မန္တလေး ၊ ၂၅-၄-၂၀၁၇
ဧရာဝတီလင်းပိုင် ထိန်းသိမ်းရေး ဧရိယာ မန္တလေး-ကျောက်မြောင်း ထိ ယခုလအတွင်း စစ်တမ်း ကောက်ယူမှုလုပ်ငန်း ပြန်လည်စတင် သွားမည်ဖြစ်ကြောင်း မန္တလေးတိုင်း ဒေသကြီး ငါးလုပ်ငန်းဦးစီးဌာန ဧရာဝတီ လင်းပိုင် ထိန်းသိမ်း စောင့်ရှောက်ရေး အဖွဲ့မှ တာဝန်ရှိသူ တစ်ဦးက ပြောပြ၍ သိရသည်။
ဧရာဝတီမြစ် အတွင်း၌ မေလမှစ၍ ငါးသားပေါက် ရာသီလည်းဖြစ်သည့် အပြင် ဧရာဝတီ လင်းပိုင်များလည်း သားပေါက်ဖွားမှု ရှိ၊ မရှိ ထိန်းသိမ်းရေး ဧရိယာအတွင်း ပုံမှန်ခရီးစဉ် အဖြစ် စစ်တမ်း ကောက်ယူမည့် လုပ်ငန်းကို ယခုလအတွင်း လုပ်ဆောင်သွားမည် ဖြစ်သည့်အပြင် ၄င်း ထိန်းသိမ်းရေး ဧရိယာအတွင်းရှိ ကျေးရွာများ ကိုလည်း အသိပညာပေး လုပ်ငန်းများ ကိုပါ တစ်ပါတည်း လုပ်ဆောင် သွားမည် ဖြစ်ကြောင်း သိရသည်။
ဧရာဝတီလင်းပိုင် ထိန်းသိမ်းရေး ဧရိယာအတွင်း၌ လင်းပိုင် သားပေါက်ဖွားမှု ရှိ၊ မရှိကို စစ်ဆေးရာတွင် ၂ဝ၁၄ ခုနှစ် မေလအတွင်း၌ သာ လင်းပိုင် သားပေါက် သုံးကောင်ထိ သားပေါက်ဖွား ခဲ့သည်ကို တွေ့ရှိခဲ့ ရပြီးနောက် စစ်တမ်း ကောက်ယူရာတွင် အနည်းဆုံး လင်းပိုင်သားပေါက် တစ်ကောင်ခန့်သာ နှစ်စဉ်တွေ့မြင် ခဲ့ရကြောင်း၊ ယခုလအတွင်း စစ်တမ်း ကောက်ယူမည့် ခရီးစဉ်တွင် ထိန်းသိမ်းရေး ဧရိယာအတွင်း လင်းပိုင် သားပေါက် နှစ်ကောင်ခန့်ထိ ပေါက်ဖွား နေနိုင်ကြောင်း သိရသည်။
ဧရာဝတီမြစ်ကြောင်း တစ်လျှောက်တွင် ယခုနှစ် ဖေဖော်ဝါရီလ အတွင်းက လင်းပိုင် ထိန်းသိမ်းရေး ဧရိယာအတွင်းနှင့် ထိန်းသိမ်းရေး ဧရိယာပြင်ပ ဗန်းမော်ဘက်သို့ စစ်တမ်း ကောက်ယူမှုခရီးစဉ် လုပ်ဆောင်ခဲ့ရာ စုစုပေါင်း လင်းပိုင် အကောင်ရေ ၆၉ ကောင် ထိတွေ့ရှိခဲ့ကြောင်း၊ ယခုလက်ရှိ မန္တလေး- ကျောက်မြောင်း ပုံမှန်ခရီးစဉ် တွင်လည်း လင်းပိုင် သားပေါက်များ ထပ်မံတွေ့ရှိ နိုင်ကြောင်း၊ ယခုလက်ရှိ အချိန်တွင်လည်း ထိန်းသိမ်းရေး ဧရိယာအတွင်း၌ လင်းပိုင် အကောင်ရေ ၂၅ ကောင်ကို ထိန်းသိမ်း ထားကြောင်း သိရသည်။
ထို့ပြင် မန္တလေး- ကျောက်မြောင်း ခရီးစဉ်ပြီးဆုံး ပါက ဗန်းမော်နှင့် ကသာဘက်သို့ ထိန်းသိမ်းရေး ဧရိယာတိုးချဲ့ နိုင်ရန်အတွက် ပညာပေး လုပ်ငန်းများ အရှိန်အဟုန် မြှင့်တင်ကာ လုပ်ဆောင်သွားမည် ဖြစ်သည့်အပြင် မေလမှစ၍ ငါးရစ်ငါးသန် ကာလ ငါးသားပေါက် ရာသီတွင် ငါးဖမ်းဆီးသူများ မရှိစေရေး အတွက် ပညာပေးလုပ်ငန်း များလည်း လုပ်ဆောင်သွားမည် ဖြစ်ကြောင်း သိရသည်။
ရတနာပုံနေ့စဉ်သတင်းစာ ၊ စာ(၃)
No comments:
Post a Comment