စိတ်ကိုပြင်မှ ဘ၀လှ
လောက၌ စိတ်သည် သာလျှင် ရှေ့သွားဖြစ်ပြီး စိတ်သည် သာလျှင် ဦးဆောင်မှု ဖြစ်သည်။ ဤ လောကကြီးကို စိတ်ကသာလျှင် ဆောင်ကြဉ်း အပ်၏။ စိတ်သည် သာလျှင် ဆွဲငင်အပ်၏။ လူသတ္တဝါ အားလုံး တို့သည် စိတ်တည်း ဟူသော တရားတစ်ခု၏ အလိုသို့ လိုက်နေ၏ ဟု တရားတော် ၌ ဆိုထားသည်။
ထို့ကြောင့် စိတ်သည် အရာရာကို ဖန်တီးနေ၏။ စိတ်သည်ပင် လောက၏ ကောင်းခြင်း၊ မကောင်းခြင်း တို့ကို စီမံလေသည် ဟု ဆိုကြသည်။ တရား အလိုအရ ထိုစိတ်ဖြင့် မိမိအကျိုး၊ လောက အကျိုး တို့ကို ဆောင်ရွက် ရာတွင် ဦးစွာ ဆောက်တည် သင့်သည့် အချက်မှာ မိမိ စိတ်နေ စိတ်ထား ကို ကောင်းအောင် ပြုပြင်ခြင်း ဖြစ်သည်။
ထိုသို့ ဆိုရသည်မှာ ကောင်းသော အမှုကို ပြုသည့် အခါ၌ မိမိတို့၏ ကုန်လွန်ခဲ့သော စိတ်ဟောင်း များသည် ကောင်းကျိုး ရှေးရှု၏။ ကောင်းမှု မြတ်နိုး၊ ကောင်းအောင် ကျိုး၍၊ ကောင်းကျိုး ကိုယ်၌ တည်စေသည့် မိမိစိတ်ကို ကောင်းသည်ထက် ကောင်းအောင် ပြုပြင်ကြ ရမည် ဖြစ်သည်။ မိမိတို့၏ စိတ်နေ စိတ်ထား များကို ကောင်းအောင် ပြုပြင်ရာတွင် အကြောင်း များစွာရှိသည်။ မိမိစိတ်ထား ကောင်း ၊ မကောင်းကို မိမိသာလျှင် အသိဆုံး ဖြစ်သည်။ ထို့ကြောင့် ကောင်းအောင် ဆောင်ရွက် လိုလျှင်လည်း မိမိစိတ်သာ ဖြစ်ပြီး မကောင်းအောင် ဆောင်ရွက် လိုလျှင်လည်း မိမိစိတ်သာ ဖြစ်သည်။
လွဲမှားသော စိတ်ရှိနေသူ တစ်ဦးသည် လောကီဂုဏ် အတွက် အထက်တန်းသို့ ရောက်နေသူ တစ်ဦး ဖြစ်လင့်ကစား စိတ်နေ စိတ်ထားအရ အောက်တန်းသို့ ရောက်နေသူသာ ဖြစ်ပေမည်။ လောကုတ္တရာ ဂုဏ်တွင်လည်း အောက်တန်း၊ နောက်တန်းသို့ ပြန်လည် ရောက်တတ် ပေသည်။ ထို့ကြောင့် မိမိတို့၏ စိတ်နေ စိတ်ထား များကို ကြီးမား မြင့်မြတ်စေရန် အားထုတ် ပြုပြင် ကြရမည် ဖြစ်သည်။
ထို့ပြင် အထက်တန်းစား သို့ ရောက်လိုသော အမျိုးကောင်းသား၊ အမျိုးကောင်းသမီး တို့အနေဖြင့် လည်း မိမိတို့၏ ပတ်ဝန်းကျင်တွင် တစ်နေ့၊ တစ်မနက်၊ တစ်ရက် စသည်ဖြင့် ရက်ပိုင်းခြား၍ မိမိတို့၏ စိတ်သန္တာန် ၌ ဖြစ်လေ့ရှိသော အကုသိုလ် စိတ်ရိုင်းများ မဝင်ရောက် စေရန် မိမိတို့၏ စိတ်ကို အထူး စောင့်ကြပ် ကြရမည် ဖြစ်သည်။
ဤသို့ စောင့်ကြပ်ဖန် များလာ သောအခါ အကုသိုလ် စိတ်များ နည်းလာပြီး သူတော်ကောင်း အဖြစ်သို့ ရောက်ကာ သဒ္ဓါထူး၊ ပညာထူးများ ရရှိပြီး ရက်ပေါင်း ကြာလာသော အခါ နဂို ဖြစ်တတ်သော အကုသိုလ်စိတ် တို့သည် မိမိတို့၏ ကိုယ်တွင် မကပ်ငြိ တော့ဘဲ သူတော်ကောင်း အဖြစ်သို့ ရောက်ရှိ ကြမည် ဖြစ်သည်။
သို့ဖြစ်ရာ အကုသိုလ် စိတ်လွန်စွာ ပေါများ လွယ်သော ဤလောကကြီး ၌ အမျိုးကောင်းသား၊ အမျိုးကောင်းသမီး တို့ အနေဖြင့် မိမိတို့၏ စိတ်သန္တာန်၌ နေ့စဉ် ဖြစ်ပေါ် တတ်လေ့ရှိသော အကုသိုလ် စိတ်များ ကွယ်ပျောက် စေရန် သတ္တဝါ အားလုံးတို့ အပေါ်တွင် မေတ္တာစိတ် ပွားများ ပေးခြင်းဖြင့် မိမိ အကျိုး၊ လောကကောင်းကျိုး တို့ တိုးပွား ဝေဆာကာ လှပသော ဘဝများကို ရရှိပိုင်ဆိုင် ကြမည် ဖြစ်ပါကြောင်း အကြံပြု ရေးသား လိုက်ရပေသည်။
(အယ်ဒီတာ့အာဘော်)
#Yadanarpondaily
#ရတနာပုံနေ့စဉ်
No comments:
Post a Comment