ရန်ကုန် ၊ ၂၁-၅-၂ဝ၁၅
ဆောက်လုပ်ခွင့် လိုင်စင် ရရှိထားသည့် ကန်ထရိုက်များ အနေဖြင့် မိမိ ဆောက်လုပ်ရန် တာဝန်ယူ ထားသော ကန်ထရိုက် တိုက်များကို ဆက်လက် ဆောက်လုပ်ခြင်း မရှိဘဲ တိမ်းရှောင် သွားပါက ကန်ထရိုက် လိုင်စင်ကို ပိတ်သိမ်း၍ အရေးယူ သွားမည် ဖြစ်ကြောင်း ရန်ကုန်မြို့တော် စည်ပင် သာယာရေး ကော်မတီမှ တာဝန်ရှိသူ တစ်ဦးက ပြောသည်။
''အခုဆိုရင် ဆင်ခြေဖုံး ရပ်ကွက်တွေမှာ ကန်ထရိုက်တိုက် လေးတွေကို တော်တော် ဆောက်လုပ် လာကြတာ တွေ့ရတယ်။ ဆောက်လုပ်တဲ့ အခါမှာလည်း တချို့က လိုင်စင်ရှိတဲ့ ကန်ထရိုက်နဲ့ ဆောက်လုပ်တာ ရှိသလို တချို့က မသိဘဲနဲ့ လိုင်စင်မရှိတဲ့ ကန်ထရိုက် တွေနဲ့ ဆောက်လုပ် တာကို တွေ့ရတယ်။ တချို့က သူတို့အိမ်ကို ကန်ထရိုက်က မဆောက်တော့ဘူး ဆိုပြီး လာတိုင်တယ်။ ဒါပေမဲ့ ကန်ထရိုက်ကို ကြည့်လိုက် တော့လည်း လိုင်စင်မရှိဘူး။ လိုင်စင်ရှိတဲ့ ကန်ထရိုက် အများစု ကတော့ ဒီလိုမျိုး လုပ်တာ သိပ်မတွေ့ ရဘူး။ လိုင်စင်ရှိတဲ့ ကန်ထရိုက် တွေက ဒီလိုဆက်ပြီး မဆောက်ဘဲ တိမ်းရှောင် သွားမယ် ဆိုရင်တော့ သူတို့ရဲ့ လိုင်စင်ကို ပိတ်သိမ်း အရေးယူမှာ ဖြစ်ပါတယ်။ ကန်ထရိုက် ထွက်ပြေးသွားလို့ မြေရှင်နဲ့ ကြိုပွိုင့် ဝယ်ယူတဲ့ လူတွေက သူတို့ရဲ့ ကန်ထရိုက်တိုက် ကို ပြီးအောင် ဆက်ပြီး ဆောက်တာလည်း တွေ့ရပါတယ်။ လိုင်စင်မရှိတဲ့ ကန်ထရိုက်က ဆောက်တဲ့ တိုက်ခန်းဆိုရင် အဲဒီ ဆောက်လက်စ တိုက်ကိုပါ ဖြိုဖျက်တဲ့ အထိ အရေးယူ သွားမှာပါ'' ဟု ၄င်းက ဆက်လက် ပြောသည်။
အိမ်ခြံမြေ ဈေးကွက်များ အရောင်းအဝယ် အေးလာခြင်း ကြောင့် ကြိုပွိုင့် စနစ်ဖြင့် တိုက်ခန်းဝယ်ယူ ထားသူများက တိုက်ခန်းများကို ဈေးကစားခြင်းများ ပြုလုပ်လာခြင်း၊ တိုက်ခန်းများ အရောင်းအဝယ် အေးလာ သောကြောင့် ကန်ထရိုက်များ အနေဖြင့် ဆက်လက် ဆောက်လုပ်ရန် ငွေကြေး အခက်အခဲများ ရှိလာသည်။ ထို အခက်အခဲ များကြောင့် အဆိုပါ ကန်ထရိုက်တိုက် များကို ဆက်လက် ဆောက်လုပ်ခြင်း မပြုဘဲ တိမ်းရှောင်မှုများ ဖြစ်လာကြောင်း ကန်ထရိုက် တိုက်များကို တာဝန်ယူ ဆောက်လုပ် နေသည့် အသိုင်းအဝိုင်းမှ သိရသည်။
ချမ်းချမ်းကို
#Themyawadydaily
No comments:
Post a Comment