အစာကို အချိန်မှန်စားခြင်းဖြင့် အစာအိမ်ရောဂါမှ ကာကွယ်နိုင်
ကြည်လွင်မြင့် (မုဒြာ)
''အစာကို အချိန်မှန်စားသူ အတွက် အစာကြေဆေးမလိုပါ'' ဟူသော စကားရှိသည်။ လူတစ်ဦးသည် ပုံမှန်အားဖြင့် တစ်နေ့သုံးကြိမ် အစာစားရန် လိုအပ်သည်။ အချိန်အားဖြင့် နံနက် ၆ နာရီမှ ၈ နာရီအတွင်း နံနက်စာ၊ နံနက် ၁၁ နာရီမှ မွန်းလွဲ ၁ နာရီအတွင်း နေ့လယ်စာ၊ ညနေ ၆ နာရီမှ ည ၈ နာရီအတွင်း ညနေစာစားနိုင်လျှင် အသင့်လျော်ဆုံး ဖြစ်သည်။ ထိုအချိန်ထက် နောက်ကျသော ညဥ့်စာသည် အပုပ်စာဟု ခေါ်သဖြင့် ရောဂါဖြစ်စေနိုင်သည်။
အစာအိမ်ရောဂါ မှန်သမျှသည် အစာမကြေခြင်းမှ စသည်။ အစာမကြေခြင်း သည်လည်း အစာစားချိန် မမှန်ခြင်းမှ စသည်။ အစာခြေရည် ထွက်သောအချိန်၊ တစ်နည်းအားဖြင့် ဝမ်းမီးတောက်သော အချိန်တွင် အစာမစားရဘဲ နောက်ကျမှ စားသောအခါ ဝမ်းမီးအားနည်း သွားသဖြင့် အစာမကြေ ဖြစ်ရသည်။ ရောဂါမှန်သမျှသည် အစာမကြေခြင်း မှစသည်ဟု ဆိုသဖြင့် နောက်ဆက်တွဲ ရောဂါ အမျိုးမျိုး ဝင်လာနိုင်သည်။
အစာမကြေခြင်းကြောင့် ဖြစ်လေ့ရှိသော နောက်ဆက်တွဲရောဂါ များမှာ အစာအိမ် ရောင်ခြင်း၊ အစာအိမ်အနာ ဖြစ်ခြင်း၊ အစာအိမ်မှ အထွက် အူသိမ်ဦးပိုင်းတွင် အနာဖြစ်ခြင်း၊ ထို့ထက်ဆိုးလျှင် အစာအိမ်နှင့် အူများတွင် သွေးယိုခြင်း၊ သွေးကြော စိမ့်ပေါက်ခြင်း တို့ဖြစ်နိုင်သည်။
ကျောင်းသား၊ ကျောင်းသူများနှင့် ရုံးဝန်ထမ်းများသည် အချိန်မှန် ထမင်းစားချိန် ပေးထားသဖြင့် အစာအိမ်ရောဂါ အဖြစ်နည်းသည်။ အရောင်းအဝယ် အသွားအလာများ သူများမှာ အရောင်းအဝယ် ပါးချိန်၊ အလုပ်အားလျှင် အားသလို ထမင်းစားကြ ရသဖြင့် အချိန်မှန်မစားနိုင် ကြပေ။ အချို့ဈေးရောင်းသူ များမှာ နေ့လယ်စာကို မွန်းလွဲ ၂ နာရီ၊ ညနေ ၃ နာရီခန့်မှ စားကြရသူများ ရှိကြသည်။ ထိုအခါ စားချိန်လွန် နေသဖြင့် အစာအိမ်မှ အစာချက် အားနည်းပြီး အစာအိမ်ရောဂါ ရလာနိုင်သည်။ ဆာချိန်က မစားရဘဲ မဆာသောအချိန်မှ စားရခြင်း ကြောင့်လည်း အစာအိမ်ရောဂါ ရနိုင်သည်။
'မဆာက မစားရ' ဟူသော ရှေးမြန်မာ လူကြီးများ ဆိုစကားရှိသည်။ လှုပ်ရှားမှု မရှိဘဲ ငြိမ်သက်သော အလုပ်ကို ထိုင်လုပ်နေပြီး မဆာဘဲ ပါးစပ်မှတရစပ် စားနေလျှင်လည်း အစာအိမ်ရောင် ရောဂါ ဖြစ်နိုင်သည်။
ယခုခေတ်တွင် ဂိမ်းဆိုင်ထိုင်ပြီး တစ်နေကုန် ကစားနေသူ လူငယ်များ၊ အင်တာနက်နှင့် အချိန်ကုန်နေသူ များတွင် အစာအိမ်ရောဂါ အမျိုးမျိုးနှင့် ဆီးချုပ်၊ ဝမ်းချုပ်ရောဂါတို့ ဖြစ်ပွားနေသည် ကိုတွေ့ရှိရသည်။ အချို့ လူငယ်များသည် အင်တာနက်ဆိုင် တွင်ထိုင်ရင်း အစားအသောက် မှာစားကာ ထိုင်ရာမထ စားသောက်တတ် ကြသည်။ တက်ကြွ လှုပ်ရှားရမည့် အရွယ်တွင် အထိုင်များခြင်း သည် မကောင်းပေ။
အချိန်ကို မျှတအောင် အသုံးချတတ်မှသာ လူတော်လူကောင်း ဖြစ်နိုင်ပေသည်။ အစာစားချိန် မမှန်သူများ၊ အစာမကြေ သူများ၏ နောက်ဆက်တွဲ ဒုက္ခမှာ ဝမ်းချုပ်ခြင်းပင် ဖြစ်သည်။ ဝမ်းချုပ်သူ များ၏ နောက်ဆက်တွဲ ရောဂါမှာ ဝမ်းညှစ်ရဖန်များ သဖြင့် စအိုဝသွေးကြောများ ရောင်လာပြီး လိပ်ခေါင်းရောဂါ ဖြစ်ရခြင်းဖြစ်သည်။ လိပ်ခေါင်းရောဂါ မှာ စောစောသိလျှင် ဝမ်းမှန်အောင် ပြင်ရုံနှင့် ပျောက်ကင်းနိုင် သော်လည်း နောက်ကျသွားလျှင်၊ မကုဘဲနေလျှင် ခွဲစိတ်ကုသ ရသော အဆင့်သို့ ရောက်သွား နိုင်သည်။
အစာကို အချိန်မှန် မစားနိုင်သူများ အတွက် အချိန်လွန်သွားမှ စားရလျှင် များစွာမစားဘဲ လျှော့စားခြင်းဖြင့် အစာအိမ်ရောင် ခြင်းကို ကာကွယ်နိုင်သည်။ အချိန်လွန်မှ စားရလျှင် ထမင်းမစားဘဲ အရည်သောက် ပါသော ခေါက်ဆွဲပြုတ်၊ ဆန်ပြုတ်၊ အသီးဖျော်ရည်၊ အသားကိုနူးအောင် ပြုတ်ထားသော စွပ်ပြုတ်၊ ဖက်ထုပ်ပြုတ်၊ ကြက်ပေါင်းရည်၊ ငါးပေါင်း စသော နူးညံ့သော အစာကြေလွယ်သော အစာမျိုးကိုသာ စားသောက်သင့် ပေသည်။
မြ၀တီနေ့စဉ်သတင်းစာ ၊ စာ(၈)
No comments:
Post a Comment