တောင်ကြီး ၊ ၂၉-၁၁-၂၀၁၆
မြန်မာနိုင်ငံ၌ စာတတ်မြောက်မှု အနည်းဆုံးဒေသ ဖြစ်သော ရှမ်းပြည်နယ်၌ အခြေခံ စာတတ်မြောက်ရေး လှုပ်ရှားမှု စာသင်ဝိုင်း များကို လာမည့်နှစ် ဇန်နဝါရီလတွင် ဆောင်ရွက်သွားမည် ဖြစ်ကြောင်း ကျောင်းပြင်ပ ပညာရေးဦးစီးဌာန ညွှန်ကြားရေးမှူးချုပ် ဒေါက်တာ ခိုင်မြဲ ထံမှ သိရသည်။
''၂ဝ၁၄ လူဦးရေနှင့် အိမ်အကြောင်း ဆိုင်ရာ သန်းခေါင်စာရင်း အရ ရှမ်းပြည်နယ် က စာတတ်မြောက်သူ အနည်းဆုံး ဖြစ်နေတာကြောင့် အခုလို စာတတ်မြောက်ရေး လှုပ်ရှားမှုတွေကို လုပ်ဆောင်ရ တာပါ။ ပထမဆုံးအနေနဲ့ ရှမ်းပြည်နယ် (တောင်ပိုင်း) က မြို့နယ် ၁ဝ မြို့နယ်နဲ့ ကျေးရွာတွေမှာ စာသင်ဝိုင်းတွေ လုပ်ဖို့ ဆောင်ရွက် နေတယ်။ လတ်တလောမှာ စာသင်ဝိုင်းတွေ အတွက် လိုအပ်တဲ့ ဆရာ၊ ဆရာမ တွေကို စာသင်ဝိုင်း တွေမှာ နေရာချဖို့ စီစဉ်နေပါတယ်။ နောက်အကျဆုံး ဇန်နဝါရီလ လောက် စလုပ်ဖြစ်မယ် ထင်ပါတယ်'' ဟု ဒေါက်တာ ခိုင်မြဲ ကပြောသည်။
ကျောင်းပြင်ပ ပညာရေး ဦးစီးဌာနကို စတင်ဖွဲ့စည်း ခဲ့ပြီးနောက် အောက်တိုဘာလ က ကယားပြည်နယ် အတွင်း အခြေခံ စာတတ်မြောက်ရေး လှုပ်ရှားမှု စာသင်ဝိုင်းများ ဆောင်ရွက်ခဲ့ပြီး ဖြစ်ရာ ယခုအခါ ဒုတိယ အကြိမ်အဖြစ် ရှမ်းပြည်နယ်၌ သင်ကြားပေး ရန် စီစဉ်နေခြင်း ဖြစ်သည်။
မြန်မာနိုင်ငံ၌ အသက် ၁၅ နှစ်နှင့် အထက် စာမတတ်သူ အရေအတွက် ၃၅ သိန်းကျော်ရှိပြီး စာမတတ်သူ အများဆုံး ရှိသည့်ဒေသမှာ ရှမ်းပြည်နယ် ဖြစ်ကာ စာမတတ်သူ ၁၃၁၄၅၇ဝ ဦးရှိကြောင်းနှင့် အသက် ငါးနှစ်အရွယ် ကျောင်းနေ ကလေး ၂ဝ ရာခိုင်နှုန်းသာ ရှိကြောင်း သိရသည်။
ထို့ပြင် အသက် ကိုးနှစ်နှင့် ၁၂ နှစ်ကြား ကလေးငယ် ၇ဝ ရာခိုင်နှုန်းသာ စာသင်ကြားလျက် ရှိပြီး အသက် ၁ဝ နှစ်နှင့် ၂ဝ နှစ်ကြားတွင် စာသင်ကြားသူ အရေအတွက် ဆက်တိုက်ကျဆင်း နေကာ အသက် ၂၁ နှစ်အရွယ် ယောက်ျားလေး များသည် ပညာဆက်လက် မသင်ဘဲ ကျောင်းထွက် သည်ကို တွေ့ရှိရကြောင်း ၂ဝ၁၄ လူဦးရေ နှင့်အိမ်အကြောင်း ဆိုင်ရာ သန်းခေါင်စာရင်း အချက်အလက်များ ဖြန့်ဝေခြင်း မှတ်တမ်းပါ ဖော်ပြချက်များ အရ သိရသည်။ (၄၄၇)
မြ၀တီနေ့စဉ်သတင်းစာ ၊ စာ (၆)
No comments:
Post a Comment