ငြိမ်းချမ်းသာယာသော လူ့ဘောင်လောက ဖြစ်စေဖို့
ယနေ့ လူ့လောကကြီးတွင် လောဘ၊ ဒေါသ၊ မောဟ၊ မာန်မာနတို့ ကြီးထွား လာသည်ကို တွေ့မြင် ကြားသိ နေကြရသည်။ ယခင်နှင့် မတူ အနိဋ္ဌာရုံများ၊ ရက်စက် ကြမ်းကြုတ်မှုများ၊ ဖောက်ဖျက် ကျူးလွန်မှုများ မကြာခဏ ဖြစ်ပေါ် နေပေသည်။
ယခင်က ဆိတ်ကွယ်ရာ၊ လူသူ ကင်းမဲ့ရာသို့ သွားလာပြီး အေးချမ်းစွာ စိတ်လွတ်၊ ကိုယ်လွတ် နေထိုင်နိုင် ကြသည်။ ယခု အချိန်အခါတွင် သွားလာ နေထိုင်ကြ ရမည်မှာ အထူးဝန်လေး နေကြရသည်။ အကြောင်းမှာ ဆိတ်ကွယ် ရာသည် ဘေးအန္တရာယ် မျိုးစုံ၊ မတော် မတရားမှု မျိုးစုံ ဖြစ်စေနိုင်သော ကြောင့် ဖြစ်သည်။
မြန်မာလူမျိုး များသည် ပင်ကိုယ် အားဖြင့် ရိုင်းပင်း ကူညီတတ်သူ၊ စာနာ ထောက်ထားတတ်သူ၊ ဖော်ရွေတတ်သူ၊ သည်းခံတတ်သူ၊ ရောင့်ရဲ တတ်သူများ ဖြစ်ကြသည်။ သို့သော် မကောင်းမှုများ အဘယ်ကြောင့် ဖြစ်ကြ ရသနည်း။ အကြမ်းဖျင်း အားဖြင့် သုံးသပ် ကြည့်သော် လူတို့သည် ယခင် နှင့်မတူဘဲ ရုန်းကန် လှုပ်ရှား လာကြ ရသည်။
''မကောင်းမြစ်တာ၊ ကောင်းရာ ညွှန်လတ်၊ အတတ်သင်စေ၊ ပေးဝေနှီးရင်း၊ ထိမ်းမြား ခြင်းလျှင် ဝတ်ငါးအင်'' တည်းဟူသော မိဘ ဝတ္တရားများ နည်းပါး ခဲ့သည်။ တစ်ဖက်မှ ''အတတ်လည်းသင်၊ ပဲ့ပြင်ဆုံးမ၊ သိပ္ပံမချန်၊ ဘေးရန်ဆီးကာ၊ သင့်ရာအပ်ပို့'' ဟူသည့် ဆရာ့ကျင့်ဝတ် လည်း နည်းပါး လာသည်။ ထို့ပြင် အခြားသော သား၊ သမီးကျင့်ဝတ်၊ တပည့်ကျင့်ဝတ်၊ လင့်ကျင့်ဝတ်၊ မယားကျင့်ဝတ်၊ မိတ်ဆွေ ကျင့်ဝတ်၊ အလုပ်ရှင် ကျင့်ဝတ်၊ အလုပ်သမား ကျင့်ဝတ်၊ ဒါယကာ ကျင့်ဝတ်၊ ရဟန်း ကျင့်ဝတ်၊ နာယက ကျင့်ဝတ် တို့သည်လည်း နည်းပါး လာခဲ့သည်။
အဆိုပါ ကျင့်ဝတ် များသည် မြန်မာတို့၏ ထုံးတမ်းစဉ်လာ လိုက်နာ အပ်သော လူတို့၏ ကျင့်ဝတ်များ (သို့မဟုတ်) လူမှုရေး ကျင့်ဝတ်များ ဖြစ်သည်။ ထို ကျင့်ဝတ်များကို လူတို့ မသိရှိ၍ ဖြစ်စေ၊ မနာယူ လိုက်ရ၍ ဖြစ်စေ၊ အကြောင်း ကြောင်းကြောင့် မကျင့်ကြံ နိုင်၍ ဖြစ်စေ လူတို့၏ စာရိတ္တများ ချို့ယွင်း လာခြင်း ဖြစ်သည်။
ထိုမျှနှင့်ပင် မပြီးသေးဘဲ ကာလဒေသ ပယောဂဟု ဆိုနိုင်သည့် မတော်လောဘ နှင့် မှားယွင်းသော အယူအဆ ရှိသူအချို့ တို့ကြောင့် မီးလောင်ရာ လေပင့် ဖြစ်ကြရသည်။ အသိအမြင် ခံယူချက် နည်းပါးသူ တို့ကို မကောင်းမှုသို့ တွန်းပို့ သကဲ့သို့ ဖြစ်စေသည်။
လူတိုင်း လူတိုင်းသည် အေးချမ်း သာယာသော လူ့ဘောင် လောကတွင် နေထိုင်လို ကြသည်။ မည်သူမျှ မိမိကိုယ်တိုင် သော်လည်းကောင်း၊ သူတစ်ပါးကို သော်လည်းကောင်း ဘေးဒုက္ခ မရောက် စေလိုကြ သူများ ဖြစ်သည်။ ဗုဒ္ဓ အဆုံးအမ အရ ပင်ကိုယ် ဆိုးသွမ်းခြင်း အရင်းခံ ရှိသူကိုပင် ချေချွတ် တော်မူနိုင် သဖြင့် အကြောင်းကြောင်း ကြောင့်သာ မဖြစ်သင့် မဖြစ်ထိုက် သည်များ ဖြစ်လာ ကြရသည်။
သို့ဖြစ်ရာ ငြိမ်းချမ်း သာယာသော လူ့ဘောင် လောကတွင် သာမက ချမ်းမြေ့စွာ အတူတကွ နေထိုင်နိုင်ကြ စေရန်အတွက် မကောင်းမှုကို ဖြစ်စေနိုင်သည့် တွန်းအား များကို ရှောင်ရှားကြပြီး မိမိကိုယ် မိမိ မကောင်းမှု မပြုမိအောင် ဆင်ခြင် နေထိုင် သွားကြရမည် ဖြစ်ပါကြောင်း အသိပေး ရေးသား လိုက်ရ ပေသည်။
( အယ်ဒီတာ့အာဘော် )
#Themyawadydaily
No comments:
Post a Comment