောက်ကာ ဆွေးမြည့် ပျက်စီးမည့် ဘေးအန္တရာယ်ကို အကာအကွယ် ပြုထားခြင်း ဖြစ်ဟန်တူသည်။ ထို့ကြောင့် ဆီမီးခုံတံတား သည် နှစ်ပေါင်း ရာကျော် ကြာမြင့်သည့် ကာလတိုင်အောင် ယိုယွင်းပျက်စီး မှုမရှိဘဲ ကျေးရွာဒေသခံ ပြည်သူများက ယနေ့တိုင် အသုံးပြု သွားလာနေကြဆဲ ဖြစ်ကာ ကျေးရွာ ဒေသခံများ စုပေါင်း၍ ရှေးဟောင်း ယဉ်ကျေးမှု အမွေအနှစ် ဆီမီးခုံတံတား ကို ဝိုင်းဝန်းထိန်းသိမ်း စောင့်ရှောက်လျက် ရှိကြောင်း သိရသည်။ (၁၄၇)
#Yadanarpondaily
#ရတနာပုံနေ့စဉ်
No comments:
Post a Comment