မန္တလေး ၄-၅-၂၀၁၇
မန္တလေးတိုင်းဒေသကြီး ကျောက်ပန်းတောင်းမြို့နယ် ရေဆုံကျေးရွာတွင် ၂ဝ၁၆ခုနှစ် သြဂုတ်၂၄ရက်က လှုပ်ခတ်ခဲ့သော ငလျင်ဒဏ်ကြောင့် ထိခိုက်မှုရှိခဲ့သည့် ကုန်းဘောင်ခေတ် လက်ရာစေတီ ၂၃ဆူအား ယခုဘဏ္ဍာနှစ်တွင်ရှေးမူမပျက် ပြုပြင်သွားမည် ဖြစ်ကြောင်း ရှေးဟောင်း သုတေသနနှင့် အမျိုးသား ပြတိုက်ဦးစီးဌာန (မန္တလေးဌာနခွဲ)မှ သိရသည်။
ရေဆုံကျေးရွာတစ်ဝိုက်ရှိ ကုန်းဘောင်ခေတ် လက်ရာစေတီ၂၃ဆူအား ၂ဝ၁၇- ၂ဝ၁၈ဘဏ္ဍာနှစ် ပြည်ထောင်စုဘတ်ဂျက် ခွင့်ပြုရန်ပုံငွေကျပ်သိန်း ၁၅ဝဖြင့်ဌာနမှ ကျွမ်းကျင်ပညာ ရှင်များဖြင့် ရှေးမူမပျက် ပြန်လည်ပြုပြင်ထိန်းသိမ်းမည် ဖြစ်ကြောင်း သိရသည်။
ထိခိုက်မှုရှိသည့် စေတီ၂၃ဆူ ပြုပြင်ခြင်းလုပ်ငန်းများကို ဇွန်လဒုတိယပတ်တွင် စတင်နိုင်ရန် ခန့်မှန်းထားပြီး လုပ်ငန်းပြုပြင် ဆောင်ရွက်ချိန် နှစ်လခွဲခန့် ကြာမြင့်မည်ဟု ခန့်မှန်းထားကြောင်း သိရသည်။
''တချို့စေတီက ရွာက ပြုပြင်တာ ဖြစ်တဲ့အတွက် ရှေးမူပျက်တာ လေးတွေတော့ရှိတယ်။ အခုဟာတော့ ဘာမှမပြုပြင်သေးတာကို ကုန်းဘောင်ခေတ် လက်ရာတွေ အတိုင်း ရှေးမူမပျက်ပြန်လည် ပြုပြင်ထိန်းသိမ်းမှာပါ''ဟု ရှေးဟောင်း သုတေသနနှင့် အမျိုးသားပြတိုက် ဦးစီးဌာန (မန္တလေးဌာနခွဲ) မှ တာဝန် ရှိသူတစ်ဦးက ပြောပြသည်။
ရေဆုံကျေးရွာ တစ်ဝိုက်တွင် ကုန်းဘောင်ခေတ်လက်ရာ စေတီပေါင်း ၉ဝ ခန့်ရှိပြီး အချို့စေတီများမှာ ရွာမှစုပေါင်း ပြုပြင်သော စေတီများဖြစ်၍ အနည်းငယ် ပျက်စီးကာ ရှေးမူအတိုင်း မရှိကြောင်း၊ ယခုပြုပြင်မည့် စေတီ၂၃ဆူအား ဌာနအနေဖြင့် ရှေးမူအတိုင်း ပြန်လည်ပြုပြင် ထိန်းသိမ်းသွားမည် ဖြစ်ကြောင်း သိရသည်။
#Themyawadydaily
No comments:
Post a Comment