နယူးယောက် ၊ ၂၉-၁-၂၀၁၆
အာရှပစိဖိတ်တွင် ပင်လယ် ရေမျက်နှာပြင် ပူနွေးမှုများ ဖြစ်ပေါ် နေသောကြောင့် ရေခန်းခြောက်မှုများ၊ ကုန်းနေရေနေ သတ္တဝါများ သေဆုံးမှု မြင့်တက်လာကြောင်း UNICEF က ထုတ်ပြန် ကြေညာခဲ့သည်။
ထို့ကြောင့် UNICEF အနေဖြင့် ရေခန်းခြောက်မှုများ ၊ ကုန်းနေရေနေ သတ္တဝါများ သေဆုံးမှုဖြင့် ရင်ဆိုင်နေရသော ဒေသများအတွက် ကူညီပံ့ပိုး ပေးမှုများ ပြုလုပ်သွားရန် အတွက် ငွေပမာဏ အမေရိကန် ဒေါ်လာ ၆၂ သန်းထိ ရည်ရွယ်ထားသည် ဟု ဇန်နဝါရီ ၂၇ ရက်က ကြေညာခဲ့သည်။
''အာရှ-ပစိဖိတ် ဒေသတွေမှာ ပင်လယ် ရေမျက်နှာပြင် ပူနွေးမှုတွေနဲ့ ရင်ဆိုင် နေရပါတယ်။ ပင်လယ် ရေမျက်နှာပြင် ပူနွေးမှုနှုန်းက လာမယ့် တစ်ပတ်အတွင်းမှာ အမြင့်ဆုံး အနေအထား ကို ရောက်ရှိလာနိုင် ပါတယ်'' ဟု UNICEF မှ တာဝန်ရှိသူ ခရစ်ရ်ှနားမာတီ က ပြောကြားခဲ့သည်။
''အရှေ့တီမောကို သွားရောက် လည်ပတ်ခဲ့ ပါတယ်။ နိုင်ငံတွင်းမှာ အဓိက အားထားနေ ရတဲ့ မြစ်တွေ၊ ချောင်းတွေ ရေခန်းခြောက် မှုနဲ့ ရင်ဆိုင်နေကြ ရတယ်။ စိမ်းလန်းနေတဲ့ လယ်ကွင်းပြင် တွေတော့ မြင်တွေ့ခဲ့ ရပါတယ်။
ဒါပေမဲ့ လယ်ကွင်းထဲမှာ စပါးတွေမရှိဘဲ မြက်ပင်တွေ ပေါက်နေပါတယ်။ ရေခန်းခြောက် နေတော့ စပါးစိုက် မရဘူးလို့ ဒေသခံတွေဆီက နေသိရတယ်'' ဟု မကြာသေးမီက အရှေ့တီမော သို့ သွားရောက် လေ့လာ ခဲ့သော ခရစ်ရ်ှနားမာတီ က ပြောကြားခဲ့သည်။
UNICEF အနေဖြင့် မြန်မာနိုင်ငံရှိ ကချင်ပြည်နယ်၊ ရှမ်းပြည်နယ်နှင့် ရခိုင်ပြည်နယ် တို့တွင် အမေရိကန် ဒေါ်လာ ၂၅ သန်း ကူညီပံ့ပိုး ပေးသွားရန် လျာထားပြီး မြောက်ကိုရီးယား နိုင်ငံကို အမေရိကန်ဒေါ်လာ ၁၈ သန်း၊ ဖိလစ်ပိုင်နိုင်ငံကို အမေရိကန် ဒေါ်လာ ၁ဝ သန်းနှင့် ပစိဖိတ်မှ ကျွန်းစုနိုင်ငံ များကို အမေရိကန် ဒေါ်လာငါးသန်း ကူညီပေးသွားရန် ပြင်ဆင် နေကြောင်း သိရသည်။
ရတနာပုံနေ့စဉ် ၊ စာ(၂၁)
No comments:
Post a Comment