ရန်ကုန် ၊ ၁၅-၃-၂၀၁၇
ရန်ကုန်မြို့ရှိ နိုင်ငံခြားဘာသာ တက္ကသိုလ် တွင် မြန်မာဘာသာ လာရောက် သင်ကြားသော ပြည်ပနိုင်ငံသားများ အနက် တရုတ်နိုင်ငံသား များသည် အများဆုံး ဖြစ်ကြောင်း ရန်ကုန်နိုင်ငံခြား ဘာသာတက္ကသိုလ် တာဝန်ရှိသူ တစ်ဦးထံမှ သိရသည်။
အဆိုပါ တက္ကသိုလ်၌ နိုင်ငံတကာ ကျောင်းသားများသည် မြန်မာဘာသာ နှင့်ပတ်သက်၍ ပြည်တွင်း၌ လာရောက် သင်ကြားရန် စိတ်ဝင်စားမှု များပြားကြောင်း၊ ရန်ကုန် နိုင်ငံခြားဘာသာ တက္ကသိုလ်၌ လက်ရှိတက်ရောက် လျက်ရှိသော အထူးပြု ဘာသာရပ် များ၏ ကျောင်းသား ဦးရေသည် မြန်မာဘာသာ ၂၄၉ ဦး၊ တရုတ်ဘာသာ ၃၉၆ ဦး၊ အင်္ဂလိပ်ဘာသာ ၄၄ဝ ဦး၊ အီတာလျံ ဘာသာ ၂၈ ဦး၊ ပြင်သစ်ဘာသာ ၄၅၁ ဦး၊ ဂျာမန်ဘာသာ ၃၂၄ ဦး၊ ဂျပန်ဘာသာ ၆၂၉ ဦး၊ ကိုရီးယားဘာသာ ၅၂၆ ဦး၊ အထွေထွေ ဘာသာဗေဒ ၁၄ ဦး၊ ရုရှားဘာသာ ၃၅၂ ဦး နှင့် ထိုင်းဘာသာ ၂၅၉ ဦးတို့ ရှိကြောင်း သိရသည်။
မြန်မာဘာသာ လာရောက် သင်ကြားသော ပြည်ပနိုင်ငံသား များသည် ပြည်တွင်း၌ စီးပွားရေး လုပ်ငန်းများ လာရောက်လုပ်ကိုင် လိုသူများပြီး မြန်မာဘာသာ စိတ်ဝင်စားသူများ အတွက် စီးပွားရေး လုပ်ငန်းသုံး မြန်မာစကား ဘာသာရပ်ကို အသစ်ထပ်မံ တိုးချဲ့သင်ကြား ပေးနိုင်ရန် သင်ရိုးညွှန်းတမ်း ကိုလည်း ရေးဆွဲလျက် ရှိကြောင်း သိရသည်။
၂ဝ၁၆-၂ဝ၁၇ ပညာသင်နှစ်တွင် ရန်ကုန် နိုင်ငံခြားဘာသာ တက္ကသိုလ် မြန်မာဘာသာ ဌာန၌ ပြည်ပမှ မြန်မာဘာသာ လာရောက် သင်ယူသော ကျောင်းသား၊ ကျောင်းသူ များသည် တောင်ကိုရီးယား နိုင်ငံမှ ၇၃ ဦး၊
ဂျပန်နိုင်ငံမှ ၂၈ ဦး၊ တရုတ်နိုင်ငံမှ ၁၁၂ ဦး၊ ထိုင်းနိုင်ငံမှ ကိုးဦး၊ ဗီယက်နမ်နိုင်ငံမှ လေးဦး၊ ဘင်္ဂလားဒေ့ရှ် နိုင်ငံမှ နှစ်ဦး၊ လာအိုနိုင်ငံမှ သုံးဦး၊ အိန္ဒိယနိုင်ငံမှ ရှစ်ဦး၊ မက္ကဆီကို နိုင်ငံမှ တစ်ဦး၊ အီတလီနိုင်ငံမှ နှစ်ဦး၊ အမေရိကန် နိုင်ငံမှတစ်ဦး ဖြင့် စုစုပေါင်း ၂၄၃ ဦးရှိကြောင်း သိရသည်။
မြန်မာနိုင်ငံအတွင်း စီးပွားရေးလုပ်ငန်း အခွင့်အလမ်းများ ရှိလာသည့်အတွက် မြန်မာဘာသာ လေ့လာသင်ယူ လိုသူ များပြားလာခြင်း ဖြစ်ပြီး ယင်းအနက် တရုတ်နိုင်ငံမှ လုပ်ငန်းများ အများဆုံး ရှိနေသောကြောင့် တရုတ် လူမျိုးများ လာရောက် သင်ယူမှု များပြားနေခြင်း ဖြစ်ကြောင်း သိရသည်။
မြ၀တီနေ့စဉ်သတင်းစာ ၊ စာ (၃)
No comments:
Post a Comment