အရည်အသွေး ပြည့်မီသော အိုင်အိုဒင်းဆား စားသုံးရေး အလျင်မပြတ် ကြပ်မတ်ပေး
အယ်ဒီတာ့အာဘော်
( ၂၃-၁-၂၀၁၄ )
မြန်မာနိုင်ငံတွင် အိုင်အိုဒင်း ချို့တဲ့မှု ကာကွယ်ရေး လုပ်ငန်းများကို ၁၉၆၇ ခုနှစ်မှ စတင် ဆောင်ရွက်ခဲ့ပြီး ၁၉၉၇ ခုနှစ်တွင် ကျင်းပခဲ့သော (၂၄) ကြိမ်မြောက် အမျိုးသား ကျန်းမာရေး ကော်မတီ အစည်းအဝေး ၌ တစ်နိုင်ငံလုံး အိုင်အိုဒင်းဆား စားသုံးရေး နည်းဗျူဟာ ချမှတ်၍ အိုင်အိုဒင်း ချို့တဲ့မှု ကာကွယ်ရေးမှ အိုင်အိုဒင်း ချို့တဲ့မှု ပပျောက်ရေး သို့ ရည်မှန်း ဆောင်ရွက် ခဲ့သည်။
အိုင်အိုဒင်း ချို့တဲ့မှု ပပျောက်ရေး စီမံချက် အကောင် အထည်ဖော် ရာတွင် အဓိက ကျသော အရည် အသွေးပြည့် အိုင်အိုဒင်းဆား ထုတ်လုပ် ဖြန့်ဖြူးရေး လုပ်ငန်းကို သတ္တုတွင်း ဝန်ကြီးဌာန မြန်မာ့ဆား နှင့် အဏ္ဏဝါ ဓာတုပစ္စည်း ထုတ်လုပ်ရေး နှင့် ရောင်းဝယ်ရေး လုပ်ငန်းက တာဝန်ယူ ဆောင်ရွက်လျက် ရှိသည်။ ဆား အက်ဥပဒေကို ပြင်ဆင် တိုးချဲ့ ပြဋ္ဌာန်းခဲ့ပြီး ဆား ထုတ်လုပ်သူများ ၊ ဆား ကြိတ်ခွဲသူများ နှင့် ပူးပေါင်း၍ တစ်နိုင်ငံလုံး စားသုံးရန် လိုအပ်သော အိုင်အိုဒင်းဆား ပမာဏကို ၂ဝဝဝ ပြည့်နှစ်မှ စ၍ ပြည့်မီအောင် ထုတ်လုပ် နိုင်ခဲ့သည်။ ပိုတက်ဆီယမ် အိုင်အိုဒိုက် (KIO3) အလျင်မီအောင် ဝယ်ယူ ရရှိရေး အတွက် ယူနီဆက် (UNICEF) ၏ ကူညီ ပံ့ပိုးမှုဖြင့် စီစဉ် ထားရှိပြီး လုပ်ငန်း လည်ပတ်ရေး ရန်ပုံငွေ စနစ်တစ်ရပ် ကိုလည်း ခိုင်မာစွာ ထားရှိပြီး ဖြစ်သည်။ အိုင်အိုဒင်းဆား ထုတ်လုပ်သည့် နည်းစနစ် မှာ ကြိတ်ပြီး ဆားချောများ တွင် သတ်မှတ် ထားသော ပိုတက်ဆီယမ် အိုင်အိုဒိုက် (KIO3) ဖြည့်ပေးခြင်း ဖြစ်သည်။
အိုင်အိုဒင်းဆား အရည်အသွေး ပြည့်မီရေး မှာ ထုတ်လုပ်မှု ၊ သိုလှောင်မှု ၊ သယ်ယူ ပို့ဆောင်မှု ၊ လက်ကား ရောင်းချမှု ၊ လက်လီ ရောင်းချမှု အဆင့်ဆင့် တို့တွင် အရည်အသွေး ပြည့်မီမှသာ စားသုံးသူများ အတွက် အရည်အသွေး ပြည့်မီသော အိုင်အိုဒင်းဆား စားသုံးနိုင်မည် ဖြစ်သည်။ အိုင်အိုဒင်းဆား ထုတ်လုပ် ၊ တင်သွင်း ၊ သိုလှောင် ရောင်းချခြင်း တို့တွင် အိုင်အိုဒင်း ပါဝင်ရမည့် စံနှုန်းများ သတ်မှတ် ထားရာ ထုတ်လုပ်သူ / စက်ရုံအဆင့် တွင် အိုင်အိုဒင်း ဓာတ် ၄ဝ မှ ၆ဝ PPm ၊ လက်ကား ရောင်းဝယ်/ သိုလှောင် အဆင့်တွင် ၃ဝ PPm ၊ လက်လီ ဝယ်ရောင်း အဆင့်တွင် ၁၅ PPm နှင့် စားသုံးသူ အိမ်ထောင်စု အဆင့်တွင် ၁၅ PPm အသီးသီး ပါဝင်ရမည် ဖြစ်သည်။ PPm သည် အပုံ တစ်သန်းတွင် ပါဝင်ရမည့် အပုံ အရေအတွက် ဖြစ်ကြောင်း သိရသည်။
အိုင်အိုဒင်းဆား လက်လီ ရောင်းချသူ များသည် စားသုံးသူများ နှင့် တိုက်ရိုက် ထိတွေ့ ရသူများ ဖြစ်သည်။ မိမိတို့ ရောင်းချနေသော အိုင်အိုဒင်းဆား အရည်အသွေး ကို မိမိတို့ ကိုယ်တိုင် စမ်းသပ် စစ်ဆေးခြင်း နှင့် စားသုံးသူ များအား အိုင်အိုဒင်းဆား စားသုံးခြင်းကြောင့် ရရှိနိုင်သည့် ကျန်းမာရေး သုခကို ပညာပေးခြင်း များ ဆောင်ရွက် ကြရမည် ဖြစ်သည်။ စားသုံးသူများ ကလည်း အရည်အသွေး ပြည့်မီသော အိုင်အိုဒင်းဆား ကို ဝယ်ယူ စားသုံး ကြမှသာ အိုင်အိုဒင်း ချို့တဲ့ခြင်းကြောင့် ဖြစ်ပေါ်နိုင်သော ရောဂါများ ကင်းဝေး နိုင်မည် ဖြစ်သည်။
မြန်မာနိုင်ငံ အစားအသောက် နှင့် ဆေးဝါး အာဏာပိုင် အဖွဲ့က ၂ဝ၁ဝ ပြည့်နှစ် သြဂုတ်လ အထိ ပြုစုထားသော စာရင်းများ အရ ဒေသအလိုက် အိုင်အိုဒင်းဆား အရည်အသွေး စစ်ဆေးသည့် ဓာတ်ခွဲခန်း ရှိသောမြို့နယ် ၁ဝ၉ မြို့နယ် ရှိကြောင်း တွေ့ရသည်။
သို့ဖြစ်၍ ပြည်သူများ အရည်အသွေး ပြည့်မီသော အိုင်အိုဒင်းဆား စားသုံးနိုင်ရေး ထုတ်လုပ် ၊ သယ်ယူ ၊ ရောင်းချ သည့် လုပ်ငန်း အဆင့်ဆင့် တို့တွင် စစ်ဆေး ကြပ်မတ်မှု အလျင်မပြတ် ဆောင်ရွက် ပေးကြပါရန် တိုက်တွန်း နှိုးဆော် လိုက်ရပါသည်။ ။
No comments:
Post a Comment