စာဖတ်အလေ့ မပျောက်စေချင်ပါ
ရွှေမိုး (ရပ်စောက်)
စာရေးသူ၏ စာဖတ် ဝါသနာ သည် ငယ်စဉ် ကလေးဘဝ ကပင် စတင်ခဲ့ ပါသည်။ ဦးလေး တော်သူက မြို့နယ် သတင်းထောက် နှင့် သတင်းစာ ကိုယ်စားလှယ် တစ်ဦး ဖြစ်ခြင်းကြောင့် ဟု ဆိုရပါမည်။
မနက် မိုးလင်းသည် နှင့် ရန်ကုန်မြို့ကြီး မှ ရထားနှင့် ဖြစ်စေ၊ ကားနှင့် ဖြစ်စေ ပို့လိုက်သော သတင်းစာ အထုပ်ကြီး၊ အထုပ်ငယ် တို့သည် စာရေးသူ၏ အိမ်သို့ ရောက်ရှိ လာသည်။ ထိုမှ သတင်းစာ ပို့သူ လူငယ်များက သတင်းစာ များကို အမျိုးအစား ခွဲသည်။ ပြီးမှ သတင်းစာ ယူသည့် အိမ်အရောက် ပို့ဆောင် ကြသည်။
ဤမြင်ကွင်း များမှာ စာရေးသူ နေ့စဉ် တွေ့မြင် ရသော မြင်ကွင်း များပင် ဖြစ်သည်။ ထို့ကြောင့် စာရေးသူသည် မနက် မိုးလင်းသည် နှင့် သတင်းစာ မျိုးစုံကို ဖတ်ရှုရခြင်း ဖြင့် စာဖတ် ဝါသနာ မျိုးစေ့ကို ရရှိခဲ့ခြင်း ဖြစ်သည်။စာရေးသူတို့ ငယ်စဉ်က စွဲလမ်းခဲ့ ရသည့် ကာတွန်း ဇာတ်ကောင်များမှာ ကာတွန်း အောင်ရှိန် ၏ ဦးစံရှား နှင့် ဦးဒိန်းဒေါင်၊ ကာတွန်း မြင့်သိန်း ၏ စံရွှေမြင့်၊ ကာတွန်း ဝင်းမောင် ၏ မိမော်မေ စသည်တို့ကို အမှတ်ရ နေမိသည်။
စာရေးသူသည် မိသားစုနှင့် အတူ ရှမ်းပြည်နယ် (တောင်ပိုင်း) တောင်ကြီးခရိုင် ရှိ ရပ်စောက်မြို့ သို့ ပြောင်းရွှေ့ ရသော်လည်း စာပေ ရေးသားခြင်းနှင့် စာဖတ် ဝါသနာ ကတော့ ဆက်လက် ရှင်သန်လျက် ရှိခဲ့သည်။
ရပ်စောက်မြို့ရှိ ပြန်ကြားရေး နှင့် ပြည်သူ့ ဆက်ဆံရေးရုံး တွင် ဗဟုသုတ ဖြစ်ဖွယ်ရာ စာအုပ်များမှာ စုံလင်လှသည်။ သတင်းစာ၊ ဂျာနယ်၊ သုတ၊ နိုင်ငံရေး၊ လူမှုရေး၊ စီးပွားရေးများ အပြင် စာပေ ရေချမ်းစင်တွင် ပါဝင်သည့် စာစဉ် ၁၃ မျိုးကို လစဉ် လဲလှယ်၍ ထားရှိသည်။
ယခုအချိန်သည် ကျောင်းဖွင့်သော ရာသီ ဖြစ်သောကြောင့် ကျောင်းသူ၊ ကျောင်းသားများ အားလပ်ရက် ဖြစ်သည့် စနေ၊ တနင်္ဂနွေ တွင် စာကြည့်တိုက် ပိတ်ရက် ဖြစ်သဖြင့် ကျောင်းနေအရွယ် ကလေးများ လာရောက် ဖတ်ရှုရန် မဖြစ်နိုင်တော့ပါ။ ထို့အတွက်ကြောင့် စာရေးသူက စာကြည့်တိုက်မှ တာဝန်ရှိ သူများကို ကျောင်းသား၊ ကျောင်းသူများ ဖတ်ရှုနိုင်ရန် ရက်နှင့် အချိန်ကို ညှိနှိုင်း ပေးပါရန် အကြံပြု ပေးခဲ့သည်။
ယနေ့ စာရေးသူတို့ နိုင်ငံအတွင်းရှိ လုပ်သားပြည်သူ အပေါင်း တို့သည် စာတတ်မြောက် ထားကြသော်လည်း စာဖတ်သည့် အလေ့အထများ နည်းပါး လာသည်ကို တွေ့မြင် နေရသည်။ စာဖတ်သည့် အလေ့ နည်းပါးရခြင်း အကြောင်း နှစ်ချက် ရှိသည်။ ပထမတစ်ချက်မှာ မြို့ပြနှင့် ကျေးလက်ရှိ လုပ်သားပြည်သူ များသည် မိမိတို့၏ စားဝတ်နေရေး အတွက် ရုန်းကန်လှုပ်ရှား နေရခြင်း၊ ဒုတိယ အချက်မှာ ဖျော်ဖြေရေး အခန်းကဏ္ဍများ တိုးတက်များပြားလာခြင်း နှင့် ခေတ်မီလှသည့် လက်ကိုင်ဖုန်း များတွင် ပါဝင်သည့် အင်တာနက် ကြည့်ရှုခြင်း၊ ဂိမ်းကစားခြင်း များကို လူငယ်များ စွဲလမ်းလှသည့် အတွက်ပင် ဖြစ်သည်။
မြို့နယ်နှင့် ကျေးလက်တို့တွင် စာကြည့်တိုက် များရှိလင့် ကစား စာဖတ်သည့် အလေ့အကျင့် နှင့် စာဖတ်ရှိန် မြှင့်တင်ပေးရန် အရေးကြီး လာပါပြီ။ စာရေးသူ ဖတ်ခဲ့၊ မှတ်ခဲ့ ရသည့် ဆောင်ပုဒ် အချို့ကို ပြန်လည်ဝေငှ လိုပါသည်။ ''အလှအတွက် မှန်ကြည့်သလို ဘဝအတွက် စာကြည့်ပါ''၊ ပညာရှိ မာကရက်ဖူလာ ၏ အဆိုမှာ ''သင့်ဆီမှာ ပညာ ဗဟုသုတေ တွရှိရင် တခြားသူတွေ ဆီကိုလည်း ဖယောင်းတိုင် မီးညှိသလို ဖြန့်ဝေ ပေးလိုက်ပါ''၊ ''စာဖတ်ခြင်းဖြင့် ဘဝကို အလှပြင် နေသောသူနှင့် စာမဖတ်ဘဲ အသက်ရှင် နေသောသူတို့ အချိန် ကြာလာလျှင် တဖြည်းဖြည်း သိသာ လာလိမ့်မည်'' ဟူ၍ ဖြစ်သည်။
ယခုအခါ စာဖတ် ပရိသတ်များ၊ စာပေ ရေချမ်းစင်များ တိုးပွား လာသည်ကို အားရဖွယ် တွေ့မြင် နေရသည်။ အချို့သော ကိုယ်ပိုင် စီးပွားရေး လုပ်ငန်းများ တွင်ပင် သတင်းစာ၊ ဂျာနယ်နှင့် မဂ္ဂဇင်းများ ထားရှိ လာသည်ကို တွေ့ရှိ လာရသည့် အတွက် စာဖတ်သည့် အလေ့အထ ကောင်းများ တစ်နယ်လုံး အတိုင်းအတာ မှသည် မြန်ပြည် တစ်ဝန်းလုံးသို့ ပျံ့နှံ့စေ ပါရန် စာရေးသူမှ ဆုမွန်ခြွေအပ် ပါသည်။
#Themyawadydaily
#မြ၀တီနေ့စဉ်
No comments:
Post a Comment