ရင်းနှီးမြှုပ်နှံမှုအမျိုးမျိုးနှင့် လှုပ်ခတ်မှုများ
မြန်မာနိုင်ငံ၏ ပြည်တွင်း ရွှေဈေးနှုန်းသည် စက်တင်ဘာ ၂၆ ရက် ရန်ကုန် ဈေးကွက်၌ အကယ်ဒမီရွှေ တစ်ကျပ်သား အဖွင့်ဈေးနှုန်း ငွေကျပ် ၈၈၆၅ဝဝ နှင့် အပိတ်ဈေးနှုန်း ငွေကျပ် ၈၉၄ဝဝဝ ရှိပြီး အောင်သမာဓိ ရွှေဆိုင် ၁၆ ပဲရည် ရွှေဈေးနှုန်းမှာ အဖွင့် ငွေကျပ် ၈၈၆၅ဝဝ နှင့် အပိတ်ငွေကျပ် ၈၉၃ဝဝဝ ဖြစ်သည်။ ငွေလဲနှုန်းမှာ အမေရိကန် တစ်ဒေါ်လာလျှင် ဗဟိုဘဏ် ငွေလဲနှုန်း ငွေကျပ် ၁၂၃၅ ကျပ်၊ ပုဂ္ဂလိကဘဏ် ငွေလဲနှုန်း ငွေကျပ် ၁၂၄၃ ကျပ်မှ ၁၂၄၅ ကျပ်၊ ပြင်ပဈေးကွက် ငွေလဲနှုန်း ငွေကျပ် ၁၂၅၅ ကျပ်မှ ၁၂၅၉ ကျပ် ဖြစ်သည်။
စက်တင်ဘာ ၇ ရက် ရန်ကုန် ရွှေဈေးကွက်၌ ၁၆ ပဲရည် တစ်ကျပ်သားလျှင် ငွေကျပ် ၈၇၁ဝဝဝ၊ ငွေလဲနှုန်း အမေရိကန် တစ်ဒေါ်လာ လျှင် ငွေကျပ် ၁၂၁၄ ကျပ် ရှိခဲ့ရာမှ ပြည်တွင်းရွှေ ဈေးနှုန်းနှင့် ငွေလဲနှုန်းတို့ တက်လာခြင်း ဖြစ်သည်။ စက်တင်ဘာ ၂၆ ရက် ကမ္ဘာ့ ရွှေဈေးနှုန်းမှာ တစ်အောင်စလျှင် အမေရိကန်ဒေါ်လာ ၁၃၅၅ ဒေါ်လာ ဖြစ်ကြောင်း သိရသည်။ ရွှေဈေး တက်ရသည့် အကြောင်းရင်း များတွင် နိုင်ငံခြားငွေ လဲနှုန်း၊ ကမ္ဘာ့ ရေနံဈေးနှုန်း နှင့် ပြည်တွင်း အိမ်ခြံမြေ ဈေးနှုန်းတို့ ဆက်စပ်မှု ရှိကြောင်း စီးပွားရေး ပညာရှင်များက ထောက်ပြ ထားသည်။ အမေရိကန် နိုင်ငံ၏ စီးပွားရေးသည် ကမ္ဘာ့ငွေကြေး စနစ်အတွက် အခရာ ဖြစ်သည့် အတွက် အမေရိကန် နိုင်ငံ၏ စီးပွားရေး အပြောင်းအလဲ ဂယက်သည် ကမ္ဘာ့နိုင်ငံ များကို လှုပ်ခတ် စေကြောင်း သိရသည်။
ကမ္ဘာ့နိုင်ငံများမှ စီးပွားရေး သမားများသည် အမြတ်များများ ရနိုင်မည့် ရင်းနှီးမြှုပ်နှံမှု လုပ်ငန်းလုပ်ကိုင် ကြရာ၌ ရှိသမျှကြက်ဥ အားလုံးကို ခြင်းတောင်း တစ်ခုတည်းမှာ ထည့်မထားရ ဆိုစကား ကဲ့သို့ လုပ်ငန်းတစ်ခု တည်းမှာသာ ရင်းနှီးမြှုပ်နှံမှုမျိုး မဟုတ်ဘဲ တစ်ခုထက် ပိုသော လုပ်ငန်းများတွင် ရင်းနှီးမြှုပ်နှံ ထားကြရာ အတိုးရရှိမှု နည်းသော ငွေချေးစာချုပ် (Bond) ကို ဝယ်ယူခြင်း၊ စတော့ရှယ်ယာ ဈေးကွက်တွင် ရင်းနှီးမြှုပ်နှံခြင်း နှင့်အတိုးမရ သော်လည်း အရှုံးမရှိ နိုင်သော ရွှေကို ဝယ်ထားခြင်း စသည့် နည်းစနစ်များ ဖြင့် ရင်းနှီးမြှုပ်နှံ ကြသည်။ ဤသို့ တစ်ခုထက်ပို၍ ရင်းနှီးမြှုပ်နှံ ထားခြင်းဖြင့် တစ်ခု အရှုံးပေါ်လျှင် တခြားတစ်ခုက အမြတ်နှင့် ပြန်လည်ကာမိ နိုင်သည့် အခွင့်အလမ်း ရှိသည်။
မြန်မာနိုင်ငံ၏ ပြည်တွင်းရွှေ ဈေးနှုန်းမှာ အိမ်နီးချင်း နိုင်ငံများမှ တရုတ်ပြည်သူ့ သမ္မတနိုင်ငံ၊ ထိုင်းနိုင်ငံတို့၏ ရွှေဈေးနှုန်းနှင့် ဆက်စပ်လျက် ရှိသည်။ ယခုအချိန်တွင် ပြည်ပသို့ တရားဝင် ရွှေတင်ပို့ခွင့် ပြုရန် စီစဉ် နေကြောင်းလည်း သိရပြီး အိန္ဒိယနိုင်ငံ အတွင်းသို့ မြန်မာနိုင်ငံမှ ရွှေများကို တရားမဝင် ယူဆောင်လာသူ တစ်ဦးအား အိန္ဒိယ အစိုးရက ဖမ်းဆီး လိုက်သည့် သတင်း တွေ့ရသည်။
ကမ္ဘာ့နိုင်ငံ များတွင် ရွှေကို အသုံးချနည်း အမျိုးမျိုး ရှိကြရာတွင် ကျောက်မျက် ရတနာဖြင့် တွဲဖက်၍ လက်ဝတ်ရတနာ အဖြစ် အသုံးပြုမှု ၅ဝ ရာခိုင်နှုန်း ရှိပြီး ရင်းနှီးမြှုပ်နှံမှု အတွက် အသုံးပြုမှုနှင့် ဗဟိုဘဏ် များက ရွှေဝယ်ယူ စုဆောင်းမှုတို့ ဖြစ်သည်။ ၂ဝ၁၃ ခုနှစ် ကမ္ဘာ့နိုင်ငံများ အခြေအနေမှာ အိန္ဒိယ၊ တရုတ်နှင့် ဘရာဇီး နိုင်ငံတို့မှ အစိုးရ ဗဟိုဘဏ် များသည် အမေရိကန် ဒေါ်လာ စုဆောင်းမှုကို လျှော့ချပြီး ရွှေစုဆောင်း မှုများ လာသဖြင့် ယခင်က နိုင်ငံခြားငွေ အရန်အဖြစ် အမေရိကန် ဒေါ်လာကို ၈ဝ မှ ၉ဝ ရာခိုင်နှုန်း အထိ ထားသော်လည်း ယခုအချိန်တွင် ၆၅ ရာခိုင်နှုန်း ခန့်သာ ထားပြီး ရွှေစုဆောင်းမှု များလာကြောင်း သိရသည်။
မြန်မာနိုင်ငံ ရင်းနှီးမြှုပ်နှံမှု လုပ်ငန်းများတွင် အိမ်ခြံမြေနှင့် ရွှေလုပ်ငန်းမှာ ယခင်က ရှိခဲ့ပြီး ယခုလည်း ဆက်လက် လုပ်ကိုင် နေကြသည်။ ၂ဝ၁၆ ခုနှစ်တွင် ရန်ကုန် စတော့အိတ်ချိန်း ဈေးကွက်ဖွင့်လိုက် သော်လည်း အကျဈေး ဖြင့်သာ ရောင်းဝယ် နေကြသဖြင့် ပြည်သူများ စိတ်ဝင်စားမှု နည်းနေသေးသည်။ ပြည်ပ ရင်းနှီးမြှုပ်နှံမှုများ ပိုမိုဝင်ရောက် လာမည့် အလားအလာ ကောင်း သတင်းများလည်း ကြားနေရသဖြင့် ထိုသတင်းများက ရွှေဈေးနှင့် ငွေလဲနှုန်းကို လှုပ်ခတ်စေသော သက်ရောက်မှုများ ရှိမည် ဖြစ်သော်လည်း ရွှေဈေးပြန်ငြိမ် သွားနိုင်ကြောင်း ဈေးကွက်အတွင်းမှ စကားသံများ ကြားရသည်။ သို့သော် တခြားတစ်ဖက် တွင် စီးပွားရေး လုပ်ငန်းများ အကြောင်း အမျိုးမျိုးကြောင့် အဆင်မပြေ ဖြစ်ချိန်နှင့် ငွေကြေးလဲနှုန်း မတည်မငြိမ် ဖြစ်ချိန်များတွင် ငွေကြေး ကြွယ်ဝသူ များက ရွှေဝယ်ယူ စုဆောင်းခြင်းဖြင့် အကာအကွယ် ယူတတ်ကြ ပေရာ မြန်မာနိုင်ငံ၏ ရွှေဈေးနှင့် ငွေလဲနှုန်း မတည်ငြိမ်မှုမှာ စောင့်ကြည့် ရဦးမည်သာ ဖြစ်ပေသည်။
( အယ်ဒီတာ့အာဘော် )
