အင်ဒိုနီးရှား နိုင်ငံ၏ တပ်မတော်နေ့ အထိမ်းအမှတ် ဧည့်ခံပွဲ အခမ်းအနား ကျင်းပ

-

နေပြည်တော် အောက်တိုဘာ ၁၅                                      

-

အင်ဒိုနီးရှားနိုင်ငံ၏   (၇၃)နှစ်မြောက် တပ်မတော်နေ့ အထိမ်းအမှတ် ဧည့်ခံပွဲအခမ်းအနားကို ယနေ့ညနေပိုင်းတွင် ရန်ကုန်မြို့၊ ကမ္ဘာအေးဘုရားလမ်းရှိ Melia Hotel ၌ ကျင်းပပြုလုပ်ရာ ရန်ကုန်တိုင်းစစ်ဌာနချုပ် တိုင်းမှူး  ဗိုလ်ချုပ်သက်ပုံနှင့်  တပ်မတော် အရာရှိကြီးများ၊  ရန်ကုန်မြို့ရှိ  နိုင်ငံခြား သံရုံးများမှ သံအမတ်ကြီးများ၊ သံရုံးယာယီတာဝန်ခံများ၊ စစ်သံမှူးများ၊ ကုလသမဂ္ဂဆိုင်ရာ ဌာနေကိုယ်စားလှယ်များနှင့်  ဖိတ်ကြားထားသူများ တက်ရောက်ကြ သည်။

-

ဦးစွာ ဧည့်ခံပွဲသို့ တက်ရောက်လာသည့် တိုင်းမှူး  ဗိုလ်ချုပ်သက်ပုံနှင့် တပ်မတော် အရာရှိကြီးများ၊  ဧည့်သည်တော်များအား မြန်မာနိုင်ငံဆိုင်ရာ   အင်ဒိုနီးရှားနိုင်ငံ သံအမတ်ကြီး  H.E. Prof. Dr. Iza fadri ၊ စစ်သံမှူး Colonel Tri Handaka နှင့်တာဝန်ရှိသူတို့က ကြိုဆို နှုတ်ဆက်ကြသည်။

-

ထို့နောက် တိုင်းမှူး၊ သံအမတ်ကြီးနှင့် စစ်သံမှူးတို့သည် နိုင်ငံတော် သီချင်းများဖြင့် နှစ်နိုင်ငံအလံကို အလေးပြုကြပြီး အင်ဒိုနီးရှား နိုင်ငံ၏(၇၃)နှစ်မြောက် တပ်မတော်နေ့ အထိမ်းအမှတ် ကိတ်အား  လှီးဖြတ်ပေးကြသည်။

-

ဆက်လက်၍  အခမ်းအနား တက်ရောက်လာသူများနှင့်အတူ   စုပေါင်းမှတ်တမ်းတင် ဓာတ်ပုံရိုက်ကြသည်။ ယင်းနောက် သံအမတ်ကြီးနှင့်  စစ်သံမှူးတို့က   ညစာစားပွဲဖြင့် တည်ခင်း ဧည့်ခံခဲ့ကြောင်း သတင်း ရရှိသည်။ 

-

 (၁ဝဝ)

#မြ၀တီနေ့စဉ်သတင်းစာ