ရန်ကုန် ၊ ၁၇-၈-၂၀၁၅
ရန်ကုန်မြို့တွင်း ယာဉ်ကြော ပိတ်ဆို့မှုများကို ဖြေလျှော့နိုင် စေရန် မင်္ဂလာဒုံ လေဆိပ် နှင့် ဟံသာဝတီ လေဆိပ်တို့သို့ မြို့တွင်းမှ တိုက်ရိုက် သွားရောက် နိုင်မည့် မိုးပျံရထား လမ်းအား ၂ဝ၁၆-၂ဝ၁၇ ဘဏ္ဍာနှစ်တွင် စတင် တည်ဆောက် သွားမည် ဖြစ်ကြောင်း မြန်မာ့ မီးရထား (မြို့ပြဌာန)မှ သိရသည်။
အဆိုပါ မိုးပျံရထားလမ်း တည်ဆောက်ရာတွင် ပထမဦးစွာ မိုးပျံတံတား တည်ဆောက် သွားမည်ဖြစ်ပြီး အမြင့်ပေ၂ဝ ခန့်တွင် ရှိသော ယင်းတံတား၏ အလယ်တွင် သံလမ်းခင်း၍ ဆောင်ရွက်မည် ဖြစ်သည်။ အဆိုပါ မိုးပျံရထား ခရီးစဉ်တွင် ရပ်နားမည့် ဘူတာများ ကိုလည်း ထည့်သွင်း တည်ဆောက် သွားမည်ဖြစ်သည်။ အဆိုပါ မိုးပျံရထားလမ်း စီမံကိန်း ဒီဇိုင်းပုံစံကို နိုင်ငံတကာ ပုံစံအတိုင်း တည်ဆောက် သွားမည် ဖြစ်ကြောင်း သိရသည်။
''ရန်ကုန်က ခရီးသွား ပြည်သူတွေ သွားလာရေး လွယ်ကူလျင်မြန် စေဖို့ လျှပ်စစ် ရထားကို ကမ်းနားလမ်းမှာ စပြီး ဆောင်ရွက် နေပါတယ်။ နောက်ပြီး JICA ကလည်း မြေအောက် ရထားလမ်းတွေ လုပ်ဖို့ အဆိုပြု ထားတယ်လို့ သိရပါတယ်။ အခုလည်း ယာဉ်ကြော ပိတ်ဆို့မှု တွေကြောင့် ခရီးသွား ပြည်သူတွေ သွားလာရေး အဆင်မပြေ ဖြစ်နေတဲ့ အတွက် မြို့ပြ ရထားလမ်း စီမံကိန်းကို အကောင်အထည် ဖော်ဖို့ စီစဉ်တာပါ'' ဟု မြန်မာ့ မီးရထားမှ တာဝန်ရှိ သူတစ်ဦးက ပြောသည်။
ရန်ကုန်မြို့တွင်းမှ အပြည်ပြည် ဆိုင်ရာ လေဆိပ်များသို့ တိုက်ရိုက် သွားရောက် နိုင်မည့် မိုးပျံ ရထားလမ်းအား နှစ်ရှည် စီမံကိန်း အဖြစ် ဆောက်လုပ် သွားမည်ဖြစ်ပြီး အဆိုပါ ရထားလမ်း ပြီးစီးပါက အဆင့်မြင့် ရထား တွဲဆိုင်းများဖြင့် ပြေးဆွဲသွားမည် ဖြစ်ကြောင်း သိရသည်။
ထို့အပြင် ဂျပန် အပြည်ပြည် ဆိုင်ရာ ပူးပေါင်း ဆောင်ရွက်ရေး အေဂျင်စီ (JICA) သည် ရန်ကုန်မြို့၏ မြို့ပတ်ရထား စနစ်ကို အဆင့်မြှင့်တင် နိုင်ရန် အမေရိကန် ဒေါ်လာ သန်း ၂၅ဝ ရင်းနှီးမြှုပ်နှံ မည်ဖြစ်ပြီး ၂ဝ၁၆ ခုနှစ်တွင် လုပ်ငန်း စတင်မည် ဖြစ်ကာ စီမံကိန်း တစ်ခုလုံးကို ၂ဝ၂ဝ ပြည့်နှစ်တွင် အပြီး ဆောင်ရွက်ရန် ရည်မှန်း ထားသည်။ အဲယားကွန်း ပါရှိသည့် ရထားများကို ပျမ်းမျှမြန်နှုန်း တစ်နာရီ လျှင် ၃ဝ ကီလိုမီတာ (၁၉ မိုင်)ဖြင့် ၁ဝ မိနစ် တစ်ကြိမ် ပြေးဆွဲနိုင်ရန် ရည်မှန်း ထားကြောင်း သိရသည်။ (၄၄၇)
မြ၀တီနေ့စဉ် ၊ စာ(၃)
#Themyawadydaily
No comments:
Post a Comment