မြန်မာနိုင်ငံ ဂီတအစည်းအရုံး (ဗဟို) ၂ဝ၁၈ ခုနှစ်၊ အဋ္ဌမအကြိမ်မြောက် သက်ကြီးဂီတ ပညာရှင်များအား ပူဇော် ကန်တော့ပွဲ ကျင်းပ

-

နေပြည်တော်  ဒီဇင်ဘာ  ၁၉ 

-

မြန်မာနိုင်ငံဂီတ အစည်းအရုံး(ဗဟို)၏ ၂ဝ၁၈ ခုနှစ်၊ အဋ္ဌမအကြိမ်မြောက် သက်ကြီး ဂီတပညာရှင်များအား ပူဇော်ကန်တော့ပွဲကို ယနေ့မွန်းလွဲပိုင်းတွင် ရန်ကုန်မြို့ရှိ Sky Star Hotel တွင်ကျင်းပရာ ရန်ကုန်တိုင်း စစ်ဌာန ချုပ် တိုင်းမှူး ဗိုလ်ချုပ်သက်ပုံနှင့်   တာဝန်ရှိသူများ   တက်ရောက်ဂါရဝပြု ကန်တော့သည်။ 

-

အဆိုပါပူဇော်ကန်တော့ပွဲသို့ မြန်မာနိုင်ငံ ဂီတအစည်းအရုံး(ဗဟို)ဥက္ကဋ္ဌ ဦးတင်ဦးလေး၊ ကန်တော့ခံဆရာကြီးများ ဖြစ်ကြသည့် ဗိုလ်ကလေးတင့်အောင်၊ ဂီတနက်သံဦးအုန်းလွင်၊ ဦးခင်မောင်ဦးနှင့် ဂီတပညာရှင်ကြီးများ၊ မြန်မာနိုင်ငံ ဂီတ အစည်းအရုံးမှ တာဝန်ရှိသူများ တက်ရောက်ကြသည်။ 

-

ဦးစွာ မြန်မာနိုင်ငံဂီတ အစည်းအရုံး(ဗဟို) ဥက္ကဋ္ဌက   နှုတ်ခွန်းဆက်စကား ပြောကြားသည်။ ယင်းသို့ပြောကြားရာတွင်  ပူဇာစပူဇနေယျာနံ၊ ဧတံမင်္ဂလမုတ္တမံဆိုတဲ့ မင်္ဂလာတရား တော်နှင့်အညီ ပူဇော်ထိုက်သူများကို ပူဇော်ခြင်းတည်း ဟူသော သက်ကြီးဂီတ ပညာရှင် ကြီးများအား ပူဇော်ပွဲ ကျင်းပပြုလုပ်ခဲ့ရာ ယခုဆိုလျှင် အဋ္ဌမအကြိမ်မြောက် ရောက်ရှိခဲ့ပြီ ဖြစ်ကြောင်း၊ အသက်ကြီးတာတစ်ခုတည်း အတွက်မဟုတ်ဘဲ ဂီတနှင့် ပတ်သက်ပြီး နိုင်ငံ တော်အတွက်၊ ဂီတလောကအတွက် အကျိုးပြုနိုင်ခဲ့သည့်   ပညာရှင်ကြီးများဖြစ်သည့် အတွက် ပူဇော်ကန်တော့ခြင်း ဖြစ်ကြောင်း ပြောကြားခဲ့သည်။ 

-

ထို့နောက် တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီးမင်းအောင်လှိုင် ကိုယ်စား ရန်ကုန်တိုင်း စစ်ဌာနချုပ် တိုင်းမှူး ဗိုလ်ချုပ်သက်ပုံက ကန်တော့ လက်ဆောင်ပစ္စည်းများ ကိုပေးအပ်သည်။ ယင်းနောက် တက်ရောက် လာကြသူများက ဂီတပညာရှင်ကြီးများအား ကန်တော့ချိုးဖြင့် ပူဇော်ကန်တော့ကြသည်။ ဆက်လက်၍ ဂီတပညာရှင်ကြီးများအား မိတ်ဆက်ပေးခြင်းနှင့် ကန်တော့လက်ဆောင်ပေးအပ်ခြင်းများ ပြုလုပ်ကြပြီး သက်ကြီးဂီတ ပညာရှင်များ ကိုယ်စား ကန်တော့ခံ ဂီတပညာရှင် ဗိုလ်ကလေးတင့်အောင်က သြဝါဒစကား ပြန်လည်ပြောကြားသည်။ 

-

၂ဝ၁၈  ခုနှစ်၊   အဋ္ဌမအကြိမ်မြောက် သက်ကြီးဂီတ ပညာရှင်ကြီးများ ပူဇော်ပွဲတွင်  ဂီတပညာရှင် ၁၂၉ ဦးအား ပူဇော်ကန်တော့ခဲ့ကြပြီး တပ်မတော်ကာကွယ်ရေး ဦးစီးချုပ် က ဂီတပညာရှင်များအတွက် ပေးပို့ဂါရဝပြု ကန်တော့သည့် ငွေကျပ် ၆၃၅ဝဝဝဝ ကျော် တန်ဖိုးရှိ ပစ္စည်းနှင့် ငွေသားများအား တပ်မတော်ကာကွယ်ရေး ဦးစီးချုပ်ကိုယ်စား ရန်ကုန် တိုင်းစစ်ဌာနချုပ် တိုင်းမှူးက ဂါရဝပြုပေးအပ်ခဲ့ပြီး မြန်မာနိုင်ငံဂီတ အစည်းအရုံး(ဗဟို)မှ ကန်တော့ခံ ဆရာကြီးများအတွက် အသက် ၈ဝ နှင့် အထက် ဂီတပညာရှင်များအား တစ်ဦးလျှင် ငွေကျပ်နှစ်သိန်းနှင့် အသက် ၇၅ နှစ် နှင့်အထက် ဂီတပညာရှင် တစ်ဦးလျှင် ငွေကျပ် တစ်သိန်းခွဲတို့ကို ဂါရဝပြု ပေးအပ်ခဲ့ကြောင်း သတင်း ရရှိ သည်။                 

-

(၁ဝဝ)

-

#မြ၀တီနေ့စဉ်သတင်းစာ