ပါးရွဲ့ရောဂါ သတိပြုစရာ
ကြည်မြင့်လွင် (မုဒြာ)
ယမန်နေ့က အသက်ခြောက်နှစ် အရွယ် မိန်းကလေးငယ် တစ်ဦး ပါးရွဲ့၍ ဆေးခန်း လာပြသည်။ ပါးရွဲ့ ဆိုသည်မှာ သွေးတိုးနှင့် အအေးမိ၍ လေဖြတ်သော အသက်အရွယ် ကြီးသူများ တွင်သာ ဖြစ်လေ့ရှိ သဖြင့် ဤမျှ အသက်ငယ်သော ကလေးအရွယ် တွင် ဖြစ်ရသည်မှာ အလွန်ရှား သည်။
ကလေးငယ် ပါးရွဲ့ရခြင်း အကြောင်းအရင်း ကို မေးမြန်းကြည့် သောအခါ ထိုသို့မဖြစ်မီ အရင် တစ်နေ့က နေအလွန် ပူပြင်းချိန် မွန်းလွဲ ၂ နာရီခန့်တွင် ခေါင်းမှလောင်းပြီး ရေချိုးသည်။ ပူလွန်း၍ ရေချိုးသည် ဟု ဆိုသည်။ ထို့နေ့ ညနေပိုင်းတွင် ရေသန့် ရေခဲထုပ် ဝယ်ပြီး ရေဖန်ခွက် ထဲတွင် ရေခဲတုံးလေးများ စိမ်သောက်သည်။ ရေပျော် သွားသော ရေခဲတုံး သေးသေးလေး များကို တကျွတ်ကျွတ် နှင့် ဝါးစားသည် ဟု ဆိုသည်။ ကလေး သဘာဝ ပူသောအခါ ရေခဲတုံး လေးများ ဝါးစားရခြင်း ကို အကြိုက်တွေ့ပုံ ရသည်။
အကျိုးဆက်မှာ နောက်တစ်နေ့ နံနက်ထပြီး ထမင်းစားသော အခါ ပါးစပ်တစ်ခြမ်းမှ ထမင်းစေ့များ ထွက်ကျသည်။ ရေသောက် လျှင် ရေထွက်ကျသည်။ သေချာကြည့်မှ ပါးတစ်ခြမ်း ရွဲ့နေမှန်း သိသည်။ ဘယ်ခြမ်းမှ ပါးရွဲ့လျှင် ဘယ်ဘက်သို့ ပါးကြော ဆွဲသွားလျှင် ဆန့်ကျင်ဘက် ညာဘက်မှ မျက်စိပွင့်ပြီး ကျယ်နေ တတ်သည်။ မျက်စိပိတ် ခိုင်းလျှင် ဘယ်ခြမ်းမှာ ပိတ်ရပြီး ညာဘက်မျက်စိ ပိတ်မရတော့။ တစ်ဝက် တစ်ပျက် ပွင့်နေတတ်သည်။ ညာဘက်ခြမ်း ပါးပြင် ကြွက်သား အလုပ် မလုပ်တော့။ ထို့ကြောင့် ဘယ်ခြမ်းမှ ဆွံ့အသွားခြင်း ဖြစ်သည်။ ညာခြမ်းပါး ကြွက်သား အလုပ်မလုပ် (ခေတ္တ သေသွားခြင်း ကြောင့်) ဘယ်ဘက်သို့ ဆွဲသွားသည်ကို အချို့က မသိ နားမလည် သဖြင့် ဘယ်ပါးတွင် သံပုရာသီး၊ ရှောက်သီးဖြင့် လှိမ့်ကြသူများ ရှိသည်။ ကောင်းနေသည့် ဘယ်ဘက်ပါး၊ ကြွက်သားပါ ရောင်ပြီး ပါးစပ်မဟ နိုင်သည် ထိ ဖြစ်ရသည်ကို တွေ့ဖူးသည်။ ဆရာ မညွှန်ကြားဘဲ အလွန် မလုပ်ကြရန် လိုသည်။
လူကြီးများတွင် သွေးတိုးကြောင့် လေဖြတ်သော အခါ ပါးပါရွဲ့ သွားသည်ကို တွေ့ရသည်။ အချို့မှာ လျှာပါစောင်းရွဲ့ သွားသဖြင့် စကားမပီတော့ ဗလုံးဗထွေး ဖြစ်သွားသည်ကို တွေ့ရသည်။ ညာခြမ်း လေဖြတ်လျှင် ဤသို့ ဖြစ်တတ်သည်။ ဦးနှောက် ဘယ်ဘက် အခြမ်းသည် ခန္ဓာကိုယ် ညာဘက်အခြမ်း လှုပ်ရှားမှု အပြင် စကားပြောသည့် အာရုံကြော ကိုပါ ထိန်းချုပ်သည် ဟု ဆိုသည်။
အမျိုးသမီးငယ် များတွင် သွေးပေါ်ပြီး နောက်ဆုံး ရက်တွင် ခေါင်းလျှော်ရာမှ ပါးရွဲ့သည်ကို မကြာခဏ တွေ့ရသည်။ ခေါင်းလျှော်ရုံ သာမက ခေါင်းလျှော်ပြီး ပန်ကာလေ ခံသော မိန်းကလေး တစ်ဦးမှာ မျက်ကျယ်ပါးရွဲ့ (ခေါ်) မျက်စိတစ်ဖက် လုံးဝ ပိတ်မရသည့် ပါးရွဲ့ရောဂါ ဖြစ်သည်ကို တွေ့ရဖူးသည်။
လူငယ် ကျောင်းသားတစ်ဦး မှာလည်း ပူအိုက်၍ သမံတလင်း ပေါ်တွင် အဝတ်ပါးခင်း၍ အိပ်ရာ သမံတလင်းဘက် ကပ်အိပ်သည့် ပါးတစ်ခြမ်း ရွဲ့သွားသည်။ ထိုကဲ့သို့ပင် ပူအိုက်၍ တစ်ညလုံး ပန်ကာ ဖွင့်အိပ်သူ လူငယ်တစ်ဦး မှာလည်း ပန်ကာလေ ထိသည့် အခြမ်းမှ ပါးရွဲ့ သွားသည်ကို တွေ့ရသည်။
ကားပြတင်းပေါက် ဖွင့်အိပ်၍ လေတိုးခံရာမှ ပါးရွဲ့သူလည်း ရှိသည်။ ဆိုင်ကယ်စီးသူ များသည် လေတိုက်သည့် အခါ မျက်နှာကို ကာသည့် မှန်အုပ်ဆောင်း ပါသော ဆိုင်ကယ်စီး ဦးထုပ်ကို ဆောင်းခြင်းဖြင့် ကာကွယ်နိုင်သည်။
ခေါင်းတစ်ခြမ်း ကိုက်ခြင်း၊ ဇက်ထိုးခြင်း၊ အောက်မျက်ခမ်း၊ အထက်မျက်ခွံ မျက်စလှုပ်ခြင်း များမှာလည်း ပါးရွဲ့မည့် ရှေ့ပြေး လက္ခဏာများ ဖြစ်တတ်သဖြင့် သတိပြု သင့်သည်။ အောက်မျက်ခမ်း လှုပ်သဖြင့် ဗေဒင်နိမိတ်ကျမ်း ဖတ်ရှုနေသူ မိန်းကလေး တစ်ဦး ပါးရွဲ့သည်ကို တွေ့ဖူးသည်။
နားကလော်ခြင်း ကို ဇိမ်ခံသည့် အနေဖြင့် မကြာခဏ ပြုလုပ်ခြင်း ကြောင့်လည်း နားစည်နှင့် အောက်နားမှ အာရုံကြော ရောင်ပြီး ပါးရွဲ့သော ရောဂါလည်း ရှိသည်။ ပါးရွဲ့လျှင် ဆေးမြီးတို ဆေးနည်းတို့နှင့် ကု၍မရပါ။ တက်ကျွမ်းသော အကြောပြင်၊ အကြော အထူးကု သမားတော်နှင့် သာပြ၍ ကုသသင့် ပါသည်။
ရတနာပုံနေ့စဉ် ၊ စာ(၅)
No comments:
Post a Comment