Pages

Tuesday, July 18, 2017

FDR နှင့် CVR တို့မှ ရရှိသည့် အချက်အလက်များ အပေါ်မူတည်၍ တပ်မတော် ပို့ဆောင်ရေး Y-8 F 200 W လေယာဉ်ပျက်ကျရသည့် အကြောင်းအရင်း ထုတ်ပြန် ချက်


FDR နှင့် CVR တို့အား စိစစ်ဖော်ထုတ်သည့် တတိယအဖွဲ့အစည်း (Third Party) မှ ပညာရှင်များကိုတွေ့ရစဉ်။ 
Three Strong Cumulonimbus Cloud ဖြစ်ပေါ်နေပုံကိုတွေ့ရစဉ်။

နေပြည်တော် ၁၉-၇-၂၀၁၇

တပ်မတော်သယ်ယူ ပို့ဆောင်ရေးလေယာဉ် (Y-8 F 200 W အမျိုးအစား၊ လေယာဉ် အမှတ်-၅၈၂၀) သည် ဇွန် ၇ ရက်တွင် မြိတ်မှ ရန်ကုန်သို့ ပျံသန်းစဉ် မွန်းလွဲ ၁ နာရီ ၃၅ မိနစ်တွင် ထားဝယ်မြို့၏ အနောက်တောင်ဘက် ၄၃ မိုင်ခန့်အရောက်၌ ထားဝယ်လေဆိပ်နှင့် အဆက်အသွယ်ရရှိပြီး နောက်ပိုင်း ဆက်သွယ်မှု ပြတ်တောက် သွားခဲ့ကာ ပျောက်ဆုံးသွားသဖြင့် ယင်းနေ့ မွန်းလွဲ ၂ နာရီမှ စတင်၍ တပ်မတော် (လေ)မှ လေယာဉ်များ၊ တပ်မတော် (ရေ)  မှ စစ်ရေယာဉ်များ၊ မြေပြင်တပ်များ၊ ဒေသခံငါးဖမ်း စက်လှေများနှင့် ပြည်သူများ ပူးပေါင်း၍ ရှာဖွေကယ်ဆယ်ရေး လုပ်ငန်းများကို ဆက်တိုက် လုပ်ဆောင်ခဲ့ရာ ဇွန် ၁၅ ရက်တွင် Black Box ဟုခေါ်သော FDR- Flight Data Recorder နှင့် CVR-Cockpit Voice Recorder တို့ ပါရှိသည့် လေယာဉ် အမြီးပိုင်းကို ရှာဖွေတွေ့ရှိ ခဲ့သည်။ ယင်းလေယာဉ် အမြီးပိုင်းအား ဇွန် ၁၈ ရက် ညနေ ၃ နာရီခွဲတွင် မတင်ဆယ်ယူနိုင်ခဲ့ပြီး လေယာဉ် ပျက်ရသည့် အကြောင်းအရင်းအား ဖော်ထုတ်နိုင်ရေး ဆက်လက် ဆောင်ရွက်ခဲ့သည်။

ယင်းသို့ ဆောင်ရွက်ခဲ့ရာတွင် FDR နှင့် CVR တို့၏ မူလထုတ်လုပ်သည့် ကုမ္ပဏီ Original Equipment Manufacturer (OEM) မှာ တရုတ်နိုင်ငံ ဖြစ်ပြီး ထုတ်လုပ်သူနှင့် အသုံးပြုသူ နှစ်ဦးနှစ်ဖက်အကြား သံသယကင်းရှင်းပြီး မလိုလားသည့် ကြားခံ အဖွဲ့အစည်းများ၏ သွေးထိုးမှု ရှောင်ရှား နိုင်စေရန်အတွက် တပ်မတော်ကာကွယ်ရေး ဦးစီးချုပ်က တတိယအဖွဲ့အစည်း (Third Party) နှင့် ဖော်ထုတ်ရန် လမ်းညွှန်ခဲ့သည်။

လမ်းညွှန်ချက် အရမြန်မာနိုင်ငံ လေယာဉ်မတော်တဆ ထိခိုက်မှု စုံစမ်းစစ်ဆေးရေးဌာန Myanmar Accident Investigation Bureau-MAIB ၏ ဒုတိယညွှန်ကြားရေးမှူး ဦးအောင်မော်မှတစ်ဆင့် ဆက်သွယ်ခဲ့သည့် Australian Transportation Safety Bureau (ATSB), Australia ၊ Komite National Kedeiamatam Transportasi (KNKT), Indonesia နှင့် Transport Safety Investigation Bureau (TSIB), Singapore စသည့် အဖွဲ့အစည်းများ အနက် MAIB-Myanmar က (ATSB), Australia အား တတိယ အဖွဲ့အစည်းအဖြစ် ရွေးချယ်သတ်မှတ် နိုင်ရေး ၂၀၁၇ ခုနှစ်၊ ဇွန် ၂၁ ရက်တွင် ကမ်းလှမ်းခဲ့သည်။ (ATSB), Australia ကဖြစ်စဉ် ဖြစ်ပွား ခဲ့သော လေယာဉ်သည် တပ်မတော်ပိုင် လေယာဉ် ဖြစ်သည့်အတွက် ၎င်းတို့နှင့် အလားတူ စစ်ဘက်ဆိုင်ရာ အဖွဲ့အစည်းဖြစ်သော Directorate of Defence Aviation and Air Force Safety (DDAAFS ဆက်သွယ် ဆောင်ရွက်ပါရန် အကြောင်းပြန်ကြား ခဲ့သဖြင့် အဆိုပါအဖွဲ့အစည်းနှင့် ဆက်သွယ်ဆောင်ရွက် ခဲ့ပါသည်။

FDR နှင့် CVR တို့မှ အချက်အလက်များ ရယူနိုင်ရေး ဆောင်ရွက်ရာတွင် တပ်မတော် (လေ)မှ ဗိုလ်မှူးချုပ်ထင်လင်း၊ ဒုတိယဗိုလ်မှူးကြီး ဇော်လင်းအောင်တို့ အပါအ၀င် ကျွမ်းကျင်ပညာရှင်များ ပါဝင်သည့် ကိုယ်စားလှယ်အဖွဲ့၊ (MAIB) မှ ဒုတိယ ညွှန်ကြားရေးမှူး ဦးအောင်မော်၊ (DDAAFS-Australia) မှ Investigator ဖြစ်သော Maj. David Andrew Wade ၊ Mr. David Hilton တို့ပါသော ကိုယ်စားလှယ် အဖွဲ့တို့ဖြင့် ပူးပေါင်းစုံစမ်းစစ်ဆေး ဖော်ထုတ်ရေး အဖွဲ့ကို ဖွဲ့စည်းခဲ့ပြီး ယင်းအဖွဲ့နှင့် တရုတ်နိုင်ငံ China National Aero-Technology Import & Export Corporation (CATIC) ကုမ္ပဏီမှ ကိုယ်စားလှယ် အဖွဲ့တို့သည် ၂၀၁၇ ခုနှစ်၊ ဇွန် ၃၀ ရက်တွင် ရန်ကုန်မြို့၌ တွေ့ဆုံဆွေးနွေး ခဲ့ကြသည်။

အဆိုပါပူးပေါင်းစုံစမ်း စစ်ဆေးဖော်ထုတ်ရေး အဖွဲ့သည် တရုတ်နိုင်ငံ၊ စီအန်း (Xian) သို့ ၂၀၁၇ ခုနှစ်၊ ဇူလိုင် ၅ ရက်တွင် ရောက်ရှိခဲ့ပြီး ဇူလိုင် ၆ ရက်နေ့တွင် FDR နှင့် CVR တို့မှ အချက်အလက်များကို Download ပြုလုပ်မှု ပြီးစီးခဲ့သည်။ ထိုရရှိသော အချက်အလက်များကို သမားရိုးကျ ကွန်ပျူတာဖြင့် ဖတ်နိုင်မည့် Readable Format အဖြစ် ပုံစံပြောင်း၍ ရရှိအချက်အလက် များအား ဇူလိုင် ၇ ရက်တွင် (OEM) ဖြစ်သည့် Aviation Industry Corporation of China (AVIC) Qianshan Avionis Co., ltd. ထံမှလွှဲပြောင်း ရယူခဲ့သည်။ ထို့ပြင် CVR မှ ရရှိသော လေယာဉ်သားများ အချင်းချင်း ဆက်သွယ် ပြောဆိုမှုများကို အကြိမ်ကြိမ် နားထောင်၍ မှတ်တမ်းတင်ခဲ့ပြီး ဇူလိုင် ၈ ရက်မှ ၁၄ ရက်အထိ ပဏာမစိစစ် သုံးသပ်ဖော်ထုတ် ခြင်းများ အပါအ၀င် အသေးစိတ်စိစစ် သုံးသပ်ခြင်းများ ဆောင်ရွက်ခဲ့သည်။

FDR မှတ်တမ်းများအရ ဒေသစံတော်ချိန် ၁ နာရီ ၃၂ မိနစ် ၁၈ စက္ကန့်အထိ လေယာဉ်၏ စက်အစိတ်အပိုင်းများ ချို့ယွင်းမှု မရှိကြောင်း စစ်ဆေးတွေ့ရှိ ရပါသည်။ ထို့အပြင် FDR နှင့် CVR မှတ်တမ်းအရ မြိတ်လေဆိပ်မှ ရန်ကုန်လေဆိပ်သို့ ခရီးလမ်းတစ်လျှောက် လေတိုက်နှုန်းသည် တစ်နာရီနော့တီကယ် ၉ မိုင် (၁၆.၇ ကီလိုမီတာ) မှ ၄၄ မိုင် (၈၁.၅ ကီလိုမီတာ) အထိ တဖြည်းဖြည်း အားပြင်းလာခဲ့ကြောင်း တွေ့ရှိရသည်။ လေယာဉ်၏ ၀ဲ/ယာနှစ်ဖက် စလုံးရှိ Pitot အပူပေး စနစ်ကိုဖွင့်၍ တိမ်ထုကို ထိုးဖောက်ရန် ပြင်ဆင်ခြင်းများ ဆောင်ရွက်ခဲ့ကြောင်း၊ ဒေသစံတော်ချိန် ၁ နာရီ ၃၀ မိနစ် ၁၈ စက္ကန့်မှ ၁ နာရီ ၃၁ မိနစ် ၂၂ စက္ကန့်အထိ အချိန်တိုကာလ အတွင်း လေယာဉ်၏ အင်ဂျင်လေ၀င်ပေါက် ရေခဲသည့် အချက်ပြမီး ထွက်ပေါ်ခဲ့ကြောင်း၊ ဒေသစံတော်ချိန် ၁ နာရီ ၃၁ မိနစ် ၅၀ စက္ကန့် မှ ၁ နာရီ ၃၂ မိနစ် ၁၀ စက္ကန့်အတွင်း လေယာဉ်၏ ၀ဲဘက်ကိုယ်ထည် ခြမ်းသို့ (Cross Wind) ၉၀ ဒီဂရီတည့်တည့်မှ ခန့်မှန်း လေတိုက်နှုန်းသည် တစ်နာရီ နော့တီကယ် ၉ မိုင် (၁၆.၇ ကီလိုမီတာ) မှ ၄၈ မိုင် (၈၈.၉ ကီလိုမီတာ) အထိ လေတိုက်ခတ်မှု ခံခဲ့ရာ (Cross Wind) ကြောင့် လေယာဉ် ဦးတည်ရာ လမ်းကြောင်း မှသွေဖည်ခြင်း (Drift Angle) မှာ ၃ ဒီဂရီမှ ၁၅.၈ ဒီဂရီအထိ တိုးမြှင့်လာခဲ့ကြောင်း၊ လေယာဉ်သည် ရုတ်ချည်း ပြောင်းလဲနေသော ပုံမှန်မဟုတ်သည့် ရာသီဥတုတွင် ပျံသန်းခဲ့ရကာ ဘေးတိုက် လေတိုက်နှုန်းမှာ လည်း အရှိန်ပြင်းသည့် အနေအထားကို တွေ့ရှိရကြောင်း၊ ၎င်းအခြေအနေသည် ပုံမှန်ရှိရမည့် ပမာဏထက် stall speed ကို ပိုမိုမြင့်တက် စေသဖြင့် လေယာဉ်ကို ထိန်းချုပ် မောင်းနှင်နိုင်သည့် အခြေအနေ မရှိတော့သည့် အဓိက အကြောင်းအရင်း ဖြစ်ကြောင်း စိစစ်တွေ့ရှိ ရသည်။

FDR နှင့် CVR တို့မှ ရရှိသည့် အချက်အလက်များ၊ မိုးလေ၀သ သတင်းပို့ချက်များအရ လေယာဉ်မတော်တဆ ဖြစ်ပွားမှု ဖြစ်စဉ်သည် လေယာဉ်ပျံသန်းရာ၌ ဆိုးရွားသော ရာသီဥတုနှင့် ကြုံတွေ့ရစဉ် lost control ဖြစ်ပေါ် ခဲ့မှုကြောင့် Stall (လေယာဉ်ပင့်အား ဆုံးရှုံးမှု) ၀င်၍ Spin (လေယာဉ်ဦးစိုက် လည်ကျမှု) ဖြစ်ပေါ်ခဲ့သည့် အတွက် pilot က ထိန်းချုပ်မောင်းနှင်နိုင်သည့် အခြေအနေသို့ ပြန်လည်ရောက်ရှိခြင်း မရှိတော့ဘဲ လေယာဉ် မတော်တဆမှု ဖြစ်စဉ်ဖြစ်ပွား ခဲ့ရခြင်း ဖြစ်ကာ ဆိုးရွားသော ရာသီဥတုတွင် အပေါ်စီးမှ လေဖိ၍တိုက်ခြင်း၊ အောက်မှပင့်၍ တိုက်ခြင်းနှင့် ရေခဲမှု ဖြစ်ပေါ်ခြင်း စသည့် အတိအကျ မခန့်မှန်းနိုင်သော ရာသီဥတု အခြေအနေများလည်း ပါဝင်နိုင်ကြောင်း သုံးသပ်ဖော်ထုတ် ရရှိကြသည်။

သို့ဖြစ်၍ ရာသီဥတုဆိုးရွားမှု နှင့်ပတ်သက်၍ Vertical Wind ၊ Downburst နှင့် Icing ဖြစ်နိုင်မှုများကိုပါ ထည့်သွင်း တွက်ချက်ရန် လိုအပ်ကြောင်းကို ပူးပေါင်းစုံစမ်း စစ်ဆေးရေးအဖွဲ့၏ Minutes of Meeting တွင် ဖော်ပြထား သဖြင့် CATIC အနေဖြင့် China National Meterologic Center မှ ဖော်ပြပါ ပုံပါအတိုင်း Three Strong Cumulonimbus Cloud အတွင်း ၀င်ရောက်ခြင်းကြောင့် အင်အားပြင်း လေပင့်အားနှင့် လေဖိအားများ ကိုဖြစ်ပေါ် စေသည့် လေ၀ဲကတော့များနှင့် ကြုံတွေ့နိုင်ခြင်း၊ လျှပ်စီးမုန်တိုင်း ခံရနိုင်ခြင်း၊ ကြီးမားသည့် အေးခဲရေမှုန်၊ ရေခဲမှုန်များ လေယာဉ်ကိုယ်ထည်သို့ ကျရောက် ကပ်ငြိနိုင်ခြင်း၊ လေထန်ခြင်း၊ ပြင်းထန်သည့် ဆီးနှင်းမိုးရွာခြင်း အပါအ၀င် အောက်သို့ အရှိန်ပြင်းထန်စွာ တိုက်ခတ်သော လေစီးကြောင်း၏ ရိုက်ခတ်မှုနှင့် မိုးသည်းထန်စွာ ရွာသွန်းခြင်း (Downburst) စသည်ဖြင့် ကြုံတွေ့နိုင်ကြောင်း တို့အား သုံးသပ်ချက် ပေးပို့သည့် နည်းတူ CNN မှလည်း Downburst နှင့် ပတ်သက်၍ ဖြစ်နိုင်ဖွယ် ရှိကြောင်း ကြေညာထားသည်ကို တွေ့ရှိ ရပါသည်။

ဖြစ်စဉ်နှင့် ပတ်သက်ပြီး FDR နှင့် CVR တို့အား စိစစ်ဖော်ထုတ်သည့် Australian ပညာရှင်များ ပါဝင်သည့် Third Party အဖွဲ့အစည်းသည် International Civil Aviation Organization(ICAO) Annex 13 နှင့်အညီ ဆောင်ရွက်ခဲ့ခြင်း ဖြစ်ပြီး တပ်မတော် သယ်ယူပို့ဆောင်ရေး (Y-8 F 200 W) လေယာဉ်ပျက်ကျ ရခြင်းသည် မသမာမှုတစ်ခုခုကြောင့် သော်လည်းကောင်း၊ ပေါက်ကွဲစေတတ်သော ပစ္စည်းတစ်ခုခုကြောင့် သော်လည်းကောင်း ၊ လေယာဉ်အင်ဂျင် ချို့ယွင်းရပ်တန့်မှု ကြောင့်သော် လည်းကောင်း ပျံသန်းစဉ် ပျက်ကျခဲ့ခြင်း မဟုတ်ဘဲ ဆိုးရွားသည့် ရာသီဥတုနှင့် ကြုံတွေ့ခဲ့ရပြီးနောက် lost control ဖြစ်ပေါ်ခဲ့၍ လေယာဉ်ပျက်ကျခဲ့ခြင်း ဖြစ်ကြောင်း ထုတ်ပြန် အပ်ပါသည်။

တပ်မတော်သတင်းမှန်ပြန်ကြားရေးအဖွဲ့

#Themyawadydaily

No comments:

Post a Comment

Related Posts Plugin for WordPress, Blogger...