ရန်ကုန် ၊ ၁၇-၆-၂၀၁၅
ယခုရက်ပိုင်း အတွင်း အမေရိကန် ဒေါ်လာ ဈေးအတက်အကျ များကြောင့် ပြည်တွင်း ဆေးဝါးဈေးကွက် ရှိ ဆေးဆိုင်များနှင့် ဆေးဝါး တင်သွင်းသူ တချို့မှာ တင်သွင်းဝယ်ယူ ရောင်းချမှု ခေတ္တရပ်ဆိုင်း ထားကြောင်း သိရသည်။
ပြည်တွင်း၌ အသုံးပြု နေသော ဆေးဝါး အများစုမှာ ပြည်ပ သွင်းကုန်များ ဖြစ်သည့် အတွက် ဒေါ်လာဈေး မတည်ငြိမ်မှု များသည် သွင်းကုန်ပစ္စည်း များပေါ်တွင် အကျိုး သက်ရောက်မှု များစွာရှိသည်။ သွင်းကုန် ဖြစ်သည့် ဆေးဝါးများနှင့် စားသောက်ကုန် များကို အားထားပြီး တင်သွင်း ရောင်းချ နေသူများ အနေဖြင့် ယခု ရက်ပိုင်းတွင် အရောင်းပိတ် ထားခြင်း၊ တင်သွင်းမှု ရပ်နား ထားခြင်းများ ရှိနေကြောင်း သိရသည်။
ဒေါ်လာဈေးနှုန်း မတည်ငြိမ်မှု များတွင် တင်သွင်းရန် ညှိနှိုင်းပြီးသည့် ကုမ္ပဏီများနှင့် ဆက်လက် တင်သွင်း နေသူများ ရှိသကဲ့သို့ ပြည်ပမှ ဆေးများ မှာယူတင်သွင်း ခြင်းကို ရပ်နားထားပြီး လက်ကျန် ဆေးဝါးများ ကိုသာ ထုတ်ရောင်း နေသူများလည်း ရှိသည်။ တချို့ ဆေးဝါးများမှာ ဈေးကွက်၌ ပစ္စည်းပြတ်လု နီးပါးရှိနေပြီး လက်လီ လက်ကား ဆေးဝါး အရောင်းဆိုင် များ၌လည်း အရောင်းအဝယ် ပါးနေကြောင်း သိရသည်။
ယခုရက်ပိုင်း ပြည်ပမှ တင်သွင်း လာသည့် ဆေးဝါးများတွင် အနိမ့်ဆုံး ဈေးနှုန်း ခုနစ်ကျပ်မှ အမြင့်ဆုံး ငွေကျပ် ၂ဝ ခန့်အထိ ဈေးတက်နေပြီး ပြည်တွင်းထုတ် တိုင်းရင်း ဆေးဝါး တချို့မှာလည်း အနိမ့်ဆုံး ငွေကျပ် ၅ဝ မှ ၁ဝဝ အထိ ဈေးနှုန်း မြင့်တက် နေကြောင်း သိရသည်။ ရန်ကုန်မြို့၌ ဆေးဝါး တင်သွင်းခွင့် ရရှိထားသည့် ကုမ္ပဏီကြီးနှင့် အလတ်စား ကုမ္ပဏီ ပေါင်း ၅ဝ ခန့် ရှိကြောင်း သိရသည်။
မြန်မာနိုင်ငံ အနေဖြင့် ပြည်ပ နိုင်ငံများနှင့် ကုန်သွယ်မှု ပြုလုပ်ရာတွင် ပင်လယ် ရေကြောင်း ကုန်သွယ်မှုနှင့် နယ်စပ် ကုန်သွယ်မှု လမ်းကြောင်း နှစ်ခုဖြင့် ကုန်သွယ်လျက် ရှိပြီး ပင်လယ် ရေကြောင်း ကုန်သွယ်မှုမှာ စားသုံးဆီ နှင့် စက်သုံးဆီ၊ ဆေးဝါး ကဲ့သို့သော ကုန်စည်များကို တင်သွင်းမှု များပြီး နယ်စပ် ကုန်သွယ်ရေး လမ်းကြောင်း ဖြစ်သည့် မြဝတီ နယ်စပ် ကုန်သွယ်ရေးမှ စားသောက်ကုန် မျိုးစုံနှင့် လူသုံးကုန် ပစ္စည်းများကို တင်သွင်းမှု များကြောင်း သိရသည်။
လင်းသူ
#Themyawadydaily
No comments:
Post a Comment