မန္တလေး ၊ ၃-၁၁-၂၀၁၄
အောက်တိုဘာလ နောက်ဆုံး ပတ်မှစ၍ နိုင်ငံခြားငွေ လဲနှုန်း မြင့်တက် လာခဲ့ရာ ယခု လဆန်းပိုင်းတွင် တရုတ်နိုင်ငံထုတ် ကုန်ပစ္စည်း အချို့ ဈေးနှုန်းများ မြင့်တက် လာခဲ့ကြောင်း မန္တလေးဈေးချိုမှ ဆိုင်ခန်းရှင် များက ပြောပြသည်။ အထူးသဖြင့် စားသောက်ကုန် ပစ္စည်းများထက် စာလျှင် လူသုံးကုန် ပစ္စည်းများ ဈေးမြင့်နေခြင်း ဖြစ်ကြောင်း သိရသည်။ ဒေါ်လာဈေး စတင် ပြောင်းလဲချိန်မှ စ၍ အောက်တိုဘာ လကုန်ပိုင်း အထိ ဈေးနှုန်းများ တည်ငြိမ်မှု ရှိခဲ့သော်လည်း နိုဝင်ဘာ လဆန်းပိုင်းတွင် ပြည်ပသွင်းကုန် အုပ်စုမှ လူသုံးကုန် ပစ္စည်းများ ဈေးနှုန်း ၂ဝ ရာခိုင်နှုန်း အထိ မြင့်တက် လာခဲ့ကြောင်း ကုန်သည်များက ဆိုသည်။
ဒေါ်လာဈေးနှုန်းမှာ ယမန်နေ့တွင် ငွေကျပ် ၁ဝ၁၄ အထိရှိပြီး တရုတ်ယွမ်ဈေး မှာ လည်းငွေကျပ် ၇ဝ ခန့် ရောက်ရှိ နေသဖြင့် လတ်တလော ဝင်ရောက်မှု များပြားလျက် ရှိသည့် ဆောင်းရာသီ ထုတ် စောင်ထည် အမျိုးမျိုး၊ အနွေးအင်္ကျီ အမျိုးမျိုးနှင့် အိမ်သုံးပစ္စည်း အချို့ တက်ဈေးဖြင့် ဝယ်ယူ နေရကြောင်း သိရသည်။ ''စောင်ထည်တွေက ပြီးခဲ့တဲ့ နှစ်က နှစ်သောင်း ဝန်းကျင်ပဲ ရှိပေမယ့် ဒီနှစ်မှာတော့ သုံးသောင်းလောက် ဖြစ်နေတယ်။ ဈေးမြင့်ပေမယ့် ကိုရီးယား ဒီဇိုင်း ထုတ်ထားတဲ့ တရုတ်စောင် တွေက နှစ်စဉ် လူကြိုက်များတယ်။ ဒါကြောင့် ပစ္စည်းသစ်တွေ ဝင်နေပြီး ဈေးလဲမြင့်တယ် ... '' ဟု စောင်မျိုးစုံ အရောင်းဆိုင်ရှင် တစ်ဦး က ဆိုသည်။
ထို့အတူ ဒေါ်လာ၊ ယွမ်ဈေးများ နှင့်အတူ ထိုင်းဘတ်ငွေ လဲနှုန်း များမှာလည်း အနည်းငယ်စီ မြင့်တက်လျက် ရှိနေရာ ထိုင်းနိုင်ငံထုတ် ပစ္စည်းများ၏ ဈေးနှုန်း မှာလည်း ခန့်မှန်းရန် ခက်ခဲ နေသေးကြောင်း သိရသည်။ သို့သော် ဈေးကွက်တွင်း ၌ ကာလ အတန်ကြာ အရောင်းအဝယ် အေးစက် ခဲ့ခြင်းကြောင့် ကုန်သည်များမှာ လတ်တလော ကာလ အရောင်းအဝယ် သွက်လာချိန်တွင် ဈေးတက် ရောင်းချလိုခြင်း မရှိသဖြင့် လက်ကျန် ပစ္စည်းများကို မူလဈေး အတိုင်းသာ ရောင်းချမှု ပြုနေကြောင်း သိရသည်။
ဒေါ်လာဈေးနှင့် ပတ်သက်၍ တက်ရိပ်ပြ နေသော အခြေအနေတွင် ဆက်စပ်လျက် ရှိနေသော နိုင်ငံခြား ငွေကြေးများ၏ လဲလှယ်နှုန်းများ လိုက်လံမြင့်တက် နေခြင်းကြောင့် ကာလ အတန်ကြာ ငြိမ်သက် နေသော ကုန်ဈေးနှုန်း မှာလည်း အခြေအနေ စောင့်ကြည့်လျက် ရှိနေကြောင်း ကုန်သည်များက သုံးသပ် ပြောဆိုကြသည်။ ဒေါ်လာဈေး၏ အခြေအနေမှာ အမေရိကန် နိုင်ငံ၏ စီးပွားရေး အခြေအနေ နှင့် ဆက်စပ်လျက် ရှိပြီး အမေရိကန် နိုင်ငံ၏ QE 3 စီမံကိန်း အောင်မြင်မှု နှင့် အမေရိကန်နိုင်ငံ စီးပွားရေး ခေါင်းထောင်လာမှု တို့ကြောင့် ဈေး ဆက်လက် မြင့်တက် နေဦးမည် ဖြစ်ကြောင်း နိုင်ငံတကာ စီးပွားရေး သုံးသပ်မှုများ အရ သိရှိရသည်။
လတ်တလော မန္တလေး ကုန်စည် ဈေးကွက်တွင်း၌ လက်ကျန် ပစ္စည်းများ ကိုသာ မူရင်း ဈေးနှုန်းဖြင့် ရောင်းချ နိုင်သော်လည်း ကုန်ပစ္စည်း အသစ်များကို ဖြစ်ပေါ်လျက် ရှိသည့် ဈေးနှုန်းများ အတိုင်း ရောင်းချဖွယ် ရှိနေကြောင်း ကုန်စည် ဈေးကွက်တွင်းမှ စုံစမ်း သိရှိရသည်။ (၁၇၂)
#Yadanarpondaily
#ရတနာပုံနေ့စဉ်
No comments:
Post a Comment