နေပြည်တော်၊ အောက်တိုဘာ - ၁၁
-
လာအိုနိုင်ငံသို့ချစ်ကြည်ရေး ခရီးရောက်ရှိနေသည့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ဇနီးဒေါ်ကြူကြူလှ၊ ကာကွယ်ရေးဦးစီးချုပ်ရုံး (ကြည်း)မှ ဒုတိယဗိုလ်ချုပ်ကြီး သန်းထွန်းဦးနှင့် တပ်မတော်အရာရှိကြီးများ၊ မြန်မာစစ်သံ (ကြည်း၊ရေ၊လေ) ဗိုလ်မှူးကြီး ကျော်ကျော်မင်းနှင့်တာဝန်ရှိသူများလိုက်ပါပြီး အောက်တိုဘာ ၁၀ ရက်ညပိုင်းတွင် ဗီယင်ကျန်းမြို့ရှိ လာအိုနိုင်ငံဆိုင်ရာမြန်မာနိုင်ငံ သံရုံးသို့ရောက်ရှိကြရာ လာအိုနိုင်ငံဆိုင်ရာမြန်မာသံအမတ်ကြီး ဦးကိုကိုနိုင်နှင့်သံရုံး ၀န်ထမ်းများ၊ စစ်သံရုံးမှအရာရှိ၊ စစ်သည်များနှင့်မိသားစုများ၊ သင်တန်းသား အရာရှိများက ကြိုဆိုနှုတ်ဆက်ကြသည်။
-
ထို့နောက် တပ်မတော်ကာကွယ်ရေးဦးစီးချုပ်သည် သံရုံးရှိဧည့်သည်တော်မှတ်တမ်း စာအုပ်တွင် မှတ်တမ်းတင်လက်မှတ်ရေးထိုးသည်။ ၎င်းနောက်သံအမတ်ကြီးက သံရုံး၊ စစ်သံရုံး ၀န်ထမ်းများနှင့် သင်တန်းသား အရာရှိများအား တစ်ဦးချင်း မိတ်ဆက်ပေးပြီး သံရုံးလုပ်ငန်းဆောင်ရွက်နေမှု အခြေ အနေများနှင့် မြန်မာ- လာအို နှစ်နိုင်ငံဆက်ဆံရေး တိုးတက်ကောင်းမွန်မှုအခြေအနေများအား ရှင်းလင်းတင်ပြသည်။
-
ယင်းနောက် တပ်မတော်ကာကွယ်ရေးဦးစီးချုပ်က အမှာစကားပြောကြားရာ၌ မြန်မာ-လာအို နှစ်နိုင်ငံသည် အိမ်နီးချင်းကောင်းနိုင်ငံများဖြစ်ပြီး ယခင်ကတည်းက နှစ်နိုင်ငံ ခေါင်းဆောင်များ ချစ်ကြည်ရင်းနှီးမှုများ ရှိခဲ့ကြောင်း၊ ထို့အပြင်အာဆီယံအဖွဲ့သို့ တစ်ချိန် တည်းဝင်ရောက်ခဲ့ကြသည့် နိုင်ငံများဖြစ်ပြီး တစ်နိုင်ငံနှင့်တစ်နိုင်ငံအပြန်အလှန်ရပ်တည် ဆောင်ရွက်ပေးလျက်ရှိကြောင်း၊ ၎င်းအပြင် မိမိတို့နှစ်နိုင်ငံသည် ယဉ်ကျေးမှုနှင့် ဓလေ့ ထုံးစံများ များစွာ တူညီမှုရှိပြီး နှစ်နိုင်ငံဆက်ဆံရေး နှင့် ပူးပေါင်းဆောင်ရွက်ရေးကိစ္စရပ်များတွင် ချစ်ကြည်ရင်းနှီးမှုသာမက စီးပွားရေးလုပ်ငန်းများနှင့် ကုန်သွယ်မှုလုပ်ငန်းများကိုပါ ပူးပေါင်းဆောင်ရွက်နိုင်ရန် မိမိတို့သက်ဆိုင်ရာကဏ္ဍအလိုက် ကြိုးပမ်းဆောင်ရွက် ကြစေလိုကြောင်း၊ မိမိတို့တာဝန်ထမ်းဆောင်နေသူများသည် နိုင်ငံတော်နှင့် တပ်မတော် ကိုယ်စား ဆောင်ရွက်နေကြသူများ ဖြစ်သောကြောင့် မိသားစုစိတ်ဓာတ်ဖြင့် စည်းစည်း လုံးလုံး၊ ညီညီညွတ်ညွတ် နေထိုင်ကြရန်လိုကြောင်း မှာကြားသည်။
-
ယင်းနောက် တပ်မတော်ကာကွယ်ရေးဦးစီးချုပ်က သံရုံးမိသားစုများနှင့် စစ်သံရုံး မိသားစုများ၊ သင်တန်းသား အရာရှိများအတွက် စားသောက်ဖွယ်ရာများနှင့် လက်ဆောင် ပစ္စည်းများပေးအပ်ရာ သံအမတ်ကြီးနှင့်ဇနီး၊ စစ်သံမှူးနှင့်ဇနီး၊ သံရုံးဝန်ထမ်းများ၊ အရာရှိ၊ စစ်သည်၊ မိသားစုများနှင့် သင်တန်းသားအရာရှိများက အသီးသီး လက်ခံရယူကြသည်။ ထို့နောက် တပ်မတော်ကာကွယ်ရေး ဦးစီးချုပ်နှင့်ဇနီး၊ အဖွဲ့ဝင်များအား သံရုံး မိသားစုများက ညစာဖြင့် တည်ခင်းဧည့်ခံခဲ့ကြောင်း သတင်းရရှိသည်။
-
#မြ၀တီနေ့စဉ်သတင်းစာ
No comments:
Post a Comment