Social Icons

Pages

Tuesday, March 28, 2017

အမြဲထာဝရညီညွတ်မှ ဒိဋ္ဌတည်တံ့မည်


အမြဲထာဝရညီညွတ်မှ ဒိဋ္ဌတည်တံ့မည်

၂ဝ၁၇ ခုနှစ် မတ် ၂၇ ရက်တွင် (၇၂) နှစ်မြောက် တပ်မတော်နေ့ စစ်ရေးပြအခမ်းအနား ကို ဦးတည်ချက်(၄)ရပ်ဖြင့် ကျင်းပခဲ့ပြီးဖြစ်သည်။ တပ်မတော်သည် တိုင်းရင်းသား ပြည်သူများ၏ ရင်သွေးများဖြင့် ဖွဲ့စည်းထားသော အမျိုးသားရေး အင်အားစုအဖြစ် နိုင်ငံတော် ကာကွယ်ရေးနှင့် တိုင်းရင်းသား မိဘပြည်သူတို့အတွက် ဘက်စုံလုံခြုံရေး တာဝန်များကို ခေတ်အဆက်ဆက် အခက်အခဲ အမျိုးမျိုးကို ရင်ဆိုင်ကျော်လွှား စွန့်လွှတ်စွန့်စားမှု များဖြင့် ထမ်းဆောင်ခဲ့သည်။

မြန်မာနိုင်ငံလွတ်လပ်ရေး ရပြီး တပ်မတော် ထမ်းဆောင်ခဲ့သော တာဝန်များမှာ ၁၉၄၈-၁၉၄၉ ခုနှစ်များတွင် ပြည်တွင်းရောင်စုံ သောင်းကျန်းမှု အန္တရာယ်များကို ရှိသည့်အင်အားဖြင့် တိုက်ခိုက်နှိမ်နင်း ခဲ့ရသည်။ ၁၉၅၂-၁၉၆ဝ ပြည့်နှစ်များတွင် ပြည်ပမှကျူးကျော် ဝင်ရောက်လာသော ကူမင်တန် များအား တိုက်ထုတ်ခဲ့ရသည်။ ၁၉၅၈-၁၉၅၉ ခုနှစ်များတွင် အိမ်စောင့်အစိုးရ တာဝန်ကိုပါ တာဝန်ယူခဲ့ရသည်။ ၁၉၆၂ ခုနှစ်တွင် ပြည်ထောင်စုကြီး ပြိုကွဲမည့် အန္တရာယ်ကို အချိန်မီတားဆီး လိုက်ရသည်။ ၁၉၈၈ ခုနှစ်တွင် မင်းမဲ့စရိုက်များ လွှမ်းမိုးပြီး နိုင်ငံတော်၏ အချုပ်အခြာအာဏာ ကိုပါ ထိပါးလာသဖြင့် နိုင်ငံတော်တာဝန် အရပ်ရပ်ကို ထိန်းသိမ်းကာကွယ် လိုက်ရသည်။ ၂ဝ၁ဝ ပြည့်နှစ်တွင် ပြည်သူတို့ လိုလား တောင့်တနေသော ပါတီစုံဒီမိုကရေစီ အထွေထွေ ရွေးကောက်ပွဲကြီးကို နိုင်ငံတစ်ဝန်း တစ်ပြိုင်တည်း အောင်မြင်စွာ ကျင်းပပေးခဲ့ပြီး ဒီမိုကရေစီ အသွင် ကူးပြောင်းရေးကို ညင်သာစွာ ဆောင်ရွက်ပေး နိုင်ခဲ့သည်။

နိုင်ငံတော်၏ ကာကွယ်ရေးနှင့် စပ်လျဉ်း၍ လွတ်လပ်ရေး ဗိသုကာနှင့် တပ်မတော်ဖခင်ကြီး ဗိုလ်ချုပ်အောင်ဆန်း သည် မြန်မာသက္ကရာဇ် ၁၃ဝ၄ ခုနှစ် သီတင်းကျွတ် လဆုတ် ၈ ရက်တွင် ရန်ကုန်မြို့တော် ခန်းမ၌ ဖွင့်လှစ်သော ဆရာဖြစ်သင်တန်း ၌ သေနင်္ဂဗျူဟာ စစ်ပညာဟောပြော ခဲ့သည်။ ဗိုလ်ချုပ်အောင်ဆန်း က ''တိုင်းပြည်တစ်ပြည်မှာ လွတ်လပ်ရေးရဖို့ဟာ ဒါလောက် မခဲယဉ်းဘူး။ လွတ်လပ်ရေး ရပြီးတော့ ရတဲ့ လွတ်လပ်ရေးကို ထိန်းသိမ်းဖို့ပဲ ခဲယဉ်းတယ်။ စစ်တိုက်တာလည်း ဒီအတိုင်းပဲ။ ဥပမာ ဆိုရင်တော့ မြို့ကိုသိမ်းဖို့ မကြည့်ရဘူး။ သိမ်းပြီး မထိန်းနိုင်ရင် သွားတိုက်တာ အလကားဖြစ်မှာပဲ။ တစ်ခါတလေ စစ်တိုက်တာ သိမ်းဖို့တိုက်တာ မဟုတ်ဘူး။ ဗမာပြည်အတွက် အလုပ်လုပ် နေကြတာမှာ ရှေးအခါတုန်း ကလည်း ဗမာပြည် လွတ်လပ်ရေး အတွက် ရအောင်ယူနိုင်တဲ့ အခြေအနေမျိုး ရခဲ့တယ်။ ဒါပေမဲ့ ရပြီးတဲ့ လွတ်လပ်ရေးကို ထိန်းနိုင်မလားဆိုတာ စဉ်းစားပြီး မဆောင်ရွက်ဘဲ ထားခဲ့ရတယ်။ ပထမဖြစ်အောင် လုပ်ပြီးတော့ ဖြစ်ပြီးမှ ဒီဟာကို ထိန်းသိမ်းနိုင်တဲ့ အရည်အချင်းမရှိကြရင် နောက်ဆုံးပြန်ရှုံး သွားတာပဲ'' ဟု ထည့်သွင်း ဟောပြောသည်။

တပ်မတော်သည် နိုင်ငံတော် တည်ငြိမ်အေးချမ်းရေး၊ တိုင်းရင်းသား စည်းလုံးညီညွတ်ရေး နှင့် ပြည်သူများ၏ လူမှုဘဝ ဖွံ့ဖြိုးတိုးတက်ရေး တို့အတွက် မူဘောင်(၃)ရပ်ချမှတ်၍ နိုင်ငံတော်၏ ပြုပြင်ပြောင်းလဲမှု လုပ်ငန်းစဉ်များကို နိုင်ငံတော်အစိုးရ၊ လွှတ်တော်၊ ပြည်သူတို့နှင့်အတူ ပူးပေါင်းပါဝင် ဆောင်ရွက်နေသော တပ်မတော်ဖြစ်သည်။ နိုင်ငံတော်၏ ပိုင်နက်နယ်မြေ ကိုလည်းကောင်း၊ အချုပ်အခြာအာဏာ ကိုလည်းကောင်း၊ တိုင်းရင်းသား ပြည်သူတို့၏ အကျိုးစီးပွား ကိုလည်းကောင်း ထိပါးလာသည့် ပြည်တွင်း၊ ပြည်ပအန္တရာယ် ဟူသမျှကို တပ်မတော်က တိုက်ထုတ်ကာကွယ် စောင့်ရှောက် နေခြင်းသည် သမိုင်းပေး အမျိုးသားရေး တာဝန်ဖြစ်သည်။ တပ်မတော်က ချမှတ်ထားသော ငြိမ်းချမ်းရေးမူဝါဒ (၆)ရပ်သည် သမိုင်း အတွေ့အကြုံအရ ချမှတ်ထားခြင်း ဖြစ်သည်။

ယနေ့ကာလသည် နိုင်ငံတော်ရှေ့ခရီး ဖြောင့်တန်းရေးအတွက် အားလုံး ညီညီညွတ်ညွတ် ဖြင့် စုပေါင်းပါဝင်ကြရန် ကြိုးပမ်းရာတွင် ပြည်ထောင်စု ငြိမ်းချမ်းရေးညီလာခံ-(၂၁)ရာစု ပင်လုံဖွင့်ပွဲ အခမ်းအနားကို ၂ဝ၁၆ ခုနှစ် သြဂုတ် ၃၁ ရက်တွင် နေပြည်တော်၌ ကျင်းပစဉ် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်၍ နှုတ်ခွန်းဆက် အမှာစကား ပြောကြားခဲ့သည်။ တပ်မတော် ကာကွယ်ရေး ဦးစီးချုပ်က ''အမျိုးသားပြန်လည် သင့်မြတ်ရေးနဲ့ ငြိမ်းချမ်းရေး လုပ်ငန်းစဉ်များ ဆောင်ရွက်ရာမှာ လူမျိုးစွဲ၊ ဒေသစွဲ၊ အယူဝါဒစွဲ စတဲ့အစွဲအလမ်းများ ကင်းရှင်းစွာနဲ့ အောင်မြင်ပြီးမြောက် သည်အထိ တာဝန်ယူ ဆောင်ရွက်ကြမည့် သူများအဖြစ် ပြည်သူတုိ့က အသိအမှတ်ပြုခံ ထားရသူများလည်း ဖြစ်ပါတယ်'' ဟူ၍ ကိုယ်စားလှယ် များအား ပြောကြားသည်။

တပ်မတော် ကာကွယ်ရေး ဦးစီးချုပ်က ဆက်လက် ပြောကြားရာ၌ ''အမျိုးသားပြန်လည် သင့်မြတ်ရေးနဲ့ ငြိမ်းချမ်းရေး လုပ်ငန်းစဉ်များ အောင်မြင်စွာ အကောင်အထည် ဖော်ဆောင်ရွက်နိုင်ဖို့ အတွက် အဓိကနှလုံးသွင်း ကြရမယ့် အချက်နှစ်ချက် ကတော့ တိုင်းရင်းသား စည်းလုံးညီညွတ်ရေး မဟာဗျူဟာကို မျက်ခြည်မပြတ် ကျင့်သုံးခြင်းနဲ့ ထာဝရ ငြိမ်းချမ်းရေး ရယူရန်အတွက် အမှန်တကယ် ဆန္ဒရှိခြင်းတို့ပဲ ဖြစ်ကြောင်း'' တို့ကို ထည့်သွင်း ပြောကြားသည်။

သို့ဖြစ်၍ မြန်မာနိုင်ငံ ရရှိပြီးသော လွတ်လပ်ရေးနှင့် အချုပ်အခြာ အာဏာတည်တံ့ ခိုင်မြဲရေးသည် နိုင်ငံသားတို့၏ စည်းလုံးညီညွတ်မှု အပေါ် တည်မှီလျက်ရှိရာ တိုင်းရင်းသား ပြည်သူများနှင့် တပ်မတော်တို့သည် အရေးကြီးမှ သွေးစည်းသည့် အနေအထားမျိုးကို ကျော်လွန်၍ ပြည်ထောင်စုကြီး အကျိုးစီးပွားနှင့် ယှဉ်လာပါက အမြဲထာဝရ သွေးစည်းညီညွတ် နေကြရမည် ဖြစ်ကြောင်း မြဝတီ က တိုက်တွန်းနှိုးဆော် လိုက်ရပါသည်။

မြ၀တီနေ့စဉ်သတင်းစာ ၊ စာ(၂)

No comments:

Post a Comment

Related Posts Plugin for WordPress, Blogger...