စစ်ကိုင်းကောင်းမှုတော် ဘုရား မြောက်ဘက်ရှိ ထူးခြားသော မေတ္တာရေကန်

-

စစ်ကိုင်းမြို့ရှိ ကောင်းမှုတော် ဘုရားသည်ထူးခြားပြီး စိတ်ဝင်စားဖွယ်ရာ ကောင်းသော စေတီပင်ဖြစ်သည်။ အဆိုပါကောင်းမှုတော် စေတီကို အင်းဝခေတ် ညောင်ရမ်းမင်းဆက် သီရိသုဓမ္မရာဇာ  မဟာဓိပတိဘွဲ့ခံ သာလွန်မင်းကြီးက   သက္ကရာဇ် ၉၉၈ ခုနှစ်တွင်တည်ထားခဲ့ပြီး   ဘုရားထီး မတင်မီသာလွန်မင်း နတ်ရွာစံသည့်အတွက် သားတော်ပင်းတလဲမင်းက သက္ကရာဇ် ၁ဝ၁၁ ခုနှစ်  ကဆုန်လဆန်း  ၈ ရက်တွင်   ထီးတော် တင်လှူခဲ့သည်။

-

စေတီတော်မှာ ဉာဏ်တော် ၁ဝ၁ တောင်၊ထီးတော်၂၆ ပေ၊ စေတီလုံးပတ် ပေ ၈၈ဝ၊ အချင်း၂၈ဝ ပေ ၉ လက်မရှိကာ စစ်ကိုင်းကောင်းမှုတော်သို့ ရောက်သူတိုင်း ဘုရားကို လှည့်လည်ဖူးမြော်ပြီးသည်နှင့် ထူးခြားသော ကန်ဆီသို့ သွားရောက်လေ့ရှိသည်။ ထိုကန်မှာကောင်းမှုတော် စေတီနံဘေးမှ ထူးခြားသော မေတ္တာကန်ပင်ဖြစ်သည်။   မေတ္တာကန် တည်ထားမှုနှင့်ပတ်သက်သော    နောက်ခံသမိုင်းတွင်  ကောင်းမှုတော်စေတီ တည်ရန် မြေနေရာညွှန်ပြသူ  သိကြားမင်း၏ မေတ္တာရပ်ခံချက်ကြောင့် စေတီတော်မြောက်ဘက်တွင် ရေကန်တူးဖော်ခဲ့ရာမှသည် မေတ္တာကန်ဟု တွင်ခဲ့ကြောင်း သိရသည်။

-

ကောင်းမှုတော်ဘုရား မြောက်ဘက်ရှိ မေတ္တာကန်မှာ  အရှေ့၊ အနောက် အလျား၂၉၉ ပေ ၆ လက်မရှိပြီး စစ်ကိုင်းကောင်းမှုတော် ဘုရားသို့ရောက်သူတိုင်း  မေတ္တာကန်ဘက်သို့ သွားကာ ငါးစာကျွေးခြင်း ဆောင်ရွက်၍ ကောင်းမှုတော်ဘုရားကို အဝေးမြင်ကွင်းမှ ဖူးမြော်ကြသည်။

-

အဆိုပါမေတ္တာကန်တွင်   ထူးခြားချက် ခုနစ်ချက်ရှိရာ ထိုထူးခြားချက်များမှာ  အခါခပ်သိမ်း ရေမခန်းခြင်း၊ ရေပြင်တွင်  သစ်ရွက်အမှိုက်ရေညှိတို့ မရှိခြင်း၊    ရှေးခေတ်က တိုင်းပြည်အန္တရာယ်  ကျရောက်လုချိန်တွင်   ကန်ရေပြင်သည် ဆန်ဆေးရည်ကဲ့သို့နောက်ကျိလာခြင်း၊ ကန်တွင်းသို့ အမျိုးသမီးများ ရေဆင်းချိုးခြင်းနှင့် ကန်ရေကို အမင်္ဂလာကိစ္စများတွင်အသုံးပြုမိပါက ဘေးဥပဒ်ကျရောက်တတ်ခြင်း၊ မယုံကြည်၍ ကန်တွင်းမှ ငါး၊ လိပ်တို့ကို ဖမ်းယူစားသောက်ပါက သိသိသာသာ ဒုက္ခရောက်တတ်ခြင်း၊ ကန်ရေကိုမျက်စဉ်းခတ်မှု၊ သောက်သုံးမှုပြုပါက ရောဂါဝေဒနာ သက်သာခြင်း၊ နှစ်ပေါင်း ၃၆ဝ ကျော်ကြာမြင့်သော်လည်း ကန်ရေသည် နောက်ကျိပုပ်သိုးမှု မရှိခြင်း ဆိုသော အချက်များပင်ဖြစ်သည်။

-

လက်ရှိတွင်    စစ်ကိုင်းကောင်းမှုတော်ရောက် ဘုရားဖူးများသည်  ထူးခြားသော မေတ္တာကန်ကို အရောက်သွား၍     ငါးစာ၊ လိပ်စာကျွေးခြင်းများ ပြုလုပ်ကာ ကုသိုလ်ယူလေ့ ရှိကြသည်။ မေတ္တာကန်မှသည် ကောင်းမှုတော်ဘုရား၏ အဝေးမြင်ကွင်းကို  ဖူးမြော်လေ့ရှိကြပြီး အေးချမ်းစွာ လမ်းလျှောက်ကာ သွားလာလေ့ ရှိကြောင်း သိရသည်။     

-

#မြ၀တီနေ့စဉ်သတင်းစာ