ဆောင်းပါး ( ခိုင်ကျော်ညို ) ၁၆-၆-၂၀၁၇
ရတနာဟူသည် နှစ်သက်ဖွယ်၊ မြတ်နိုးဖွယ်ဖြစ်သော အရာဟူ၍ လည်းကောင်း၊ နှစ်သက်တန်ဖိုးထားသော သား၊သမီး၊ဆင်၊မြင်း စသည်ဟူ၍လည်းကောင်း၊ ပတ္တမြားစသည် အမျက်ကျောက်ဟူ၍ လည်းကောင်းမြန်မာ အဘိဓာန်၌ အဓိပ္ပာယ်ဖွင့်ဆို ထားသည်။ မြန်မာနိုင်ငံသားများအတွက် သဘာဝကပေးသော မြေပေါ်မြေအောက် အဖိုးတန်သယံဇာတများတွင် ကျောက်မျက်ရတနာ များနှင့်အတူ အဖိုးတန်သဘာဝသစ်တော ရတနာများလည်း ပါဝင်ကြသည်။
မြန်မာနိုင်ငံသမိုင်းတွင် နယ်ချဲ့အင်္ဂလိပ်တို့က မြန်မာတို့အပေါ် မတရားကျူးကျော် စော်ကားပြီး ထီးကျိုးစည်ပေါက်ဘဝ ရောက်စေခဲ့သော အင်္ဂလိပ်-မြန်မာတတိယစစ်ပွဲ (၁၈၈၅ ခုနှစ်)ကို မီးလောင်ရာလေပင့် ပေးလိုက်သော ဘုံဘေဘားမား သစ်ကုမ္ပဏီ၏ သစ်ခိုးထုတ်မှုကို ကြည့်ခြင်းအားဖြင့် မြန်မာပြည်သူများနှင့် သစ်တောရတနာတို့၏ သမိုင်းသည် တစ်ဆက်တစ်စပ်တည်း ဖြစ်ကြောင်း တွေ့ရပါသည်။
မြန်မာ့သစ်တောများသည် ပြည်သူတို့နှင့် တစ်ဆက်တစ်စပ်တည်း ရှိကြသည်သာမက ပြည်သူအတွက် လောကအမြင်၊ ဘဝအမြင်၊ အနုပညာအမြင်၊ ဘာသာရေးအမြင်တို့ကိုပါ ပေးစွမ်းနိုင်ကြောင်း မြန်မာစာပေများတွင် တွေ့နိုင် ပါသည်။အင်းဝခေတ် ကဗျာစာဆိုကြီးများအနက် ရှင်ဥတ္တမကျော်ရေးသားသော ဂန္ထဝင်မြောက်တောလား ကဗျာကြီး၌ ''ဥဏှဂူနတ်၊ ဖလ်ရဟတ်လည်း၊ သဟဿရောင်၊ခြည်တစ်ထောင်ဖြင့်၊ပြောင်ပြောင်ဝင်းထိန်၊အာဏာနှိမ်လျက်၊ ပြင်းရှိန်အန္တ၊ ဂုဏ်စွမ်းပြသော်၊ လေခမြေသက်၊ ဈာန်ဝိတက်သို့၊ သစ်ရွက်ရော်ရီ၊ ဣန္ဒနီဝယ်၊ သိင်္ဂီတစ်ဝက်၊ ဖက်၍ဆေးစုံ၊ ခြယ်သောပုံသို့၊ ရဂုံမြိုင်တွင်း၊ တောလုံးလင်းသား'' ဟူသောအဖွဲ့နှင့် ''တောခွင်တောင်ထု၊ ပျော်ကြောင်းလု သည်၊ တောင်သူ့ဓလေ့၊ ယာမီးကြွေ့သား၊ မျိုးစေ့မြေနှံ၊ ဒေဝမာန်လျှင်၊ ညံတခြိမ့်ခြိမ့်၊ ဘဝင်စိမ့်မျှ၊ သိမ့်သိမ့်ရိုက်ကြော်၊ ပုစွန်ဆော်၍၊ ခါတော်သဘင်၊ ဖက်နွှဲယှဉ်ဖို့၊ ညွန့်ရှင်ခက်သွယ်၊ တောနိကာယ်ဘုံ၊ အံ့ဖွယ်သူရဲ၊ ကဲကြဆင့်ဆင့်၊ ပင်လုံးဝင့်လျက်'' ဟူသောအဖွဲ့တို့သည် ဆိုခဲ့သော အမြင်လေးမြင်တို့ကို ဖော်ကျူးလျက်ရှိပါသည်။ ထို့ကြောင့် သစ်တောများသည် မြန်မာတို့အတွက် ရတနာဖြစ်သည်ဟု တင်စားထားခြင်း ဖြစ်ပါသည်။
မြန်မာနိုင်ငံသည် သဘာဝသယံဇာတ ကြွယ်ဝသော နိုင်ငံဖြစ်ပြီး ၂ဝ၁၅ ခုနှစ်က တိုင်းတာချက်များအရ နိုင်ငံဧရိယာ၏ ၄၂ ဒသမ ၉၂ ရာခိုင်နှုန်းသည် သစ်တောများ ဖုံးလွှမ်းသော ဧရိယာဖြစ်သည်။ သစ်တောများသည် နိုင်ငံ တော်၏ ကုန်ထုတ်လုပ်ငန်းများ နှင့်ဝန်ဆောင်မှု လုပ်ငန်းများတွင် အထောက်အပံ့အမျိုးမျိုး ပေးစွမ်းနိုင်သောကြောင့် ပြည်သူတို့၏ လူမှုစီးပွားဖွံ့ဖြိုးရေး၊ တိုးတက်ရေးအတွက် အရေးပါသည့် အခန်းကဏ္ဍ၌ပါဝင်သည်။
မြန်မာနိုင်ငံတွင် ကျေးလက်နေပြည်သူ အများစုဖြစ်ပြီး သစ်တောသယံဇာတ များအပေါ် အများအပြားမှီခို အားထားနေကြရာ သစ်တောများအပေါ် အလွန်အကျွံမှီခိုခြင်းက သစ်တောပြုန်းတီးမှုကို တွန်းအားပေးလျက် ရှိသဖြင့် ကမ္ဘာ့နိုင်ငံများ၏ သစ်တောပြုန်းတီးမှုတွင် မြန်မာနိုင်ငံသည် တတိယအများဆုံး နိုင်ငံဖြစ်ပြီး နှစ်စဉ်သစ်တော ပြုန်းတီးမှုမှာဟက်တာ သုည ဒသမ ၄ သန်းရှိကြောင်း သိရသည်။ သစ်တောဦးစီးဌာနသည် သစ်တောများ ပြန်လည် တည်ထောင်ရေး ဆောင်ရွက်ရာတွင် ပျက်စီးနေသော နေရာများ၌ နိုင်ငံပိုင်သစ်တော စိုက်ခင်းများ တည်ထောင်ခြင်း၊ ပုဂ္ဂလိကသစ်တော စိုက်ခင်းများ တည်ထောင်ခွင့်ပြုပေးခြင်း၊ သစ်တောအတန်း အစားကျဆင်းနေသော သဘာဝတောများကို ပြန်လည်ပြုစုထိန်းသိမ်း ကာကွယ်ခြင်း၊ ပြည်သူလူထု ပူးပေါင်းပါဝင်သည့် ဒေသခံပြည်သူ အစုအဖွဲ့ပိုင် သစ်တောစိုက်ခင်းများ တည်ထောင်ခြင်း စသောလုပ်ငန်းရပ်များကို စနစ်တကျလေ့လာ စိစစ်ဆောင် ရွက်နေသည်။
မြန်မာနိုင်ငံတွင် သစ်တောများဖုံးလွှမ်းမှု ဧရိယာတိုးတက်လာပြီး ပြည်သူတို့၏လူမှု စီးပွားဖွံ့ဖြိုးတိုးတက်မှုကို အထောက်အပံ့ ဖြစ်စေရန် နိုင်ငံတော်၏ အမျိုးသားရေး အင်အားစု တပ်မတော်ကလည်း ''ရှင်အောင်စိုက်ပျိုး၊ကြီးအောင် ပြုစု၊ မြဲအောင်ထိန်းသိမ်း''ဆောင်ပုဒ်နှင့်အညီ နှစ်စဉ် ဆောင်ရွက်နေသည်။နေပြည်တော် ကောင်စီနယ်မြေ ဇေယျာသီရိမြို့နယ်ရှိ ရေဆင်းဆည် ပတ်ဝန်းကျင်ထိန်း သိမ်းရေးနှင့်ဂေဟစနစ် ထိန်းသိမ်းရေးအတွက် ကာကွယ်ရေး ဦးစီးချုပ်ရုံး (ကြည်း)၏ ၂ဝ၁၇ ခုနှစ် ပထမအကြိမ် မိုးရာသီသစ်ပင်စိုက်ပျိုးပွဲ အခမ်းအနားကို ဇွန် ၁၅ ရက် နံနက် ၇ နာရီတွင် ကျင်းပခဲ့ပါသည်။ အဆိုပါအခမ်းအနားသို့ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့်ဇနီး ဒေါ်ကြူကြူလှ၊ ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီးစိုးဝင်းနှင့်ဇနီး ဒေါ်သန်းသန်းနွယ်၊ ပြည်ထဲရေးဝန်ကြီးဌာန၊ ကာကွယ်ရေး ဝန်ကြီးဌာနနှင့် နယ်စပ်ရေးရာ ဝန်ကြီးဌာနတို့မှ ပြည်ထောင်စုဝန်ကြီးများ နှင့်ဇနီးများ၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) နှင့်ဇနီး၊ ကာကွယ်ရေးဦးစီးချုပ် (ရေ)နှင့်ဇနီး၊ ကာကွယ်ရေးဦးစီးချုပ် (လေ)နှင့်ဇနီး၊ ကာကွယ်ရေးဦးစီး ချုပ်ရုံးမှ တပ်မတော်အရာရှိကြီးများ နှင့်ဇနီးများ၊ နေပြည်တော် တိုင်းစစ်ဌာနချုပ် တိုင်းမှူးနှင့်ဇနီး၊ နိုင်ငံတော်ကာကွယ်ရေး တက္ကသိုလ်မှ သင်တန်းသားအရာရှိ ကြီးများ၊ ကာကွယ်ရေးဦးစီးချုပ်ရုံး (ကြည်း) ရှိ ရုံး/ဌာနများမှ အရာရှိ၊စစ်သည်၊ မိသားစုဝင်များ တက်ရောက်၍ ရတနာတန်းဝင်ကျွန်းပင် ၇၂ဝဝ အား စုပေါင်း စိုက်ပျိုးခဲ့ကြပါသည်။
ရေဆင်းဆည် ပတ်ဝန်းကျင်၌ သဘာဝပတ်ဝန်းကျင် ထိန်းသိမ်းရေးနှင့် ဂေဟစနစ် ထိန်းသိမ်းရေးအတွက် ကာကွယ်ရေးဦးစီးချုပ်ရုံး (ကြည်း) အနေဖြင့် ၂ဝ၁၁ ခုနှစ်မှ ၂ဝ၁၆ ခုနှစ်အထိ မိုးရာသီသစ်ပင် စိုက်ပျိုးပွဲများတွင် ရတနာ တန်းဝင်ပင်၊ နှစ်ရှည်သီးနှံပင်နှင့် အရိပ်ရလေကာပင် စိုက်ပျိုးပင်စုစုပေါင်း ၉၃၇၅ဝ ပင်ကို စိုက်ပျိုးခဲ့ပြီး အပင်များရှင်သန် ဖြစ်စေရန်နှင့် ပြုန်းတီးမှုမရှိစေရန် ထိန်းသိမ်းရေး လုပ်ငန်းများကို စဉ်ဆက်မပြတ် ဆောင်ရွက်သွားမည် ဖြစ်ပါသည်။
ဥတုရာသီတောကိုမှီ၏ ဆိုထားကြသည့် အတိုင်း ရာသီဥတုကောင်းမွန် မျှတစေရန် သစ်ပင်သစ်တောများက စွမ်းဆောင်နိုင်ကြပါသည်။ ရာသီဥတုကောင်းမွန်မျှတလျှင် လယ်ယာစိုက်ပျိုးရေး ကုန်ထုတ်လုပ်ငန်းများတိုးတက်လာပြီး နိုင်ငံတော်အစိုးရက ဆောင်ရွက်နေသော ကျေးလက်ဒေသဖွံ့ဖြိုးရေးနှင့် ဆင်းရဲမှုလျှော့ချရေး လုပ်ငန်းစဉ်များကို အထောက်အကူ ပြုနိုင်မည်ဖြစ်သည်။ သစ်တောသစ်ပင်များသည် လူသားတို့အတွက်အခြေခံလိုအပ်ချက်ဖြစ်သည့် စားဝတ်နေရေးကို ဖြည့်ဆည်းပေးသည့်အပြင် နွယ်မြက်သစ်ပင် ဆေးဖက်ဝင်ဆိုသည့်အတိုင်း အသီး၊အပွင့်၊ အရွက်၊ အမြစ်၊ အခေါက်တို့ကိုဆေးဝါးအဖြစ် အသုံးပြုနိုင်သည်။
စက်မှုတော်လှန်ရေး ကာလနောက်ပိုင်း အိုဇုန်းလွှာပျက်စီးမှုကြောင့် ကမ္ဘာကြီးပူနွေးလာခြင်းနှင့် လေထုညစ်ညမ်းမှု များလာခြင်းတို့ကို သစ်ပင်သစ်တောများက ထိန်းသိမ်းပေး လျက်ရှိရာ ''စက်ရုံလွှင့်ထုတ်၊ လေညစ်ပုပ်၊ တောတွင်း သစ်ပင်အကုန်စုပ်။ တို့တွေရှူသွင်း၊ လေသန့်ရှင်း မခြွင်းရမှာ၊ တောကသာ'' ဟူသောဆောင်ပုဒ်များဖြင့် နှိုးဆော်ထားကြသည်။ သစ်ပင်တို့သည် လေထုအတွင်းမှ ကာဗွန်ဒိုင်အောက်ဆိုက် ဓာတ်ငွေ့များအားစုပ်ယူ၍ အပင်အစိတ် အပိုင်းများနှင့် မြေဆီလွှာအတွင်း သိုလှောင်ပေးပြီး လူနှင့်သက်ရှိသတ္တဝါ များအတွက် လိုအပ်သည့် အောက်ဆီဂျင်ဓာတ်ငွေ့ကို ထုတ်လွှင့်ပေးခြင်းဖြင့် သက်ရှိလောကအတွက် အရေးအကြီးဆုံး ဝန်ဆောင်မှုကို ဆောင်ကြဉ်းပေး ကြသည်။
သစ်ပင်သစ်တောများသည် လူသားတို့အတွက် သစ်တောထွက် ပစ္စည်းများအပြင် ပတ်ဝန်းကျင်ဆိုင်ရာ အကျိုးကျေးဇူး များကိုလည်း အထောက်အပံ့ ပြုကြသဖြင့် သစ်တစ်ပင်စိုက်လျှင် ဇရပ်တစ်ဆောင်ဆောက်လုပ် လှူဒါန်းသည် နှင့်တူ၏ဟူ၍ ရှေးဘိုးဘွားမိဘများက ညွှန်ပြထားကြသည်။ သစ်ပင်သစ်တောများ ထိန်းသိမ်းကာကွယ်ခြင်းဖြင့် လေကောင်းလေသန့် ရရှိစေခြင်း၊ ရေလည်ပတ်မှု စနစ်မှန်ကန်စေရန် ထိန်းသိမ်းပေးခြင်း၊ ရေအရင်းအမြစ်များနှင့် သဘာဝစမ်းရေထွက်များ ဖြစ်ပေါ်စေခြင်း၊ ဇီဝမျိုးစုံမျိုးကွဲများ ကြွယ်ဝစေခြင်း၊ မြေဆီလွှာ ထိန်းသိမ်းပေးခြင်း၊ သစ်ပင်၏ပင်စည်နှင့် အမြစ်တုိ့က မြေပေါ်မြေအောက်ရေတို့ကို ထိန်းသိမ်းပေးထားခြင်း တို့ကြောင့် ရေကြီးခြင်းနှင့် ခြောက်သွေ့မှုများ သက်သာစေခြင်း စသည့်အကျိုးကျေးဇူးများ ရရှိနိုင်သည်။
ထို့ကြောင့် သစ်ပင်တစ်ပင်၏ တန်ဖိုးကို ရှာဖွေကြရာတွင် မြင်နိုင်သည့်တန်ဖိုးနှင့် မမြင်နိုင်သည့် တန်ဖိုးတို့ရှိကြလေရာ လူတိုင်း မြေရှိလျှင် သစ်ပင်စိုက်သင့်ပါသည်ဟု အကြံပြုတိုက်တွန်းရေးသား လိုက်ရပါသည်။ ။
မြ၀တီနေ့စဉ်သတင်းစာ စာ (၁၁)
#Themyawadydaily
No comments:
Post a Comment