Social Icons

Pages

Tuesday, October 24, 2017

လာမည့်နွေစပါး စိုက်ရာသီတွင် ယခင်နှစ်ထက် စိုက်ဧကသုံးသိန်းခန့် တိုးချဲ့စိုက်ပျိုးနိုင်သည်ထိ ဆည်ရေပေးဝေသွားမည်



နေပြည်တော် ၂၄-၁၀-၂၀၁၇

လာမည့်နွေစပါး စိုက်ရာသီချိန်တွင် ယခင်နှစ်ကထက် နွေစပါးစိုက်ဧက သုံးသိန်းခန့် တိုးချဲ့စိုက်ပျိုးနိုင်သည်ထိ ဆည်ရေကို ပေးဝေသွားမည် ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သိရသည်။

ယခင်နှစ် နွေစပါးစိုက်ရာသီတွင် နွေစပါးစိုက်ဧက ကိုးသိန်းကျော်အတွက် စိုက်ပျိုးရေလုံလောက်စွာ ပေးဝေ၍ စိုက်ပျိုးနိုင်ခဲ့ပြီး ယခုနှစ်လာမည့် နွေစပါးစိုက်ရာသီတွင် ယခင်နှစ်ထက် နွေစပါးစိုက်ဧက သုံးသိန်းခန့် တိုးချဲ့စိုက်ပျိုးနိုင်ရန် ဆည်ရေ ပေးဝေသွားမည်ဖြစ်ကာ ယခုနှစ် နွေစပါးစိုက်ရာသီတွင် တစ်နိုင်ငံလုံးရှိ နွေစပါးစိုက်ဧကစုစုပေါင်း ၁၂ သိန်းကျော်ကို စိုက်ပျိုးရေလုံလောက်စွာ ရရှိစိုက်ပျိုးနိုင်သည်ထိ ဆည်ရေသောက်စနစ်ဖြင့်လုံလောက်စွာ ရေပေးဝေသွားမည် ဖြစ်သည်။

" အရင်နှစ်ကလဲ နွေစပါးစိုက်ရာသီမှာ စိုက်ပျိုးရေမရလို့ တချို့ဒေသတွေမှာ နွေစပါးကို မစိုက်ပျိုးနိုင်တာတွေလဲ ရှိခဲ့ပါတယ်။ ဒီနှစ်ဆည်မြောင်းကနေ နွေစပါး စိုက်ဧကတွေထပ်တိုးပြီး စိုက်ပျိုးနိုင်အောင် ဆည်ရေပေးဝေ သွားမှာဆိုတော့ တောင်သူတွေလဲ အဆင်ပြေပါတယ်။ ဒီနှစ်က မိုးကောင်းတော့ မိုးစပါးတွေ ပျက်စီးမှုများတယ်။ မိုးစပါးအဆင်မပြေ တဲ့တောင်သူတွေလဲ နွေစပါးကိုထပ်စိုက်လို့ ရနိုင်တာပေါ့။ ဆည်တွေမှာလဲ ရေတွေတော်တော်သိုလှောင်ထားနိုင်မှာပါ"ဟု စိုက်ပျိုးရေး ဦးစီးဌာနမှ တာဝန်ရှိသူတစ်ဦးက ပြောပြသည်။

စိုက်ပျိုးရေး၊ မွေးမြူရေးနှင့်ဆည်မြောင်း ဝန်ကြီးဌာနက ရေရရှိရေးအတွက်နည်းလမ်း မျိုးစုံဖြင့် ဆောင်ရွက်လျက်ရှိပြီး ပြည်နယ်နှင့် တိုင်းဒေသကြီးများအလိုက် စိုက်ပျိုးရေ ပေးဝေနိုင်ရန်ရည်ရွယ်၍ တည်ဆောက်ထိန်းသိမ်း ထားသည့် ရေလှောင်တမံများတွင် ယခင်နှစ်က ရေလှောင်တမံ ၁၄၇ခု၌ သိုလှောင်ရေ ဧကပေပေါင်း ၁၁ သန်းခန့် သိုလှောင်နိုင်ခဲ့ကြောင်း၊ ယခုနှစ်တွင် ရေလှောင်တမံ ၁၆၇ခု၌ သိုလှောင်ရေဧကပေပေါင်း ၁၂ ဒသမ ၅ သန်းကျော် သိုလှောင်ထားနိုင်သောကြောင့် ယခင်နှစ်ထက် ဧကပေ ၁ ဒသမ ၆ သန်းကျော် ပိုမိုသိုလှောင်ထားရှိပြီး ဖြစ်ကြောင်း သိရသည်။

"ကျွန်တော်တို့ကတော့ နွေစပါးကို နှစ်တိုင်းစိုက်ရပါတယ်။ နွေစပါးက မိုးစပါး ထက်စိုက်ဧကများပေမယ့် အထွက်နှုန်းကျတော့ ပိုကောင်းတယ်။ ရာသီဥတုကလဲ ခြောက်သွေ့တော့ စပါးရိတ်ခြွေရတာကအစ အဆင်ပြေတယ်။ ဒါပေမဲ့ ကျွန်တော်တို့လို ဆည်ရေမရနိုင်တဲ့ တောင်သူတွေ အတွက်ကိုလဲ နွေစပါးစိုက်နိုင်အောင် သက်ဆိုင်ရာဌာနတွေက ကွင်းဆင်းပြီး ဆည်ရေတွေရရှိစိုက်ပျိုးနိုင်အောင် ဆောင်ရွက်ပေးစေချင်ပါတယ်" ဟု နေပြည်တော်ဇေယျသီရိမြို့နယ်မှ ရေဆင်းဆည်ရေ သောက်စနစ်ဖြင့် နွေစပါးစိုက်ပျိုးသည့် တောင်သူတစ်ဦးက ပြောပြသည်။

နွေစပါးသီးနှံအပါအဝင် အခြားသီးနှံများ စိုက်ပျိုးထုတ်လုပ်ရာတွင် စိုက်ပျိုးရေရယူ သုံးစွဲနိုင်ရေးနှင့် သီးနှံမျိုးစေ့နှင့်စိုက်ပျိုး နည်းပညာ အကူအညီများ ရယူလိုပါက စိုက်ပျိုးရေး၊ မွေးမြူရေးနှင့်ဆည်မြောင်း ဝန်ကြီးဌာနအောက်ရှိ ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာနနှင့် စိုက်ပျိုးရေးဦးစီးဌာနရုံးတို့သို့ ဆက်သွယ်၍ လိုအပ်သလို ညှိနှိုင်းဆောင်ရွက်နိုင်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သိရသည်။

#Yadanarpondaily

No comments:

Post a Comment

Related Posts Plugin for WordPress, Blogger...