ပေါင် ၂၃-၇-၂ဝ၁၈
မွန်ပြည်နယ် ပေါင်မြို့နယ်တွင် ယနေ့နံနက်ပိုင်းက လေပြင်းတိုက်ခတ်မှုကြောင့် ဓာတ်တိုင်များပြိုလဲပြီး နေအိမ်များပြိုကျ ပျက်စီးခဲ့ကြောင်း ပေါင်မြို့နယ် အထွေထွေအုပ်ချုပ်ရေး ဦးစီးဌာနမှ သိရသည်။
လေပြင်း တိုက်ခတ်မှုကြောင့် ထိခိုက်ပျက်စီးသွားသော နေရာများတွင် ပေါင်မြို့နယ်အတွင်းရှိ သဘာဝဘေး ကယ်ဆယ်ရေး အဖွဲ့များ၊ လျှပ်စစ်ဌာန၊ အရန်မီးသတ် တပ်ဖွဲ့ဝင်များ၊ ပြည်သူများက ပူးပေါင်းကူညီ ဆောင်ရွက် ပေးလျက်ရှိကြောင်း သိရသည်။
ထိုသို့ လေပြင်းတိုက်ခတ်မှုကြောင့် နေအိမ်ပြိုကျ သွားသော မိသားစုအတွက် နီးစပ်ရာဆွေမျိုး များအိမ်တွင် နေထိုင်နိုင်ရေး စီစဉ်ပေးထားပြီး ပျက်စီးထိခိုက်သွားသော နေအိမ်များအတွက် ကူညီပံ့ပိုးပေးနိုင်ရေး သက်ဆိုင်ရာ အဖွဲ့အစည်းများနှင့် ချိတ်ဆက်ဆောင်ရွက် နေကြောင်း သိရသည်။
"ဖြစ်တာက ဒီနေ့နံနက် ၃ နာရီ လောက်ကစဖြစ်တာ။ လေပြင်းတွေ တိုက်လာပြီး သစ်ပင်တွေလဲတော့ ဓာတ်တိုင်တွေပေါ်ကျလို့ ဓာတ်တိုင်လဲတာတွေ၊ အိမ်ပြိုတာတွေ၊ အမိုးလန်တာတွေ၊ ဆွမ်းစားကျောင်း ဆောင်ပြိုတာတွေ ဖြစ်ပေါ်ခဲ့တယ်။ သက်ဆိုင်ရာဌာနတွေ အားလုံးပူးပေါင်းပြီးတော့ ထိခိုက်ပျက်စီး သွားတဲ့နေရာတွေမှာ ရှင်းလင်းရေး ကူညီကယ်ဆယ်ရေး လုပ်ငန်းတွေ ဆောင်ရွက် ပေးနေပါတယ်"ဟု ပေါင်မြို့နယ် အုပ်ချုပ်ရေးမှူး ဦးဇော်မိုးအောင်က ပြောပြသည်။
လေပြင်း တိုက်ခတ်မှုကြောင့် ပေါင်မြို့နယ် ကျွဲခြံကျေးရွာတွင် နေအိမ်တစ်လုံး အမိုးလန်၊ သစ်ပင် လဲကျမှုကြောင့် ဓာတ်တိုင်သုံးတိုင်ပြိုလဲ၊ ဆွမ်းစားဆောင် တစ်ဆောင် ပြိုကျခဲ့ပြီး ရင်းငြိမ်ကျေးရွာအုပ်စု ရွာတန်းရှည်ကျေးရွာတွင် နေအိမ်တစ်လုံး ပြိုကျ၊ နေအိမ်သုံးလုံး အမိုးလန်၊ ဘဲခြံတစ်ခြံနှင့် တဲအိမ်နှစ်လုံး ပြိုကျပျက်စီးခဲ့သည့် အတွက်စုစုပေါင်း ပျက်စီးဆုံးရှုံးမှု ကာလတန်ဖိုးငွေကျပ် ၂၅သိန်းခန့်ဟု ခန့်မှန်းထားကြောင်း ပေါင်မြို့နယ် အထွေထွေအုပ်ချုပ်ရေး ဦးစီးဌာနမှ သိရသည်။
#Themyawadydaily
No comments:
Post a Comment