ကမ္ဘာပေါ်တွင် ဒုတိယ အမြင့်ဆုံးတံတား အဖြစ် သတ်မှတ်ခြင်း ခံခဲ့ရသည့်
ကမ္ဘာကျော် ဂုတ်ထိပ်တံတားကြီး နှစ်(၁၁၀) ပြည့်ပြီ
သက်နိုင်(ပြင်ဦးလွင်)
မြစ်ချောင်း များသည် တစ်ခါတစ်ရံ တွင် တစ်နေရာ၌ ငုပ်လျှိုး ကွယ်ပျောက် သွားပြီး အခြား တစ်နေရာ၌ ပြန်လည် ထွက်ပေါ်လာ၍ စီးဆင်း တတ်ကြသည်။ ရှမ်းပြည်နယ် (မြောက်ပိုင်း) ကျောက်မဲ မြို့နယ် တွင်လည်း " နမ်းပဆေး " မြစ်သည် ထိုသို့ မြေကြီးအတွင်း ငုပ်လျှိုး ကွယ်ပျောက် သွားပြီးမှ မြစ်ကြောင်း ပြန်လည် ဖြစ်ပေါ် စီးဆင်းသော နေရာကို " ငုပ်ထိပ် " ဟု ခေါ်ဆိုရာမှ ကာလ ကြာမြင့်သော အခါ " ဂုတ်ထိပ် " ဟု လူသိများ ခေါ်ဝေါ် လာကြသည်။
ထို ဂုတ်ထိပ် အနီးတွင် သစ်ပင် ချုံနွယ်များ ထူထပ် များပြားစွာ ပေါက်ရောက်လျက် ရှိပြီး အလွန် မတ်စောက်သော လျှိုကြီး များလည်း ရှိပေသည်။ အင်္ဂလိပ် တို့သည် ၁၈၅၂ ခုနှစ်တွင် အောက် မြန်မာနိုင်ငံ ကို သိမ်းယူခဲ့ပြီး ၁၈၇၄ ခုနှစ်တွင် ရန်ကုန် - ပြည် မီးရထားလမ်း ကို စတင် ဖောက်လုပ်ကာ ၁၈၇၇ ခုနှစ် မေလ ၁ ရက်တွင် စတင် ပြေးဆွဲ နိုင်ခဲ့သည်။ ၁၈၈၅ ခုနှစ်တွင် မြန်မာ တစ်နိုင်ငံလုံး ကို သိမ်းယူ၍ မီးရထားလမ်း များ ဆက်လက် ဖောက်လုပ် ခဲ့ရာ မန္တလေး - လားရှိုး မီးရထားလမ်း သည်လည်း တစ်ခု အပါအ၀င် ဖြစ်သည်။
အင်္ဂလိပ်တို့ ဖောက်လုပ်ခဲ့သော မီးရထားလမ်း များထဲတွင် မန္တလေး - လားရှိုးလမ်း နှင့် သာစည် - ရွှေညောင် လမ်းတို့သည် တောင်ကုန်း တောင်တန်း နှင့် လျှိုမြောင် ပေါများသော ကြောင့် ကုန်ကျစရိတ် မြင့်မားခဲ့ ရသည်။ထိုအထဲတွင် မန္တလေး - လားရှိုး လမ်းပေါ်ရှိ ဂုတ်ထိပ် တံတားကြီး ကိုလည်း ခက်ခက်ခဲခဲ ဖောက်လုပ် ခဲ့ရပြန်သည်။ တံတားကြီး တည်ဆောက်ရန် လိုအပ်သော ပစ္စည်းများကို အမေရိကန် နိုင်ငံ နယူးယောက်မြို့ မှ သင်္ဘောကြီး များဖြင့် သယ်ယူ ခဲ့ကြ ရသည်။
ဂုတ်ထိပ် တံတားကြီး သည် အခြားတံတား များနည်းတူ မြစ်ချောင်းများကို ကျော်ဖြတ် ဖောက်လုပ်သော တံတား မဟုတ်ဘဲ အလွန် မတ်စောက်သော လျှိုကြီး နှစ်ခုကို ဆက်သွယ် ဖောက်လုပ် ထားခြင်းပင် ဖြစ်သည်။ ဂုတ်ထိပ် တံတားကြီး သည် ပေ ၂၂၆၀ ရှည်လျားပြီး ပေ ၁၁၀၀ မြင့်သောကြောင့် ကမ္ဘာပေါ်တွင် ဒုတိယ အမြင့်ဆုံး တံတားအဖြစ် သတ်မှတ်ခြင်း ခံခဲ့ရသည်။ တံတားကြီး တည်ဆောက် ရာတွင် သံ နှင့် သံမဏိ တန်ချိန်ပေါင်း ၄၃၁၁ တန်ရှိပြီး ၊ အသုံးပြု ခဲ့ရသည့် သံမှိုပေါင်း မှာ အရေအတွက် အားလုံး ၁၀ သိန်း ရှိခဲ့သည်။
တံတားကြီး သည် နောင်ချို ဘူတာနှင့် ၇ မိုင်အကွာတွင် တည်ရှိပြီး နောင်ချိုမြို့နယ် နှင့် ကျောက်မဲမြို့နယ် တို့၏ နယ်နိမိတ် သတ်မှတ် ထားရာလည်း ဖြစ်သည်။ တံတားပေါ်တွင် မီးရထား တစ်မျိုးသာလျှင် သွားလာ နိုင်သည်။ ယခင်က တံတားပေါ်တွင် လေ့လာ ကြည့်ရှု သွားလာနိုင်ရန် ခွင့်ပြု ခဲ့သော်လည်း ယခုအခါ ထိုကဲ့သို့ ခြေကျင် လျှောက်ခြင်း မျိုးကို လုံခြုံရေး အရ ခွင့်ပြုခြင်း မရှိတော့ပေ။
ဂုတ်ထိပ် တံတားကြီး အောက် မနီးမဝေး တွင် အကွေ့အကောက် များစွာဖြင့် အလွန် လှပသော ဂုတ်တွင်း အဆင်း - အတက် လမ်းရှိသည်။ နောင်ချိုမြို့ မှ ကွေ့ကောက် ဆင်းလာပြီး နောက်ဆုံး ဂုတ်တွင်းတံတား ရောက်ရှိပါက နောင်ချိုမြို့နယ် ကုန်ဆုံးပြီး အတက်လမ်းသည် ကျောက်မဲမြို့နယ် တွင် ပါဝင် သွားသည်။ ထိုလမ်းပေါ်တွင် ကားကြီး ၊ ကားငယ် များနှင့် ဆိုင်ကယ်များ သွားလာ နိုင်ပြီး မန္တလေး - မူဆယ် ပြည်ထောင်စု လမ်းမကြီး ၏ အစိတ်အပိုင်း တစ်ခုလည်း ဖြစ်သည်။
ကမ္ဘာကျော် ဂုတ်ထိပ် တံတားကြီး ကို ၁၉၀၃ ခုနှစ်တွင် ဆောက်လုပ် ပြီးစီးခဲ့ရာ ယခုအခါ နှစ်ပေါင်း (၁၁၀) ပြည့်ပြီ ဖြစ်သည်။ တံတားကြီး သို့ ပြင်ဦးလွင် နှင့် မန္တလေးမြို့ တို့မှ မီးရထား ဖြင့် လည်းကောင်း ၊ ကားလမ်းမှ သော်လည်းကောင်း နေ့ချင်းပြန် သွားရောက် လေ့လာ လည်ပတ် နိုင်ပါကြောင်း နှင့် မြန်မာနိုင်ငံ ၏ လမ်းပန်း ဆက်သွယ်ရေး ကောင်းမွန် ချောမွေ့ စေရေး အတွက် နှစ်ပေါင်း (၁၁၀) တိုင်တိုင် တာဝန် ထမ်းဆောင် ပေးခဲ့သော ကမ္ဘာကျော် ဂုတ်ထိပ် တံတားကြီး ကမ္ဘာတည်သရွှေ့ မြန်မာ့ ဂုဏ်ဆောင်နိုင် ပါစေဟု ဆုတောင်း မေတ္တာ ပို့သအပ် ပါသည်။
No comments:
Post a Comment