မန်ဂျန်ရှားစိုက်ပျိုး ဝင်ငွေတိုး ဝန်းကျင်သဘာဝထိန်းသိမ်းကြ

ဆောင်းပါး ၅-၉-၂ဝ၁၈

ယနေ့ကမ္ဘာပေါ်တွင် သဘာဝ ပတ်ဝန်းကျင် ပျက်စီး ယိုယွင်းလာခြင်း နှင့်အတူ သဘာဝ ဘေးအန္တရာယ် ကျရောက်ခံစားရမှု အကြိမ်အရေအတွက်မှာလည်း တစ်နှစ်ထက် တစ်နှစ်ပိုမို များပြားလာခဲ့သည်။ အရေအတွက် ပိုမို များပြားလာသည့် သဘာဝ ဘေးအန္တရာယ် များ၏ ပြင်းအား ပမာဏမှာလည်း ပိုမိုပြင်းထန် လာခဲ့ကြောင်း သဘာဝ ဘေးအန္တရာယ် ဖြစ်ရပ်များက သက်သေပြုလျက် ရှိသည်။ ကမ္ဘာ့လူဦးရေ အဆမတန် တိုးပွား လာမှုနှင့်အတူ ကာဗွန်ဒိုင်အောက်ဆိုက် ဓာတ်ငွေ့ ထုတ်လွှတ်မှု များပြားသည့် စက်ရုံ၊ အလုပ်ရုံ များလည်း တစ်နေ့တခြား ပိုမိုများပြား လာခဲ့သည်။ အခြားတစ်ဖက်တွင်လည်း မြို့ပြ ဧရိယာများ ချဲ့ထွင်မှုကြောင့် သစ်တောများမှာလည်း တစ်နေ့တခြား လျော့နည်း ဆုတ်ယုတ်လာခဲ့ပြီး ကမ္ဘာ့ အပူချိန်ကို အဆမတန် တိုးပွားစေခဲ့သည်။ ကမ္ဘာကြီး ပူနွေးလာမှု(Global Warming) ကြောင့် အပူလှိုင်း၊ အအေးလှိုင်း ဖြတ်သန်းခြင်း၊ ဆိုင်ကလုန်း မုန်တိုင်း ဖြစ်ပေါ်ခြင်း စသည့် ရာသီဥတုနှင့် ဇလဗေဒဆိုင်ရာ သဘာဝ ဘေးအန္တရာယ်များကို အချိန်ကာလ အကန့်အသတ်မရှိ ဖြစ်ပွားစေနိုင်သည်။ ထိုကဲ့သို့သော ဆိုးရွား ပြင်းထန်သည့် သဘာဝ ဘေးအန္တရာယ်များ ဖြစ်ပေါ်လာရခြင်းကို ဆန်းစစ်ရလျှင် သစ်တော သစ်ပင်များ လျင်မြန်စွာ ပြုန်းတီးလာမှု နှင့်အတူ သဘာဝ ပတ်ဝန်းကျင် ယိုယွင်း ပျက်စီး လာခြင်းကြောင့်ပင် ဖြစ်သည်။ နှစ်စဉ်ကမ္ဘာပေါ်တွင် သစ်တော ပြုန်းတီးမှုမှာ ၃၂ ဧက သန်းခန့် ဖြစ်ပြီး သစ်တော ပြုန်းတီးမှု အများဆုံး နိုင်ငံများထဲတွင် မြန်မာနိုင်ငံမှာ အဆင့် ၃ တွင် ရှိနေသည်။ ''ကမ္ဘာကြီးဟာ လူတိုင်းရဲ့လိုအပ်ချက်ကို ဖြည့်ဆည်း ပေးနိုင်တယ်။ ဒါပေမဲ့ လူတိုင်းရဲ့ မတော်လောဘ ကိုတော့ မဖြည့်ဆည်း ပေးနိုင်ဘူး'' ဟူသည့် မဟတ္တမဂန္ဒီ၏ စကားကဲ့သို့ပင် လူတို့၏ လောဘကြောင့် ပျက်စီးခဲ့ရသည့် သဘာဝ ပတ်ဝန်းကျင် ပျက်စီးမှု၏ နောက်ဆက်တွဲ ဆိုးကျိုးများကို ယနေ့ လူသားများ ခံစားနေရခြင်း ဖြစ်သည်။

ထို့ကြောင့် လက်ရှိကာလ လူ့အဖွဲ့အစည်း အနေဖြင့် လက်ရှိကြုံတွေ့ နေရသည့် သဘာဝ ဘေးအန္တရာယ် များ၏ ဆိုးကျိုးများကို လျှော့ချနိုင်စေရန်နှင့် နောင်လာမည့် မျိုးဆက် သစ် များအတွက် ကောင်းမွန်သော ကမ္ဘာကြီးကို လက်ဆင့်ကမ်း အမွေလွှဲအပ် နိုင်စေရန် သစ်တော သစ်ပင်များ စိုက်ပျိုးခြင်းကို အလျင်အမြန် လုပ်ဆောင်ရန် လိုအပ်လာခဲ့သည်။

ထိုကဲ့သို့သော သစ်တောသစ်ပင်များ အလျင်အမြန် ပြန်လည် ဖြည့်တင်း စိုက်ပျိုးရန် မှာလည်း ပူပြင်းလွန်းသည့် ရာသီဥတုဆိုင်ရာ အခြေအနေများ၊ သစ်ပင်စိုက်ပျိုး အောင်မြင်နိုင်ရန် ရေချို ရရှိနိုင်မှုနှင့် မြေအောက်ရေ ရရှိမှု စသည်တို့ကြောင့် ရာသီဥတုဒဏ် ခံနိုင်သည့် အပင် အမျိုးအစား ဖြစ်ရန် စဉ်းစား ရွေးချယ် လာခဲ့ကြသည်။ ထိုကဲ့သို့ ရွေးချယ် စိုက်ပျိုးလာခဲ့ရာ လက်ရှိ အချိန်တွင် ကမ္ဘာ့နိုင်ငံ အတော်များများတွင် အဆင်ပြေ အောင်မြင်နေသည့် သစ်တော သစ်ပင်မှာ ''မန်ဂျန်ရှား''(Acacia Mangium) ပင်ဖြစ်သည်။ မန်ဂျန်ရှား အပင်မှာ အပွင့်ပွင့်သည့် သစ်ပင်ကြီးဖြစ်ပြီး ပဲမျိုးနွယ်ဝင် (Fabaceae) အပင် အမျိုးအစား ဖြစ်သည်။ မန်ဂျန်ရှား မျိုးစိတ်ကို သြစတြေး လျနိုင်ငံ ကွင်းစလန်း(QueenLand) ဒေသတွင် စတင်၍ အများဆုံး စိုက်ပျိုးခဲ့ပြီး မြန်မာနိုင်ငံ အပါအဝင် အာရှတိုက် နိုင်ငံများ ဖြစ်သည့် တရုတ်၊ အင်ဒိုနီးရှား၊ လာအို၊ မလေးရှား၊ ထိုင်း၊ ဖိလစ်ပိုင်နှင့် ဗီယက်နမ်နိုင်ငံတို့ သာမက ဘင်္ဂလားဒေ့ရှ်၊ ဘရာဇီး၊ ကင်မရွန်း၊ ကော်စတာရီကာ၊ ဟာဝိုင်ရီနှင့် နီပေါနိုင်ငံ တို့တွင်လည်း အကြီးအကျယ် စတင် စိုက်ပျိုးလာပြီ ဖြစ်သည်။ မန်ဂျန်ရှား အပင်ကို သဘာဝ ပတ်ဝန်းကျင် ထိန်းသိမ်းရေးအတွက် သစ်တောသစ်ပင် ပြန်လည် ဖြည့်တင်း စိုက်ပျိုးခြင်းနှင့် သစ်ထုတ်လုပ်ရန်အတွက် ရည်ရွယ် စိုက်ပျိုးလျက် ရှိသည်။

မန်ဂျန်ရှား အပင်များကို ရွှံ့ညွန် ထူထပ်သည့် လမုတော၊ ဒီရေတောများ ပေါက်ရောက်ရာ မြစ်ချောင်း ဘေးတစ်လျှောက်နှင့် ရေဝပ်မြေ များတွင်လည်း စိုက်ပျိုး ဖြစ်ထွန်းသဖြင့် မြန်မာနိုင်ငံတွင် နာဂစ်မုန်တိုင်း ကဲ့သို့ ဆိုင်ကလုံး မုန်တိုင်းကြီး ဝင်ရောက် တိုက်ခိုက် ခံခဲ့ရသည့် မြစ်ဝကျွန်းပေါ် ဒေသ (ပင်လယ်ထွက်ပေါက်) တစ်လျှောက်တွင် လေကာပင်အဖြစ် စိုက်ပျိုးပါက မုန်တိုင်းအန္တရာယ် လျော့ပါး သက်သာစေရေး အတွက်ပါ အသုံးဝင် နိုင်သည်။ သို့ရာတွင် အငန်ဓာတ်များသော ရေဝပ်မြေ များတွင်မူ ကောင်းစွာ မဖြစ်ထွန်း နိုင်သည်ကို သတိပြုရမည် ဖြစ်သည်။

မန်ဂျန်ရှား အပင်၏ အားသာချက်မှာ ကြီးထွားမှုနှုန်း မြန်ဆန်ပြီး သစ်အလုံး ဖြောင့်ခြင်း၊ သစ်အကြော မရှုပ်ခြင်း၊ သစ်အရောင်အသွေး လှပခြင်း၊သစ်မာ အမျိုးအစား ဖြစ်ခြင်း တို့ကြောင့် လျှာထိုးပျဉ်နှင့် ပါကေးကြမ်းခင်းများ အဖြစ် လည်းကောင်း၊ စားပွဲ၊ဗီရို၊ကုလားထိုင် စသည့် အိမ်တွင်း အလှဆင် ပရိဘောဂများ အဖြစ် လည်းကောင်း အသုံးပြုနိုင်သည်။ ထို့ပြင် ၄င်းမန်ဂျန်ရှား အပင်မှာ မြေဆီမြေနှစ် ညံ့လွန်းသော ဒေသတွင်လည်း ကောင်းစွာ ရှင်သန်နိုင်ပြီး ရောဂါ ကင်းစင်မှုနှင့် ရာသီဥတုဒဏ်ကို ခံနိုင်ရည် ရှိသည့်အပင် အမျိုးအစား ဖြစ်သည်။ ပျိုးပင်ပေါက် အရွယ်တွင် ဟင်းသီးဟင်းရွက်အဖြစ် ချက်ပြုတ် စားသောက်နိုင်ပြီး သက်တမ်း ၅ နှစ်-၆နှစ်အတွင်း အသုံးပြုမည်ဆိုပါက စက္ကူ ထုတ်လုပ်ရာတွင် လည်းကောင်း၊ ကြိတ်သားနှင့် အထပ်သား ထုတ်လုပ်သည့် လုပ်ငန်းများအတွက် စိုက်ပျိုးကြပြီး မန်ဂျန်ရှား လွှစာနှင့် ရှီတာကီမှို ထုတ်လုပ်ရန်အတွက် အကောင်းဆုံး ကုန်ကြမ်းတစ်မျိုး လည်း ဖြစ်သည့်အတွက် အသုံးဝင်မှု နယ်ပယ် များပြားကြောင်း တွေ့ရှိ ရသည်။

မန်ဂျန်ရှား အပင်တွင် မျိုးစိတ်ပေါင်း ၂ဝဝ ကျော်ရှိပြီး အသီးနှင့် အစေ့များမှာ ခွဲခြားရ ခက်ခဲသည်။ အများဆုံး စိုက်ပျိုးနေသည့် မျိုးစိတ်မှာ မျိုးရင်းဖြစ်သည့် မန်ဂျန်ရှား (Acacia Mangium)ဖြစ်ပြီး မန်ဂျန်ရှား အပင်မှာ လက်ရှိ မြန်မာနိုင်ငံတွင် စိုက်ပျိုး ဖြစ်ထွန်းနေသည့် အော်ရေးရှား ခေါ် မလေးရှား ပိတောက် (Acacia Auriculiformis)နှင့် ခပ်ဆင်ဆင် တူသည်။ သို့ရာတွင် မန်ဂျန်ရှား အပင်၏ အပွင့်မှာ အဖြူရောင်ရိုးတံ အပွင့်ဖြစ်ပြီး အော်ရေးရှား ခေါ် မလေးရှား ပိတောက်၏ အပွင့်မှာ အဝါရောင် ရိုးတံအပွင့် ဖြစ်သည်။

အရွက်တွင်လည်း အော်ရေးရှား ခေါ် မလေးရှား ပိတောက်မှာ အရွက်သေးသေး ရှည်ရှည်ချွန်ချွန် ဖြစ်ကာ မန်ဂျန်ရှား အရွက်မှာ အရွက်ဖားပြီး ထိပ်ပိုင်းမှာ လုံးဝိုင်းသည့် ပုံစံဖြစ်သည်။ သစ်အရည်အသွေး ပိုင်းတွင်လည်း အော်ရေးရှား ခေါ် မလေးရှား ပိတောက်မှာ အဝါရောင် ဖြစ်ပြီး မန်ဂျန်ရှား အပင်၏ အရောင်မှာ ညိုဝါရောင် ဖြစ်ပြီး သစ်လုံးများ၏ ညိုဝါရောင် သစ်လုံးကွင်းများမှာ လှပသည့်အတွက် သြစတြေးလျ နိုင်ငံတွင် ထိပ်တန်းသစ် အမျိုးအစား ဖြစ်သည်။ ကျွန်းပင်ကဲ့သို့ သစ်ထုတ်လုပ်ရန် နှစ်ကာလ ကြာရှည်စွာ မစောင့်ဆိုင်း ရခြင်း၊ သစ်မာ အမျိုးအစား ဖြစ်ခြင်းနှင့် အရည်အသွေး လှပသည့်အတွက် မိမိတို့ နိုင်ငံတွင် ကျွန်းအစားထိုး သစ်မာအဖြစ် အသုံးပြုနိုင်သည်။

မန်ဂျန်ရှား အပင်များသည် ပူနွေးသော အပူပိုင်းဒေသ ရာသီဥတု ဇုန်များတွင် သဘာဝ အားဖြင့် ပျံ့နှံ့ ပေါက်ရောက်မှု ပိုမို များပြားသည်။ ပျမ်းမျှ အပူချိန် 31°C - 34°C အတွင်း အောင်မြင်စွာ စိုက်ပျိုးဖြစ်ထွန်း စေနိုင်သည်။

အေးလွန်းသည့် ရာသီဥတု အခြေအနေမျိုးကို မနှစ်သက်ဘဲ အပူချိန် အနည်းဆုံး 15°C အောက်တွင် မစိုက်ပျိုးသင့်ပါ။ မြေဆီမြေသြဇာ ညံ့ပြီး အက်စစ်ဓာတ် PH Level 4.0 အောက်ရှိသော မြေအမျိုးအစားတွင်ပင် ကောင်းစွာ ရှင်သန် ဖြစ်ထွန်းနိုင်သည်။ မန်ဂျန်ရှား အပင်၏ အရွက်မှာ တစ်နှစ်ပတ်လုံး ကြွေလိုက်ဝေလိုက် ဖြစ်နေသည့်အတွက် အဆွေးမြန် သည့် သစ်ရွက်များကြောင့် မြေဆီလွှာကို ပိုမိုအားကောင်း စေသဖြင့် မြေဆီလွှာ ညံ့သည့်ဒေသများ အတွက်လည်း စိုက်ပျိုးနိုင်ကြောင်း တွေ့ရှိရသည်။ ထို့ပြင် မြေဆီမြေသြဇာ ညံ့သည့် ဒေသများ၏ အပေါ်ယံ မြေဆီလွှာကို ပြုပြင်ရာတွင် မန်ဂျန်ရှား အပင်သည် များစွာ အထောက်အကူ ဖြစ်ကြောင်း တွေ့ရှိရသည်။

မန်ဂျန်ရှားအပင် စတင်စိုက်ပျိုးရန် မျိုးစေ့ ဝယ်ယူသည့် အဆင့်တွင် အလွန်အရေးကြီးသည်။ အဘယ်ကြောင့်ဆိုသော် မန်ဂျန်ရှား မျိုးစေ့မှာ အော်ရေးရှား ခေါ် မလေးရှား ပိတောက်စေ့နှင့် တူသည့်အတွက် မျိုးစေ့မှားပြီး စိုက်ပျိုးခြင်းမျိုး ဖြစ်နိုင်သည်။ ထို့ကြောင့် မန်ဂျန်ရှားမျိုးစေ့ကို မျိုးစေ့မှန်ကန်ရန်နှင့် မျိုးကောင်းမျိုးသန့်ထဲမှ ရရှိနိုင်ရန် သေချာစွာ ရွေးချယ် စိုက်ပျိုးရမည်။ မန်ဂျန်ရှားမျိုးစေ့ (1Kg)တွင် မျိုးစေ့ပေါင်း တစ်သိန်းကျော် ပါဝင်သည်။ မျိုးစေ့ကို စတင်အပင် ဖောက်ရန်အတွက် ဦးစွာမျိုးစေ့ကို ရေနွေးပွက်ပွက်ထဲသို့ နှစ်လိုက် ထို့နောက် ထုတ်ယူပြီး ရေအေးထဲသို့ ပြန်စိမ်လိုက်ဖြင့် သုံးကြိမ်ခန့် ပြုလုပ်ပြီး စိုက်ပျိုးသည့် နည်းကို လက်တွေ့ စိုက်ပျိုးသူများက လုပ်ဆောင် အောင်မြင်လျက် ရှိသည်။ အစေ့ကို အပင်အမြန်ပေါက် စေသော နည်းဖြစ်ပြီး ၇၈ ရာခိုင်နှုန်းခန့် အပင်ပေါက်နှုန်း ကောင်းမွန်ကြောင်း တွေ့ရှိရသည်။

မန်ဂျန်ရှား အပင်များကို စိုက်ပျိုးရန်အတွက် ပန္နက် ရွေးချယ်ရာတွင် ၆ ပေခြား အတန်းလိုက် အကွက်ချ စိုက်ပျိုးခြင်းဖြင့် စိုက်ပျိုးနိုင်သည်။

မန်ဂျန်ရှား စိုက်ကွက်များအတွင်း ဒေသအလိုက် ပေါက်ရောက် ဖြစ်ထွန်းသည့် ပြောင်း၊ ပဲ စသည့် သီးနှံပင်များကို စိုက်ပျိုးနိုင်သည်။ မန်ဂျန်ရှား အပင်သည် အခြားအပင် များနှင့်မတူဘဲ ချုံပုတ် ပုံသဏ္ဌာန် ကြီးထွားသော အပင်အမျိုးအစား ဖြစ်သည်။ထို့ကြောင့် အကိုင်းအတက် များကို စနစ်တကျ ဖယ်ရှားပေးမှသာ သစ်လုံးဖြောင့်သော အပင်ကို ရရှိမည် ဖြစ်သည်။ ပန္နက်ကျယ်လွန်းလျှင် အကိုင်းအတက်များ ထူထပ်လာပြီး ပင်စည်တွင် အားလျော့ သွားနိုင်သည်။

အကိုင်းအတက် များကို ဖယ်ရှားပေး ခြင်းဖြင့်လည်း နေရောင်ခြည် ရရှိရန်အတွက် တစ်ပင်နှင့်တစ်ပင် အလုအယက် တက်ရင်း ပင်စည် ကြီးထွားမှုကို ဖြစ်စေနိုင်သည်။ ထို့ကြောင့် ပန္နက် ရွေးချယ်မှုသည် အပင်ကြီးထွားမှုအတွက် လွန်စွာ အရေးကြီးသည်။ ပန္နက်ကျဲလျှင် အပင်မြင့်တက်မှု အားနည်းပြီး အပင်လုံးပတ် ကြီးထွားမှုကို အားကောင်း စေသကဲ့သို့ ပန္နက်စိပ်လျှင် အပင်မြင့်တက်မှု အားကောင်းပြီး အပင်လုံးပတ် ကြီးထွားမှုကိုမူ အားနည်းစေနိုင်သည်။ အီကွေတာနှင့် အနီးအဝေး အပေါ် မူတည်ပြီး ဒေသအလိုက် အပင်အမြင့်နှင့် ကြီးထွားမှု ကွာဟနိုင်သည်။ ၆ ပေ ပန္နက်တွင် အပင်ကြီးထွားမှု နှုန်းကို နိုင်ငံတကာ စံနှုန်းများနှင့် မြန်မာနိုင်ငံ စံနှုန်းများအပေါ် ပျမ်းမျှ တွက်ချက်ရာတွင် အပင် ၆ လသားတွင် ပျမ်းမျှ အမြင့် ၆ ဒသမ ၅ ပေ၊ တစ်နှစ်သားတွင် ပျမ်းမျှ အမြင့် ၁၅ ပေ၊ တစ်နှစ်ခွဲသားတွင် ၅၁ ဒသမ ၁ ပေ၊ ငါးနှစ်သားတွင် ပျမ်းမျှအမြင့် ၇၃ ဒသမ ၄ ပေ အထိ ရှည်လျားနိုင်သည်။ ငါးနှစ်ကျော်လာလျှင် အပင်အမြင့်နှုန်း နှေးကွေး သွားသဖြင့် ကြားညှပ် (အပင်ကျပ်) ခုတ်ရန် သင့်လျော်သည့် အချိန်ကာလ ဖြစ်သည်။ အကယ်၍ အပင်ကျပ် မခုတ်ပါက မန်ဂျန်ရှား အပင်မှာ ရင့်သာ ရင့်လာပြီး အပင်အလုံး ကြီးထွားမှု ရှိတော့မည် မဟုတ်ပေ။ ထို့ကြောင့် အပင်ကျပ်ခုတ်ခြင်းကိုလည်း မဖြစ်မနေ လုပ်ဆောင်ရမည် ဖြစ်သည်။ အပင်ကြီးထွားမှု ပျမ်းမျှ နှုန်းအနေဖြင့် အပင်တစ်နှစ်သားတွင် ပင်စည်အချင်း ၂ ဒသမ ၃ လက်မခန့် ရှိပြီး လုံးပတ် အနေဖြင့် ၇ လက်မခန့်၊ အပင် နှစ်နှစ်သားတွင် ပင်စည် အချင်း ၄ လက်မခန့် ရှိပြီး လုံးပတ် အနေဖြင့် ၁၂ လက်မခန့်၊ အပင်သုံး နှစ်သားတွင် ပင်စည်အချင်း ၅ လက်မခွဲခန့် ရှိပြီး လုံးပတ် အနေဖြင့် ၁၅ ဒသမ ၇ လက်မခန့်၊ အပင် လေးနှစ်သားတွင် ပင်စည်အချင်း ၆ ဒသမ ၆ လက်မခန့်ရှိပြီး လုံးပတ် အနေဖြင့် ၂ဝ လက်မခန့်၊ အပင် ငါးနှစ်သားတွင် ပင်စည် အချင်း ၇ လက်မရှိပြီး လုံးပတ် အနေဖြင့် ၂၂ လက်မခန့်ထိ ရှိနိုင်သည်။ မန်ဂျန်ရှား အပင်၏ သက်တမ်းမှာ နှစ် ၃ဝ မှ နှစ် ၅ဝ အထိသာ ရှိပြီး သက်တမ်း ၁ဝ နှစ်မှ ၁၂ နှစ် အတွင်း အရည်အသွေး ကောင်းမွန်သော သစ်ကို စတင် ထုတ်လုပ်နိုင်မည် ဖြစ်သည်။

မန်ဂျန်ရှား အပင်များတွင် ပိုးမွှား ကျရောက်မှု အနေဖြင့် အဖြူရောင် မှိုကြောင့်ဖြစ်သော ပင်စည်ပုပ် ရောဂါကို အပင်ကြီးများတွင် တွေ့ရတတ်သည်။ မလေးရှား နိုင်ငံတွင် Pink Disease ရောဂါကို ၁၇ ရာခိုင်နှုန်းခန့် တွေ့ရတတ်ပြီး အင်ဒိုနီးရှား နိုင်ငံတွင် အရွက်စား လောက်ကောင်၊ ဓားခုတ်ကောင်များကို တွေ့ရတတ်သည်။ ဆူမားတြားတွင် စုပ်စား ကြမ်းပိုးများ ကျရောက် တတ်ကြောင်း တွေ့ရှိရသည်။ စီးပွားရေး ထိခိုက်သည့် အဆင့်အထိ ဖျက်ဆီးတတ်သည့် ပိုးမွှားများမှာ ခြ၊ ကျိုင်းနှင့်ပင်စည်ဖောက်ပိုးတို့ ဖြစ်သည်။

မန်ဂျန်ရှား အပင်များမှာ ရာသီဥတုဒဏ်ကောင်းစွာ ခံနိုင်ရည်မြင့်မားခြင်း၊ မြေဆီလွှာ ညံ့လွန်းသည့် ဒေသတွင်ပင် ရှင်သန် ဖြစ်ထွန်းခြင်းနှင့် အသုံးဝင်မှု နယ်ပယ်များပြားခြင်း တို့ကြောင့် ယနေ့ကမ္ဘာ့ နိုင်ငံ အများအပြားတွင် စီးပွားဖြစ် စိုက်ပျိုး ထုတ်လုပ်လာပြီ ဖြစ်သည်။ အပင်သက်တမ်း ၁ဝ စု နှစ်တစ်ခုအတွင်း သစ်မာ ထုတ်လုပ်နိုင်သည့်အဆင့်ထိ ရရှိနိုင်သည့်အတွက် ကြီးမြန်သစ်ပင် အမျိုးအစား တွင်လည်း ပါဝင်သည်။ ကြီးမြန်သစ်ပင် စိုက်ပျိုး ထုတ်လုပ် ခြင်းအားဖြင့် သစ်တော ပြုန်းတီးမှုများ အမြန်အစားထိုး နိုင်ပြီး အပူချိန် လျှော့ချရေးနှင့် ရာသီဥတု ထိန်းကျောင်းသည့် လုပ်ငန်း များတွင်လည်း အသုံးဝင်သဖြင့် သဘာဝ ပတ်ဝန်းကျင် ထိန်းသိမ်းရေး အတွက်လည်း နိုင်ငံ အသီးသီးရှိ အုပ်ချုပ်သူ အစိုးရ ပိုင်းမှ ဦးဆောင်ကာ သစ်တော များအဖြစ် စိုက်ပျိုး ထုတ်လုပ်လာခဲ့ခြင်း ဖြစ်သည်။ ထို့ပြင် နိုင်ငံ ဖွံ့ဖြိုးရေးနှင့် တည်ဆောက်ရေး လုပ်ငန်း များအတွက် သစ်လိုအပ်ချက် မြင့်မားနေသည့် ဖွံ့ဖြိုးဆဲ နိုင်ငံများ အတွက်လည်း များစွာ အထောက်အကူ ဖြစ်စေနိုင်သည်။

မိမိတို့ မြန်မာနိုင်ငံ အနေဖြင့် သစ်အခြေခံ စက်မှုလုပ်ငန်းများ အပါအဝင် သစ်ကို မဖြစ်မနေ အသုံးပြုနေရသည့် အသေးစားနှင့် အလတ်စား စက်မှုလုပ်ငန်းရှင် များအနေဖြင့်လည်း မန်ဂျန်ရှား သစ်များကို စိုက်ပျိုး ထုတ်လုပ် သုံးစွဲခြင်းဖြင့် သစ်လိုအပ်ချက်ကို အချိန်တို အတွင်းလုံလောက်စွာ ဖြည့်ဆည်းနိုင်မည် ဖြစ်သည်။ နိုင်ငံတော် အနေဖြင့်လည်း သစ်တောပြုန်းတီးမှု မြင့်မားခဲ့သည့် ဒေသများနှင့် မြန်မာနိုင်ငံ အလယ်ပိုင်းဒေသ စိမ်းလန်း စိုပြည်ရေး စီမံကိန်းကြီးများတွင် မန်ဂျန်ရှား သစ်ပင်များကို စိုက်ပျိုးခြင်းဖြင့် သဘာဝ ပတ်ဝန်းကျင်ကို ထိန်းသိမ်းရာ ရောက်ပြီး အခြားတစ်ဖက်တွင်လည်း နိုင်ငံ့ဝင်ငွေကို မြှင့်တင်နိုင်မည် ဖြစ်ကြောင်း ရေးသားလိုက် ရပါသည်။ ။

အောင်ကျော်သက် (ရွှေတာမြေ)

# မြဝတီနေ့စဉ်သတင်းစာ