တာပေါင်နိမ့်ကျမှုဖြစ်ပွားခဲ့သည့် င/လပွေ့ဒီရေထိန်းဆည်တာတမံကိုတွေ့ရစဉ်။
ကျောက်ဖြူ ၃၁-၅-၂၀၁၇
ရခိုင်ပြည်နယ် ကျောက်ဖြူခရိုင်အတွင်း၌ မေ ၂၉ ရက် ညပိုင်းက ဆိုင်ကလုန်းမုန်တိုင်း မိုရာတိုက်ခတ်မှုကြောင့် ကျောက်ဖြူမြို့နယ် ပြင်ဖြူမော်ကျေးရွာရှိ င/လပွေ့ဒီရေထိန်း ဆည်တာတမံ ၃/၂၊ ၃/၃ ကြားရှိ တာပေါင် ၆ ပေခန့် မှာထူးကဲဒီရေကြီး လှိုင်းပုတ်မှု ဖြစ်ပွားပြီး တာပေါင်နိမ့်ကျမှု ဖြစ်ပွားခဲ့သည်။
၎င်းအပြင် ကလန့်တဲ ကျေးရွာအုပ်စု မရွင်းကျေးရွာ အခြေခံပညာ အထက်တန်းကျောင်း (ခွဲ) ကျောင်းဆောင်သစ် မျက်နှာကြက်များ အောက်သို့ပြိုကျ ပျက်စီးပြီး အဆိုပါကျေးရွာနေ ဦးအောင်ဖြူသီး၏ နေအိမ်အဖီအောက်တွင်မီးဖိုရာမှ လေပြင်းတိုက်ခတ်မှုကြောင့် နေအိမ်မီးလောင်မှု ဖြစ်ပွားခဲ့သည်။
အလားတူ သဲတန်းအုပ်စု တန်းခရိုးရွာနေ ဦးနိုင်ဦးကျော်၏ နေအိမ်ပေါ်သို့ အုန်းပင်လဲကျခဲ့ပြီး စနဲမြို့ တောင်ငူစုရပ်ကွက်ရှိ မြန်မာ့ဆက်သွယ်ရေး စာတိုက် ကြေးနန်းအဆောက် အအုံ၏ခေါင်မိုး သစ်သားတန်းများနှင့် သံဖြူ ၃၁ ချပ် ကွာကျပျက်စီးခဲ့သည်။
ထို့ပြင် ယနေ့နံနက်ပိုင်းတွင် လေပြင်းတိုက်ခတ်မှုကြောင့် စနဲမြို့ စနဲရဲကင်းလူနေအိမ် လိုင်းအဆောက်အအုံ တစ်ခုပျက်စီးခဲ့ကြောင်း၊ စနဲမြို့ တောင်ငူစုရပ်ကွက် မှိုင်းဇလီချောင်း တံတားကမ်းကပ်ခုံရွေ့လျားပျက်စီးခဲ့ကြောင်း၊အလားတူ ခရိုင်ရဲတပ်ဖွဲ့ ရဲသင်တန်းဆောင်မှာ အမိုးလန်ပျက်စီးခဲ့ပြီး ခရိုင်ရဲတပ်ဖွဲ့ အခြားအဆင့်ဧည့်ရိပ်သာတွင် သွပ်ပြားများ ပြိုကျပျက်စီးခဲ့ကြောင်း၊ ကျောက်တလုံး IDP စခန်းတွင် လိုင်းခန်းသုံးခု ပြိုကျပျက်စီးပြီး ရမ်းဗြဲ မြို့ရှိ လူနေအိမ် နှစ်လုံး၊ စာသင်ကျောင်း ခြောက်ကျောင်း၊ ဘုန်းကြီးကျောင်း နှစ်ကျောင်း၊ ဈေးတစ်ခုတို့ ပျက်စီးဆုံးရှုံးခဲ့ကြောင်း၊ လူနှင့်တရိစ္ဆာန်များ ထိခိုက်ဒဏ်ရာ ရရှိမှုရှိကြောင်း သိရသည်။
#Themyawdaydaily
No comments:
Post a Comment