ရခိုင်ပြည်နယ်အတွင်းရှိ နေရပ်စွန့်ခွာ ပြည်သူများ ပြန်လည် လက်ခံရေး လုပ်ငန်းစဉ်တွင် အာဆီယံမှ ပူးပေါင်းဆောင်ရွက်နိုင်ရေး ကွင်းဆင်း လေ့လာ

-

နေပြည်တော်  ဒီဇင်ဘာ  ၁၇ 

-

ရခိုင်ပြည်နယ်အတွင်းရှိ နေရပ်စွန့်ခွာသူများကို ပြန်လည်လက်ခံရေး လုပ်ငန်းစဉ်တွင် အာဆီယံအနေဖြင့် ပူးပေါင်း ဆောင်ရွက်နိုင်ရေး အတွက် နိုဝင်ဘာလတွင် ကျင်းပခဲ့သည့် (၃၃)ကြိမ်မြောက် အာဆီယံထိပ်သီး အစည်းအဝေး၌ အတည်ပြု ဆုံးဖြတ်ခဲ့သည်။ 

-

အဆိုပါအစည်းအဝေး ဆုံးဖြတ်ချက်အရ ပြန်လည်လက်ခံရေး လုပ်ငန်းစဉ်အတွက် လိုအပ်ချက်များကို ဆန်းစစ်ဖော်ထုတ်ရန်နှင့် အာဆီယံမှ ပူးပေါင်းဆောင်ရွက်နိုင်မည့် ကိစ္စရပ်များကို ညှိနှိုင်းပေါင်းစပ် ဆောင်ရွက်ရန်အတွက် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာနသည် အာဆီယံအတွင်းရေးမှူးချုပ်ရုံး သဘာဝဘေး စီမံခန့်ခွဲမှုအတွက် လူသားချင်း စာနာကူညီမှုဆိုင်ရာ အာဆီယံ ညှိနှိုင်းရေးမှူးရုံးတို့နှင့် ကြိုတင်ညှိနှိုင်းမှုများကို ဆောင်ရွက်ခဲ့သည်။ 

-

မြန်မာနိုင်ငံက အကောင်အထည်ဖော် ဆောင်ရွက်လျက်ရှိသည့် ပြန်လည်လက်ခံရေး လုပ်ငန်းစဉ်များ၏ ပြီးစီးမှုအခြေအနေများကို လေ့လာနိုင်ရန်အတွက် အာဆီယံ အတွင်းရေးမှူးချုပ်  H.E. Mr. Lim Jock Hoi ၊ လူမှုရေးနှင့် ယဉ်ကျေးမှု အသိုက်အဝန်းဆိုင်ရာ အာဆီယံ ဒုတိယ အတွင်းရေးမှူးချုပ်နှင့် သဘာဝဘေး စီမံခန့်ခွဲမှုအတွက် လူသားချင်း စာနာကူညီမှုဆိုင်ရာ အာဆီယံညှိနှိုင်းရေးမှူးရုံး၏ အမှုဆောင် ညွှန်ကြားရေးမှူး ဦးဆောင်သော ကိုယ်စားလှယ်အဖွဲ့သည် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဦးစိုးအောင်နှင့်အတူ ရခိုင်ပြည်နယ် မောင်တောမြို့နယ်ရှိ တောင်ပြိုလက်ဝဲ ပြန်လည်လက်ခံရေးစခန်း၊ ငါးခူရပြန်လည် လက်ခံရေးစခန်း၊  လှဖိုးခေါင် ကြားစခန်းနှင့် ရွှေဇားကျေးရွာများ၌ မြေပြင် ဆောင်ရွက်ပြီးစီးမှုများကို လိုက်လံကြည့်ရှုကြသည်။ 

-

မောင်တောမြို့နယ် အတွင်းရှိ  တောင်ပြိုလက်ဝဲနှင့် ငါးခူရပြန်လည် လက်ခံရေးစခန်းများတွင် အခြေခံ အဆောက်အဦများ တည်ဆောက်ထားမှု၊ လူဝင်မှုကြီးကြပ်ရေးဆိုင်ရာ စိစစ်ရေး လုပ်ငန်းများ၊ နေထိုင်စားသောက်ရေးတို့ အတွက် ကြိုတင်ပြင်ဆင်ထားမှု၊ လူ့အသုံးအဆောင်ပစ္စည်းများ ထောက်ပံ့ပေးရန် စီစဉ်ထားမှုများကို ကြည့်ရှုလေ့လာ ခဲ့ကြသည်။ ထို့နောက် လှဖိုးခေါင်ကြားစခန်းသို့ ရောက်ရှိပြီး လက်ခံရေး စခန်းများမှ ရောက်ရှိလာသူများ ခေတ္တနေထိုင်နိုင်ရေးအတွက် လူနေထိုင်ရန် အိမ်ခန်းတွဲများ တည်ဆောက်ထားမှု၊  တရုတ်ပြည်သူ့သမ္မတနိုင်ငံမှ လှူဒါန်းထားသည့် Modular Houses များ စီစဉ်ထားမှု၊ ကျန်းမာရေး စောင့်ရှောက်မှု၊  ရေနှင့်ပတ်ဝန်းကျင် သန့်ရှင်းရေးအတွက် စီစဉ်ထားမှုများ၊ အသက်မွေးဝမ်းကျောင်းနှင့် ဝင်ငွေရရှိရေး လုပ်ငန်းများ ကြိုတင်ပြင်ဆင်ထားမှု၊ ယာယီစာသင်ခန်းများ၊ ကျန်းမာရေး ဆေးပေးခန်းများ၊ ကလေးငယ်များအတွက် ကလေးပျော်နေရာများနှင့်  အမျိုးသမီးများအတွက် အိမ်တွင်းမှု လုပ်ငန်းများ ကြိုတင်ပြင်ဆင်ထားမှုများကို ကြည့်ရှုလေ့လာကြသည်။ 

-

ထိုမှတစ်ဆင့်  ကိုယ်စားလှယ်အဖွဲ့သည် ရွှေဇားကျေးရွာသို့ ရောက်ရှိပြီး ကျေးရွာသူ၊ ကျေးရွာသားများနှင့် တွေ့ဆုံ၍ ရင်းရင်းနှီးနှီး နှုတ်ဆက်စကား ပြောကြားကြပြီး ကျေးရွာအတွင်း နေရပ်စွန့်ခွာသူများအတွက် ပြန်လည်အခြေချနေ ထိုင်ရန် UEHRD ဦးဆောင်မှု၊ အိန္ဒိယနိုင်ငံမှ လှူဒါန်းသည့်  လူနေအိမ်များ တည်ဆောက်ထားမှုကို လိုက်လံကြည့်ရှုကြသည်။ မွန်းလွဲပိုင်းတွင် ကိုယ်စားလှယ်အဖွဲ့သည် စစ်တွေမြို့ ပြည်နယ် အစိုးရအဖွဲ့ရုံး၌  ပြည်နယ်ဝန်ကြီးချုပ်  ဦးညီပုနှင့် တွေ့ဆုံ၍  ခရီးစဉ်၏ ရည်ရွယ်ချက်နှင့် ဆက်လက်ပူးပေါင်း ဆောင်ရွက်မည့် လုပ်ငန်းစဉ်များကို ရင်းရင်းနှီးနှီး ဆွေးနွေး ပြောကြားကြသည်။

-

#မြ၀တီနေ့စဉ်သတင်းစာ