နေပြည်တေ်ာ ၂၄-၇-၂ဝ၁၈
ခရီးသွားလုပ်ငန်း ဖွံ့ဖြိုးတိုးတက်ရေးနှင့် ဥယျာဉ်ခြံ စိုက်ပျိုးရေး လုပ်ငန်းကဏ္ဍတွင် ဖွံ့ဖြိုးတိုးတက်မှု များစွာအလားအလာ ရှိသည့်အင်းလေး ဒေသ၏ စီးပွားရေးဖွံ့ဖြိုး တိုးတက်ရေးအတွက် ဆွစ်ဇာလန် နိုင်ငံအစိုးရအနေဖြင့် ဆွစ်ဖရန့်ငွေ ၄ ဒသမ ၈သန်း ကူညီပံ့ပိုးပေးသွားမည် ဖြစ်ကြောင်း ယနေ့တွင် ဟိုတယ်နှင့် ခရီးသွားလာရေး ဝန်ကြီးဌာနမှ သိရသည်။
အင်းလေးဒေသအနေဖြင့် ခရီးသွားလုပ်ငန်း ဖွံ့ဖြိုးတိုးတက်မှုနှင့် ဥယျာဉ်ခြံစိုက်ပျိုးခြင်း လုပ်ငန်းတို့တွင် ဖွံ့ဖြိုးတိုးတက်ရန် များစွာ အလားအလာရှိသည့် ဒေသတစ်ခုဖြစ်၍ ၎င်းဒေသအနီး ပတ်ဝန်းကျင်ကို ဆင်းရဲမှုလျှော့ချ ရေးလုပ်ငန်းများ ဆောင်ရွက်ခြင်း၊ အလုပ်အကိုင် ဖန်တီးပေးခြင်းနှင့် အဆိုပါဒေသရှိ အသေးစားအလတ်စား လုပ်ငန်းများ ဖွံ့ဖြိုးတိုးတက် လာစေရန်အတွက် ဆောင်ရွက်မည့် Project Document ကို ဆွစ်ဇာလန်အစိုးနှင့်မြန်မာနိုင်ငံ အစိုးရတို့ကြား ယခုလ ၁၂ ရက်က လက်မှတ်ရေးထိုး ခဲ့ကြပြီး ဖြစ်သည်။
အဆိုပါစီမံကိန်းကို ယခုနှစ်မှ လာမည့် ၂ဝ၂၂ ခုနှစ်ထိဆောင်ရွက် သွားမည်ဖြစ်ပြီး ဆွစ်ဇာလန်အစိုးရ အနေဖြင့် စီမံကိန်းများဆက်လက် ဆောင်ရွက်ရန် ကွင်းဆင်းစစ်ဆေးမှုများ ဆောင်ရွက်သွားမည် ဖြစ်သည်။
"ဆွစ်ဇာလန် အစိုးရက ငွေကြေးပံ့ပိုး ပေးတယ်ဆိုပေမယ့် ငွေပဲမဟုတ်ဘဲ စီမံကိန်းအတွက် လိုအပ်တဲ့ အခြားအကူအညီတွေလဲ ပေးသွားမယ်လို့ သိရပါတယ်။ လိုအပ်တဲ့ နည်းပညာပိုင်းအတွက် သင်တန်းတွေလဲ ပေးသွားဖို့ အစီအစဉ်ရှိပါ တယ်လို့လဲ သိရပါတယ်"ဟုဟိုတယ်နှင့် ခရီးသွားလာရေး ဝန်ကြီးဌာနမှ တာဝန်ရှိသူတစ်ဦးက ပြောပြသည်။
အင်းလေးဒေသ အနေဖြင့် ယခင်အချိန်ကာလများ ကတည်းက ရိုးရာယဉ်ကျေးမှု၊ လူနေမှု ဓလေ့ထုံးစံများနှင့် သဘာဝအလှရှုခင်းများ ရှိပြီးဥယျာဉ်ခြံသီးနှံ စိုက်ပျိုးမှုများလည်း ထွန်းကားခဲ့ကာ ယခုနောက်ပိုင်းတွင် ပြည်တွင်းပြည်ပ ခရီးသွားဧည့်သည်များ၏ စိတ်ဝင်တစား လာရောက်လည်ပတ် လေ့လာသည့် ခရီးစဉ်ဒေသ တစ်ခုလည်းဖြစ်၍ အဆိုပါကဏ္ဍနှစ်ရပ် ဖွံ့ဖြိုးရေးကို အခြေခံ၍ ၎င်းဒေသစီးပွားရေး ဖွံ့ဖြိုးရေးအတွက် စီမံချက်ဖြင့်ဆောင်ရွက်ခြင်းဖြစ်သည်။
ထိုသို့ အင်းလေးဒေသ စီးပွားရေး ဖွံ့ဖြိုးမှုအတွက် ဆောင်ရွက်မည့် အဆိုပါစီမံကိန်းကို ဟိုတယ်နှင့် ခရီးသွားလာရေး ဝန်ကြီးဌာန၊စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနနှင့် စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီး ဌာနတို့ကလည်း ပူးပေါင်းဆောင်ရွက် သွားမည် ဖြစ်ကြောင်း သိရသည်။
#Themyawadydaily
No comments:
Post a Comment